MU SHANGO yose, njudzi dzose ne budumili, bathu ba no tembezela. Ba no tembezela ba li boga kene ba na bangwe. Ba no tembezela mu dzikereke, mu dzitempele, mu dzisinagogu, mu dzi-mosque, ne mu dzi-shrine. Ba no shingisa ngubo, ndalama dze-rosary, makungwana e mitembezelo, zwitshwantsho, dzibuka dze mitembezelo, kene mitembezelo ya ka kwagwa mu dzibodi dzi no lembedziwa mu guma.

Bathu ndi bo koga ba no khona tembezela mu zwithu zwe shango zwi no chila. Ne kwa ka jalo, ku na zwithu zwinjinji zwa ti no fanana nazo ne phuka. Sa idzo koga, to sheta zojiwa, phepho ne vula .Sa idzo koga, to zwagwa, to chila, to fa. (Nreri 3:19) Ngono bathu ndi bo koga ba no tembezela. Ne kutini?

Dabilo i nga be kuti ta ka fanila thama ti jalo. Ntembezelo, i zila bathu ya ba no lebeleka nayo ne zwithu zwi si nga boneke, mu zwithu zwa ba no linga ili zwa ka yengemala, zwi no tolegwa pezhugwi, zwi si nga fe. Baibili i no lakidza kuti ta ka bumbiwa ti na njemulo ye zwithu zwa ka jalo. (Nreri 3:11) Jesu Kirisiti wa ka tongo leba eti: “Bakakombolegwa bashayi mu meya.”​—Matewu 5:3.

“Bashayi mu meya”​—nthu u nga chenesa chini zwithu zose izwezwi zwe budumili, ne chibaka chi ngapa ngapa chi no shingisiwa mu ntembezelo? Ne kwa ka jalo, bathu bangwe ba no shaka zwithu izwezwi zwa ba no sheta mu bathu saibo. Ngono iko dumbu, bathu ba nga khona ku batsha bangwe ne kwe zwithu izwezwi kwa ka pelela? Ha ti na bukhoni, to chila chibaka chi futshwanana ne ku lingila zwithu pejopejo. Nthu wa ka chenjela ku pinda bose, u na masimba makulu, u no khona ku dzikitadza ndiye koga u nga ti pa cha ti no sheta. Ngono ini zwa ti no sheta zwi no thama kuti ti shake tembezela?

Bona yechi: A wa ka tongo shaka butungamili, buchenjedu, kene dabilo dze buzo dzi si nga khone dabigwa ne bathu? A wa ka tongo shaka ku nyaladziwa ha wa wigwa ne mathatha a no hwisa zogwadza kwazo kene ku tungamigwa ha wa ka fanila ku tola thambo ya ka sima kene ku zwibatigwa ha u zwibona nlandu?

Ku yenda ne Baibili, zose izwezwi i zwithu zwi no shaka tembezelegwa. Baibili ndiyo i no pinda dzibuka dzose ha ku zha mu khani iyeyi, ngono i no leba ne kwe mitembezelo ye balume ne bakadzi banjinji ba k a be be thembeka. Ba ka be be tembezela kuti ba nyaladziwe, ba tungamigwe, ba zwibatigwe ne ku bona dabilo dze buzo dza ka sima kwazo. Pisalema 23:3; 71:21; Daniele 9:4, 5, 19; Habakuke 1:3.

Mitembezelo iyeyi, ya ka be i si nga fanane nenguba ya ka be i na zwa i no fanana mu zwili. Nngwe ne nngwe wa ka be e tembezela wa ka be e ziba cha a no tembezela ne kwacho, i li chingwe chi si nga tolegwe pezhugwi mu mazhuba a ngwenu. Ba ka be be ziba kuti mitembezelo ya ka fanila lingisiwa ku na yani.

A MITEMBEZELO i no yenda ku nthu u ngompela, ku sa ka lingwa kuti ko tembedzegwa yani? Ngwenu, bathu ba no duma kuti kwa ka jalo. Nkumbulo iwoyo u no diwa ne bathu banjinji ba no duma kuti budumili i chithu chi ngompela, nenguba ba si nga dume chi no fanana. A ko hwika kuti nkumbulo iwoyo ha u na malebeswa?

