Bathu bangwe ba no wana kwa ka sima ku da Ndzimu. Mu bali, Ndzimu u no lingika a sina chingwe ne kwedu. Bona kuti bangwe ba no tini:

• “Nda ka tembezela Ndzimu ndi kumbila batsho, ngono nda kabe ndi zwihwa u ngati u kulekule kwazo nami. Mu ndili, Ndzimu wa kabe a sina mazwihwo.”​—Marco, Italy.

• “Nenguba nda kabe ndi shaka ku shingila Ndzimu, kwa kabe ku lingika ali kulekule kwazo. Nda kabe ndi kumbula kuti i Ndzimu waka bipa kwazo u no wisa bathu zogwadza koga. Nda kabe ndi singa dumile kuti Ndzimu u na ludo.”​—Rosa, Guatemala.

• “Se ngwana, nda kabe ndi dumila kuti Ndzimu wa ka lingilila koga dziphoso dza ti no thama, ili koga kuti a ti wise zogwadza. Shule kwe chibaka, nda kabe ndi ntola se u singa khategele bathu. Ndzimu wa kabe e fanana ne ministara u nkulu wa ka lingilila kwazo mishingo ye bathu ba a no busa, ngono a sina chingwe nabo.”​—Raymonde, Canada.

U no kumbulani? A Ndzimu haana ludo? Bakirisiti ba ka buzwa buzo iyeyo kwe makole manjinji. Mu makole a pakati, bathu banjinji ba no ngina dzikereke ha ba zo tembezela Ndzimu Masimbawose. Ne kutini? Bathu ba kabe be ncha. Nlume we histori u noyi Will Durant wa kati: “Nthu wa ka thama chibi u nga tembezela chini wale?”

Ini cha ka thama kuti bathu be linge Ndzimu ne zila ya ka jalo? Baibili i no diyani dumbu ne kwe Ndzimu? A ku zwidiya malebeswa ne kwe Ndzimu ku nga ku batsha kuti u nde?

CHI NO DUMIGWA NE BATHU BANJINJI

“A ti zo dumilana kuti a dumbu ti nga leba ‘nekwe’ zina le Ndzimu, a kwa ka jalo zina ilelo lo be lipi.”​—Professor David Cunningham, Theological Studies.

MALEBESWA A MU BAIBILI

Ndzimu wa kati: “Ndimi Yahwe (Jehova), ndilo zina langu ileli.” (Izaya 42:8) Jehova i zina le Chihebera li no dwa kuti “Uno Thama kuti ku shingikale”.​—Genesisi 2:4.

Jehova u no shaka kuti ti shingise zina lile. “Danani zina labo,”. “Zibisani mishingo yabo zwitjaba, ngono mulebe kuti zina labo lakakudzika.”​—Izaya 12:4.

Jesu wa ka shingisa zina le Ndzimu mu ntembezelo. Jesu ha e tembezela, wa ka dwa Jehova eti: “Ndakabazibisa zina lenyu, ngono ndowodwilila ndithama kuti lizibgwe.” Ini Jesu a ka zibisa badiyiwa babe zina le Ndzimu? Wa ka dwilila eti: “kuti ndizo ludo gwamunondida ndigo gube mubali ne nge kuti nami ndibe mubali.”​—Johani 17:26.

INI LI SHETEKA

Walter Lowrie, ungwe wa ka zwidiya ne kwe madumili wakati: “Nthu u singa zibe zina le Ndzimu ha ato nziba se nthu,” e be e dwilila eti: “kakale ha a nga nde, ha ili kuti u no nziba koga se masimba.”

Nlume u no dangwa Victor wa kabe e yenda ku kereke viki ne viki, ngono a singa zwihwe dumbu e ziba Ndzimu. Wa kati: “Ku dwapo a zwidiya kuti zina le Ndzimu ndi Jehova ngono ndaka zwihwa u ngati ndiko ndi u nzibisiwa chinlayo,” u no dwilila eti: “Ndaka zwihwa ungati gwe bupelo nda shangana naye kwa ndaka hwa ne kukwe kanjinji. Ngono ndaka pelela ndi ntola se Nthu dumbu ne ku thama bukhwinya naye.”

Jehova, na iye u no sedzela, ku bathu bano shingisa zina lile. Akuzha muna bano “kumbula ngekwe zina labo,” Ndzimu uno thembesa e ti: “Ndowobatjidza se nlume etjidza nkololo uwe unonshingila.” (Malaki 3:16, 17) Ndzimu uno lipa i babo bano dana zina lile. Baibili i kati: “Mmwe ne mmwe unodana zina la She (Jehova) unowotjidziwa.”​—Baroma 10:13.

CHI NO DUMIGWA NE BATHU BANJINJI

Budumili gwe Bukirisiti “mu zila dzago dza ntolo dzili thatu (3) dze Roman Catholicism, Eastern Orthodoxy ne Protestantism go amuchila kuti Ndzimu u ngompela mu Bathu batatu: Ndzimu Tate, Ndzimu Nkololo ne Ndzimu Meya ya ka Yengemala. Ku yenda ne budumili gwe Bukirisiti ichechi a te ku amuchila kuti kuna midzimu mitatu ngono bathu ibaba dumbu i nthu u ngompela.”​—The New Encyclopædia Britannica.