Baibili i no diya kuti mitembezelo minjinji ha i to tembezegwa ne zila ya ka fanila. Mu chibaka che ku kwagwa kwe Baibili, kwa ka be kwa ka jwayeleka kuti bathu ba tembezele zwitshwantsho zwa ka bezhiwa. Nenguba Ndzimu a ka be e lambana ne nkumbulo iwoyo. Ha ti lakidzila, Pisalema 115:4-6 i no leba ne kwe zwitshwantsho izwezwi iti: “Ina zebe koga ayitohwa.” Ko hwika dumbu. Ini u tembezela ndzimu u si ngake a ka ku hwa?

Mbiko ye Baibili i no biga zwithu izwezwi pachena. Mporofiti we malebeswa Elija wa ka dwa baporofiti ba Bhaale kuti ba tembezele ndzimu wabo, kuti ku dwapo Elija a tembezelebo uwe. Elija wa ka leba kuti Ndzimu we malebeswa u nowo dabila ngono we manyepkhwa ha u nga dabile. Ku dumana ne cha ka legwa na Elija, baporofiti ba Bhaale ba ka tembezela chibaka chi lefu kwazo, ne ku lilila pezhugwi ngono ku sina chi no shingikala! Baibili i no leba kuti: “Koga kusina hwi linohwika kene dabilo yabanowana.” (1 Boshe 18:29) Ngono, kwa ka shingikalani ha Elija e tembezela?

Elija wa kati e tembezela Ndzimu uwe wa ka ndabila chinyolocho, ku ka deluka moto ku dwa kudzimu u ka pisa chibayilo cha ka be cha bigwa na Elija. Wu sa fanana kupi kwa ka be po? To khona ku bona dabilo mu ntembezelo wa Elija wa ka kwagwa muna 1 Boshe 18:36, 37. I ntembezelo nfutshwanana​—i matama a li 30 koga mu nkwalo we kutanga we Chihebera. Ngono, mu matama iyawa, ka tatu kose Elija a ka dana Ndzimu ne zina lile Jehova.

Bhaale, u no dwa “ngweni” kene “tetshi,” ya ka be ili ndzimu we Bakanana, ngono kwa ka be ku na zila njinji dza ba ka be be dana ndzimu iwoyo nadzo. Jehova, ne kwa ka jalo, i zina li sina la li no fanana nalo, li no shingisiwa mu nli koga mu libumbo gose. Ndzimu iwoyo wa ka dwa bathu babe a kati: “Ndimi Yahwe [Jehova], ndilo zina langu ileli. gudzo langu andina wandinolipa kene dendo langu andingalipe zwifano.”​—Izaya 42:8.

A ntembezelo wa Elija ne wa baporofiti ba Bhaale ya ka be i yenda ku nthu u ngompela? Ku namata Bhaale, ndalo ye buchapa ne ku dusa bathu zwibayilo dumbu kwa ka be ku yesa bathu pasi. Ne zila i si nga fanane, ku namata Jehova kwa ka be ku yesa bathu babe pezhugwi mu Iziraela, ku ba sunungula mu mazwibato iyawo a sa ka lulwama. Kumbula yechi: Ha u kwalila nkhwinya uwo u no tolegwa pezhugwi likwalo, a u nga shaka kuti gu yesiwe ku nthu u si nkhwinya uwo ngono ili nthu u no lambana ne chingwe ne chingwe chi no diwa ne nkhwinya uwo? Ha u nga thame u jalo!

Ha u tembezela Jehova, u no tembezela Mbumbi, Tate be bathu bose.a “Imwi mu Tate bedu,” kwa ka leba mporofiti Izaya e tembezela. (Izaya 63:16) Ichecho ndicho cha ka legwa na Jesu Kirisiti, e dwa badiyiwa babe eti: “Ndotathila kuna Tate, ibo Tate benyu kakale bali Ndzimu wangu ne Ndzimu wenyu.” (Johani 20:17) Jehova ndi Tate ba Jesu. Ndiwo Ndzimu wa ka bo u tembedzegwa na Jesu, wa a ka diya kuti badiyiwa babe ba ntembezele.​—Matewu 6:9.

A Baibili i no leba kuti ti tembezele Jesu, Mariya, bayengemali kene baengele? Aa​—Jehova koga. Ku na mabaka mabili ne kwa ichecho. Che kutanga, ntembezelo i zila ingwe ye ku namata, ngono Baibili i noti ku tembedzegwe Jehova koga. (Ekezodo 20:5) Che bubili, Baibili i no lakidza kuti ndiye “Unodabila ntembezelo.” (Pisalema 65:2) Nenguba Jehova a na ba a no tuma, ku dabila mitembezelo i nshingo wa a si ngake a ka u pa ungwe nthu. I Ndzimu u no thembesa kuti u no teedza mitembezelo yedu.

Ngono ha u shaka kuti mitembezelo iyo i dabigwe ne Ndzimu, kumbula chi no legwa ne likwalo igogu: “Iye unodana zina la She mu tjibaka itjetjo atjidziwe.” (Mishingo 2:21) Ngono a ichecho cho dwa kuti Jehova u no dabila mitembezelo yose koga? Kene ku na cha ta ka ka fanila ziba ha ti shaka kuti mitembezelo yedu i dabigwe?

HA KU zha mu khani ye ntembezelo, dzikereke njinji dzo lingisa nkumbulo mu kuti u nga gala chini, u nga shingisa matama api ne zwilenje zwipi. Ne kwa ka jalo, Baibili i no ti batsha kuti ti si tolele zwithu zwa ka jalo pezhugwi ngono ti lingise nkumbulo mu zwithu zwi no sheteka zwe buzo i noti, “Ta ka fanila tembezela chini?”

Baibili i no lakidza kuti balanda be Ndzimu ba ka be be tembezela mu ndawo dzi singa fanane ba li gale ne zila dzi singa fanane. Ba ka be be tembezelela pezhugwi kene be tembezelela mu moyo ku dwa mu kuti kwa ka be ku shetekani mu chibaka ichecho. Bangwe ba ka be be tembezela ba ka linga pezhugwi, bangwe ba ka linga pasi. Pana kuti ba shingise zwitshwantsho, dzindalama, kene mitembezelo ya ka kwagwa mu dzibuka ili chi no ba batsha, ba ka be be tembezela ku dwa moyo be shingisa matama abo. Ini cha ka be chi thama kuti mitembezelo yabo i hwike?

Se kwa kwa ka legwa mu chidiyo cha ka pinda, ba ka be be tembezela Ndzimu u ngompela koga Jehova. Ku na chingwe chithu chikulu, chi no legwa mu na 1 Johani 5:14: “Oku ndiko kusima kwedu mu Ndzimu, kuti tjimwe ne tjimwe tjatinokumbila nge kuda kwawo, unotihwa.” Mitembezelo yedu ya ka fanila ku dumana ne ku da kwe Ndzimu. Ichecho cho dwani?

Ku yendizana ne ku da kwe Ndzimu, ta ka fanila ziba cha a no shaka. Ku zwidiya Baibili ndicho chithu chikulu chi no shakika mu ntembezelo. A ichecho cho dwa kuti Ndzimu ha a nga hwe mitembezelo yedu kuzhe kwe kuti ti be ti na luzibo gu kulu gwe Baibili? Ha ku zo jalo, Ndzimu u no shaka kuti ti thame ku da kukwe, ti ku hwisisa ne ku shingila mu kuli. (Matewu 7:21-23) Ta ka fanila tembezela ku dumana ne cha ti no zwidiya.

Ha ti zwidiya ne kwa Jehova ne ku da kukwe, ku galamoyo kwedu ko kula​—ili chingwe chi no sheteka mu ntembezelo. Jesu wa kati: “Ha mugalamoyo tjimwe ne tjimwe tjamunokumbila mu mitembezelo mowotjiwana.” (Matewu 21:22) Ku galamoyo ha ku to dwa ku duma chingwe ne chingwe. Ko dwiwa ku duma chingwe chi singa boneke ngono ku na busupi gwe kuti chi na malebeswa. (Bahebera 11:1) Baibili i na busupi gwe kuti Jehova wa ti singa bone u yapo, u no thembeka, kakale wa ka zwimisila ku dabila mitembezelo ya ibabo ba na ku galamoyo mu nli. Pezhugwi kwa ikoko, ti nga kumbila ku galamoyo kwa ka paphidzika ngono Jehova u no da ku ti pa cha ti no sheta.​—Luka 17:5; Jakuba 1:17.