MALEBESWA A MU BAIBILI

Jesu, Nkololo we Ndzimu ha a thu a kati uno lizana kene ndiye zwe Tate babe. Mu bumo gwa ichechi wa kati: “Ndoyenda kuna Tate Ngobe ibo bakulu pandili.” (Johani 14:28) Kakale wa ka dwa ungwe we batobeli babe eti: “Ndotathila kuna Tate, ibo Tate benyu kakale bali Ndzimu wangu ne Ndzimu wenyu.”​—Johani 20:17.

Meya yaka yengemala a te ili nthu. Bakirisiti be kutanga “bakazhala meya yakayengemala,” ngono Jehova wa kati: “Ndowodila meya yangu mu bathu bose.” (Mishingo 2:1-4, 17) Meya ­yaka yengemala a te ili ipithu che Butatu gu ngompela (Trinity). Ngono dumbu, i masimba e Ndzimu a no shinga.

INI ICHECHI CHI SHETEKA

Dumilo ye Butatu gu ngompela (The Trinity) se kwa i chenesiwa ne bazibi be Catholic, Karl Rahner na Herbert Vorgrimier, ba kati: “Butatu gu ngompela a gu nga ka ke gu ka zigwa hagu sa zumbunugwa, ngono dumbu ne shule kwe ku zumbunugwa a gu to hwisisika.” Apa dumbu u nga da nthu wa u singake u ka khona ku nziba kene hwisisa? Dumilo ye Butatu gu ngompela (Trinity) i no dzibilidza bathu kuziba ne ku da Ndzimu.

Marco, wa ka leba chingwe mu nsholo wa ka pinda, wa ka tola Trinity se chidzibilidzi. Wa kati: “Nda ka be ndi tola kuti Ndzimu u no ndi zwi sumbikila, a to shaka kuti ndi nzibe,” u no dwilila eti, “ngono ichechi cha ka thama kuti a be kulekule, ali masazigwa ne u singa shake bathu.” Ne kwaka jalo, “Ndzimu ate uli Ndzimu we phiphiti.” (1 Bakorinta 14:33, Bhaibili YAKAYENGEMALA) Ndzimu a to ti sumbikila cha ali icho. Jesu wa kati: “tonamata tjatinoziba.”​—Johani 4:22.

Marco wa kati: “Shule kwe ku zwidiya kuti Ndzimu ate ili ipithu che Butatu gu ngompela (Trinity), gwe bupelo nda ka khona wanana naye.” A ti tola Jehova se Nthu dumbu u yega mu bumo gwe ku ntola se ntaya we masazigwa kowo be ku lelu kuti ti nde. Baibili ikati: “Iye usina ludo aatoziba Ndzimu,” i no dwilila iti: “ngobe Ndzimu ludo.”​—1 Johani 4:8.

CHINO DUMIGWA NE BATHU BANJINJI

“Shule koga kwe lufu meya ye bathu bano fa bali mu chimo che chibi ba no ngina mu dzihele kwa bano dziyidziwa nge kusingapele ne moto.’” (Catechism of the Catholic Church) Batungamili be madumili angwe, bakati dzihele i chimo che kuzwidusa ne thubukana ne Ndzimu.

MALEBESWA A MU BAIBILI

“Nthu (Meya) unotjinya ndiye unofa.” (Ezekieli 18:4) Bafi abatoziba tjimwe.” (Nreri 9:5) Ha meya ifa kakale isinga zibe chingwe ino dziyidziwa chini mu “moto nge kusingapele” kene ne ku hwa zogwadza ku singapele kwe ku thubukana ne Ndzimu?

Mu Baibili matama e Chihebera ne Chigiriki, ano shanduligwa kanjinji ili dzihele, a no dwa ikumbu (libita) che nthu. A ti lakidzila, ha Jobe e dziyidziwa nge bugwele guno gwadza, wa ka tembezela eti: “Ungati munga ndisumbika mu bugalo gwe bafi.” (Jobe 14:13, BHAIBHILI Yakayengemala) Jobe wa ka be e shaka ku phumula isini mu bugalo gwe ku dziyidziwa kene thubukana ne Ndzimu ngono mu bumo gwa ichecho mu ikumbu.

INI ICHECHI CHI SHETEKA

Ku sima moyo a ku to thama kuti ti de Ndzimu, ko ti thubukanya naye. Rocio u no gala ku Mexico a kati: “Ku dwa mu buchechana gwangu nda ka diyiwa dumilo ye moto we dzihele. Nda kabe ndi tshuga kwazo kwa nda ka be ndi singa dume kuti Ndzimu u na michelo ya ka lulwama. Nda kabe ndi tola kuti Ndizimu u na bushongola kakale a to amuchila bathu.”