Ku na chingwe kakale chi no sheteka mu ntembezelo. Jesu wa kati: “Akuna unozha kuna Tate asapinda nami.” (Johani 14:6) Jesu ndiye zila i no ti yesa ku na Tate bedu Jehova. Ndizo, Jesu a ka dwa badiyiwa babe kuti ba tembezele ne zina lile. (Johani 14:13; 15:16) A ichecho cho dwa kuti ta ka fanila tembezela Jesu. Mu bumo gwa ichecho, to tembezela ne zina la Jesu, ti ziba kuti Jesu ndiye zila ya ti nga tembezela Tate bedu ba ka zwilizanila kakale ba ka yengemala.

Badiyiwa ba Jesu ba ka be ba li pejo naye ba ka mbuzwa be ti: “She, mutidiye kutembezela.” (Luka 11:1) Ku pachena kuti ba ka be ba singa buzwe ne kwe zwithu zwa ta leba ne kwazo. Ba ka be be shaka ziba kuti ba lebe ne kweni​Dumbu ne matama mangwe ba ka be buzwa kuti ‘Ta ka fanila tembezela ne kweni?’

YA KA be i li ntembezelo u no zibgwa u tembezegwa ne Bakirisiti bose. Nenguba ichecho chi li malebeswa kene chi si malebeswa, ntembezelo wa Jesu u no so dangwa kuyi Ntembezelo wa Tetshi kene wa Tate Bedu, ingwe ye mitembezelo i singa hwisisiwe ne bathu banjinji. Dzimiliyoni dze bathu dzo leba matama e ntembezelo iwoyo dzi u gwililila mazhuba wose, pangwe ka njinji ne zhuba. Ngono Jesu ha a zo be eti ntembezelo iwoyo u shingisiwe ne zila ya ka jalo. To ziba chini?

Jesu wa ka ti a sathu a ka tangisa ntembezelo iwoyo wa kati: “Kakale ha mutembezela musilombolodze matama asina nshingo.” (Matewu 6:7) A Jesu wa ka be e zwinyanyayidza ne ku leba matama a ka be a ka fanila ku kumbugwa ne ku gwililigwa? Ha ku zo jalo! Mu bumo gwa ichecho, Jesu wa ka be e ti diya cha ta ka fanila tembezela ne kwacho, ngono wa ka be e ti diya cha ta ka fanila gala ti kumbula ha ti tembezela. A ti lingisiseni cha a ka leba. Ntembezelo iwoyo wa ka kwagwa mu na Matewu 6:9-13.

“Tate bedu ba kudzimu, zina lenyu ngaliyengamadziwe.”

Jesu wa ka kumbuludza badiyiwa babe kuti mitembezelo yose ya ka fanila lingisiwa ku na Tate babe Jehova. A u no ziba kuti ini zina le Ndzimu li li gulu zwingapa ne kuti ini la ka fanila ku kudziwa ne ku yengemadziwa?

Mu ku tangisa kwe buchilo gwe nthu, zina le Ndzimu la ka yengemala la ka chinyiwa ne manyepkhwa. Chita che Ndzimu Satani, wa kati Jehova i nnyepi, u singa buse zwibuyanana, u si na fanilo ye ku busa bathu ba a ka bumba. (Genesisi 3:1-6) Bathu banjnji ba ka dumana na Satani, be diya kuti Ndzimu ha a na ludo, i nthu wa ka bipa, kakale be nyanyayidza kuti ndiye Mbumbi we zwithu zose. Bangwe ba ka dusa zina lile Jehova mu dzibaibili dzabo ne ku dzibila bathu kuti ba li shingise.

Baibili i no lakidza kuti Ndzimu u nowo baakanya zwithu zose izwezwi. (Ezekiele 39:7) Ngono u nowo baakanya zwimo zwe bathu ne ku ba pa zwithu zose zwa ba no sheta. Chini? Matama a no tobela mu ntembezelo wa Jesu a no dabila buzo iyeyi.

“Bushe gwenyu ngaguzhe.”

Mu mazhuba a ngwenu, bathu ba ka shanganyiwa misholo ne zwidiyo zwe dzikereke ne kwe Bushe gwe Ndzimu. Ngono ba ka be ba ka teedza Jesu ba ka be be ziba kuti, baporofiti be Ndzimu ba ka be ba lebela mbeli kuti Mesiya, Nchidzi wa ka shalugwa ne Ndzimu u nowo busa mu Bushe gu nowo shandula machilo e bathu. (Izaya 9:6, 7; Daniele 2:44) Gowo kudza zina le Ndzimu ne ku dusila manyepkhwa a Satani pachena, gu be gu chinya Satani ne mishingo iye yose. Bushe gwe Ndzimu gowo pedzisa nghwa, bugwele, zhala ne lufu dumbu. (Pisalema 46:9; 72:12-16; Izaya 25:8; 33:24) Ha u tembezelela kuti Bushe gwe Ndzimu go zhe, u nowo be u tembezelela kuti zwa ka thembesiwa ne Ndzimu zwi shingikale.

“Kuda kwenyu ngakuyitiwe mu shango sekwa kunoyitiwa kudzimu.”

Matama a Jesu a no lakidza kuti ku da kwe Ndzimu kowo shingila mu shango se kwa ku shingila kudzimu kwa a no gala. Ku shingikadziwa kwe ku da kwe Ndzimu kudzimu ha ku na u nga ku misa. Nkololo we Ndzimu wa ka gwisana na Satani ne ba mile naye ne ku ba lashila mu shango. (Zumbunulo 12:9-12) Ku kumbila kukwe kwe butatu mu ntembezelo iwoyo, se kwe kutanga ne kwe bubili, ko ti batsha kuti ti lingise nkumbulo mu na chi no sheteka kwazo ku si ku da kwedu ngono kwe Ndzimu. Wu da kukwe ku no zhisila bathu ba a ka bumba chingwe ne chingwe cha ka lulwama. Ngono nlume wa ka zwilizanila Jesu wa kati ku na Tate babe: “Koga kusi nge kuda kwangu, ngakushingwe kuda kwenyu.”​—Luka 22:42.

“Mutipeni nasi zojiwa zwedu.”

Ku dwapo Jesu u no lakidza kuti mitembezelo yedu ya ka fanila kumbila zwithu zwa ti no sheta. A ku te ku li phoso ku tembezela Ndzimu ne kwe zwithu zwa ti no sheta zhuba ne zhuba. Ha ti thama ti jalo, ko ti kumbudza kuti Jehova ndiye “unopa butjilo ne meya inofemiwa ne tjimwe ne tjimwe ku mmwe ne mmwe.” (Mishingo 17:25) Baibili i no lakidza kuti i nzwadzi u no shathila ku pa bana babe chingwe ne chingwe cha ba no sheta. Se nzwadzi wa ka lulwama, ha nga pe bana babe zwithu zwi sa ka ba lulwamila mu buchilo.

“Mutizwiibhatigwe milandu yedu.”

A u na chingwe cha u sa ka thamila Ndzimu zwibuyanana? A u no shaka kuti a ku zwibatigwe? Bathu banjinji ha ba to ziba kuti chibi ini ne kuti chikulu ku ngapani. Baibili i no ti diya kuti chibi ndicho chi no ti thamila mathatha makulu, ne kuti ndicho cha ka thama kuti bathu ba fe. Ne kuti ta ka zwaligwa mu chibi, to thama zwibi mazhuba wose, ngono ku ti be ne buchilo gu no zha gwa ka pelela, to sheta mazwibatigwa e Ndzimu. (Baroma 3:23; 5:12; 6:23) Ko shathisa ku ziba kuti Baibili i no ti: “Ngobe imwi, imwi She, makalulwama kakale mozwiibhatigwa.”​—Pisalema 86:5.

“Mutisunungule mu bubi.”