Matama e Baibili a ka tambukanu ne kwe dzikathulo dze Ndzimu ne chimo che bafi aka shandula zila Rocio ya a ka be e linga Ndzimu nayo. A kati: “Nda ka zwihwa nda ka sununguka ndi zwihwa nda dusiwa ntolo nkulu mu mazwiwo.” U no dwilila eti: “Nda ka tangisa ku themba kuti Ndzimu u no ti shakila zwa ka ti lulwamila ne kuti u no tida, ngono namibo ndi nga khona ku nda. U nonga tate bano bata bana babo nge luboko, kakale u no ba emulila zwaka ba lulwamila.”​—Izaya 41:13.

Bathu banjinji ba no shingila Ndzimu koga nge ntata ye ku cha moto we dzihele ngono dumbu Ndzimu a to shaka kuti ti nshingile nge libaka gwe kuti to ncha. Mu bumo gwa ichecho, Jesu wa kati: “Ida She (Jehova) Ndzimu uwo.” (Mako 12:29, 30) Pezhugwi kwa ichecho, a to chi ziba kuti Ndzimu a to tola thambo dzi saka lulwama ngwenu, ti nga themba dzi kathulo dzidze dzi chowo zha. Se nkhwinya wa Jobe, Elihu, ti nga sukika moyo ti ti: “Ngakube kule kule ne Ndzimu kuti ungathama bubi. Kukule na Masimbawose kuti ashinge tjisiitjo.”​—Jobe 34:10.

Zhuba lingwe ku Jerusalema, Jesu wa kabe e leba nekwe Tate babe, Jehova, ne ku leba a ka tambunuka ne kwe batungamili be budumili be manyepkhwa. (Johani 8:12-30) Cha a ka leba mu chibaka ichecho cho ti diya se kwa ti nga lingisisa zwi no dumigwa ne bathu banjinji ne kwe Ndzimu ngwenu. Jesu wa kati: “Ha mulondolodza matama angu, mu badiyiwa bangu bakwako, mowoziba malebeswa, ngono malebeswa anowomusunungula.”​—Johani 8:31, 32.

“Ha mulondolodza matama angu.” Ipapa Jesu wa ka ti bigila zila ye ku lingisisa kuti a zwidiyo zwe budumili nde zwe “malebeswa” kene chini. Ha u hwa chingwe ne kwe Ndzimu, zwibuzwe kuti, ‘A ichechi cho dumilana ne matama a Jesu ne dzingwe Hwalo dza ka Yengemala?’ Yedza chilakidzilo cha ibabo ba ka hwa mpostolo Paulo e leba ngono be be “belingisisa mu Hwalo dze Ndzimu kubona kene [zwa a kabe e zwidiya ya ka be ili] malebeswa.”​—Mishingo 17:11.

Marco, Rosa, na Raymonde, bose ba ka leba mu nsholo we kutanga mu misholo iyeyi, ba ka lingisisa ne njele zwa ba kabe be dumila ne ku zwidiya Baibili ne Bafakazi ba Jehova. Ba ka zwidiyani?

Marco: “Wa kabe e ti diya Baibili wa ka shingisa Hwalo ku dabila buzo dzose dzangu ne nkadzi wangu. Ndizo ti ka tangisa ku da Jehova, ngono ichecho chi ka ti batsha kuti ti wanane kwazo se nlume ne nkadzi ba ka lobolana!”

Rosa: “Kutanga, nda kabe ndi kumbula kuti Baibili i buka koga ya ka kwagwa ne bathu ngono i lika ku chenesa Ndzimu se kwa bathu be nkumbula. Ngono mu ku yenda kwe nako, nda ka bona se kwa Baibili i dabila buzo dza nda kabe ndi nadzo. Ngwenu, Jehova i nthu we malebeswa mu ndili. Ngwenu ndo chi nthemba.”

Raymonde: “Nda ka tembezela Ndzimu ndi kumbila batsho ye ku zwidiya ne kukwe. Shule kwe chibakanyana, imi ne nlume wangu ti ka tangisa ku zwidiya Baibili. Ku bupelo, ta ka zwidiya malebeswa ne kwa Jehova! Ta ka be ta ka shatha kwazo ha ti bona kuti Jehova i Ndzimu wa ka tini.”

Baibili ha i to ti batsha koga ku bona manyepkhwa a no diyiwa ne kwe Ndzimu; i no lakidza malebeswa ne kwe buthu gugwe gwa ka naka. I Dama lile la ka femegwa, ngono lo ti batsha kuti ti “zibisise zwipo zwatinopiwa nge Ndzimu.” (1 Bakorinta 2:12) Ini u singa zwibonele kuti Baibili i nga dabila chini buzo dza ka jwaeleka ngono dzi sheteka kwazo, buzo ne kwe Ndzimu, mazwimisilo awe, ne bumangwana gwedu? Bala dabilo dze buzo dzingwe idzedzi mu nsholo unoti “Zwidiyo Zwe Baibili > Buzo dze Baibili dzo Dabigwa” mu www.jw.org. Kakale u nga kumbila thuto ye Baibili mu Website kene mu nngwe we Bafakazi ba Jehova. To themba kuti ha u nga thama u jalo, u nowo zwibonela kuti ku lelu ku da Ndzimu.