A u no yelenjela se kwa u sheta ku bakiligwa ne Ndzimu kwa ka pelela. Bathu banjinji ha ba to duma kuti Satani ‘mbimbi’. Ngono Jesu wa ka diya kuti Satani u yapo, a ka buya a ka ndana e ti: “mbusi we shango.” (Johani 12:31; 16:11) Satani wa ka chinya shango iyeyi ya a no lawula, ngono u no shaka ku chinya nkumbulo uwo kuti u si be pejo na Tate babo Jehova. (1 Pita 5:8) Ne kwa ka jalo, Jehova u na masimba a no pinda a Satani ngono u no shathila ku bakilila bathu ba no nda.

Ntembezelo Jesu wa a ka diya bathu, ha u to leba chingwe ne chingwe chi nga tembezelegwa. Kumbula kuti, 1 Johani 5:14 i no ti diyani ne kwe Ndzimu: “Tjimwe ne tjimwe tjatinokumbila nge kuda kwawo, unotihwa.” Ngono u si tongo kumbula kuti mathatha awo matukununu kwazo kwa a si ngake a ka hwiwa ne ku Ndzimu.​—1 Pita 5:7.

Ku yingwi ne kwe ndawo, ne kwe chibaka cha ti no tembezela nacho? A i chithu chikulu kuti to tembezela lini ne kuti to tembezelela ngayi?

HA KU to chenamisa kuti wa ka bona kuti dzikereke njinji dzo tshambilidza kuti ku tembezelezegwe mu mbako dza ka tini, lini ne ka ngana mu zhuba. A Baibili i no ti ku tembezelegwe ku ngayi ne kuti ka ngana?

Baibili i no lakidza kuti ku na zwibaka zwa ka lulwamila mitembezelo. Wa kati a sathu a ka ja a na badiyiwa babe, Jesu wa ka boka Ndzimu ne ntembezelo. (Luka 22:17) Ngono badiyiwa babe ba ka ti be shangana ku namata, ba ka tembezela ba li bose. Ichecho ya ka be ili chithu cha ka jwayeleka ku thamiwa mu dzi-synagogue dze Bajuta ne mu tempele ku Jerusalema. Ndzimu wa ka thama kuti tempele ibe “ng’umba ye Ntembezelo ye njudzi dzose.”​—Mako 11:17.

Ha balanda be Ndzimu be shangana ne ku tembezela ba li bose, mitembezelo yabo ino hwika. Ha be tembezela ba li chithu chi ngompela ngono mitembezelo iyeyo i dumana ne hwalo, Ndzimu u no shatha. Ntembezelo wabo u nga thama kuti Ndzimu a ba pe ne zwa ba sa kumbila dumbu. (Bahebera 13:18, 19) Bafakazi ba Jehova ba no tembezela misi yose ku zwidiyo zwabo zwe gubungano. U no kokiwa ne ludo ku zha ku Holo ye Bushe i pejo nawe ku zwihwigwa mitembezelo ya ka jalo.

Ne kwa ka jalo, Baibili ha i to ti ku be ne ndawo ya ku nga tembezelegwa ku ili koga. Mu Baibili, ko legwa kuti balanda be Ndzimu ba ka be be tembezelela pangwe ne pangwe, mu chibaka chingwe ne chingwe. Jesu wa kati: “Koga ha utembezela, ngina mu ng’umba iyo uzhalile nkoba utembezele kuna Tate babo basingaboneke. Ipapo Tate babo banobona pakasumbikika, banowokupa mbhayilo.”​—Matewu 6:6.

A ichecho ha ti chithu chi no kwebela? U nga lebeleka ne u na Masimba wose mu libumbo chibaka chingwe ne chingwe, u li woga, ngono u bo u themba kuti wa ka ku hwilila. A ku to chenamisa ku be Jesu a ka be e tembezela a li yega! Mu chibaka chingwe wa ka tembezela Ndzimu busiku gose, e kumbila butungamili mu thambo wulu dza a ka be e tola.​—Luka 6:​12, 13.

Balume ne bakadzi bangwe mu Baibili ba ka be tembezela ha be tola thambo wulu kene ba ka lingisana ne mathatha makulu. Mu zwibaka zwingwe ba ka be tembezelela pezhugwi mu zwingwe be tembezelela pasi, ba ka be tembezela ba li bose ne ba li boga. Chithu chikulu wu kuti ba ka be be tembezela. Ndzimu u no koka balanda babe e ti: “Mugale mutembezela.” (1 Bathesalonika 5:17) Wa ka zwimisila ku hwilila bose ba no thama ku da kukwe. A ikoko ha te ku koka ku na ludo?

Dumbu ngwenu, bathu ba no bilayela ba nga zwibuzwa kuti dumbu ntembezelo u na mbayilo upi. U ngana u ka zwibuzwa kuti: ‘A dumbu u nga ndi batsha?’

A NTEMBEZELO u nga ti batsha? Baibili i no lakidza kuti kwa ka jalo, mitembezelo ye balanda be Ndzimu ba no thembeka i no ba batsha. (Luka 22:40; Jakuba 5:13) Dumbu, ntembezelo u nga ti batsha ku be pejo ne Ndzimu, mu mazwiwo ne mu mamuko edu. Chini?

A ti ti u na ngwana u no piwa chipo. A u nga ndiya kuti kwa ka fanila kuti a boke? kene u no ndiya kuti a boke? Ha ti thama kuti zwithu zwikulu zwa ti no kumbula ti zwi lebe, to thama kuti zwi shinge ne ku ti simisa. A ichecho ndicho cha ti no thama ha ku zha mu ku lebeleka ne Ndzimu? Kwa ka jalo! Bona zwilakizilo zwingwe yezo.

Mitembezelo ye ku boka. Ha ti boka Tate bedu mu zwithu zwa ka naka zwa ba no ti thamila izo, to be ti lingisa nkumbulo wedu mu zwithu zwa ba no ti kombolela mu zwili. Ikoko ko pelelela ne kuti ti boke, ti shathe ne ku be ne nkumbulo wa ka lulwama.​—Bafilipi 4:6.

Ha ti lakidzila: Jesu wa ka boka Tate babe mu zila ya ba ka dabila mitembezelo iye nayo.​—Johani 11:41.

Mitembezelo ye ku kumbila mazwibatigwa. Ha ti kumbila kuti Ndzimu a ti zwibatigwe, to simisa chikumbuludzi chedu, ku shanduka kwedu, ne ku paphidza ku yelanjele kwedu bukulu gwe chibi. To tugwa ntolo we ku zwibona nlandu.

Ha ti lakidzila: Dafite wa ka tembezelela kuti a shanduke ne ku tugwa ntolo we chibi.​—Pisalema 51.

Mitembezelo ye ku piwa buchenjedu ne ku butungamili. Ha ti kumbila Jehova kuti a ti pe buchenjedu, ta ka fanila ku tola thambo dza ka lulwama dzi nga ti batsha kuti ti be bathu ba no zwiyesa pasi kwa ka pelela. Ku nga ti batsha ku ziba pa ti no pelela ne ku kudza ku themba kwedu Tate bedu ba kudzimu.​—Zwiani 3:5, 6.

Ha ti lakidzila: Solomoni wa ka zwiyesa pasi mu ku kumbila butungamili ne buchenjedu gwe ku busa Iziraela.​—1 Boshe 3:5-12.

Mitembezelo ye ha ti na mathatha. Ha ti zhulila Ndzimu mimoyo yedu ha ti na mathatha e mazwiwo, mimoyo yedu i no gadzikana ngono towo biga chingwe ne chingwe mu na Jehova pa na kuti ti bige chingwe ne chingwe mu tili.​—Pisalema 62:8.

Ha ti lakidzila: She Asa wa ka tembezela mu chibaka cha a ka be a ka lingisana ne chita cha ka sima.​—2 Shingikalo 14:11.

Tembezelela zwi no shetiwa ne bangwe. Mitembezelo ya ka jalo i no thama kuti ti si zwikumbulile ti li toga ngono ti kumbulile bangwe ne ku ba hwila ngoni.

Ha ti lakidzila: Jesu wa ka tembezelela badiyiwa babe.​—Johani 17:9-17.

Mitembezelo ye ku kudza Ndzimu. Ha ti kudza Jehova mu mishingo iye i no chenamisa ne buthu gugwe, ku nhlonipha ne ku ntolela pezhugwi kowo kula. Mitembezelo iyeyi i nga ti batsha kuti ti be pejo ne Ndzimu Tate bedu.

Ha ti lakidzila: Dafite wa ka kudza Ndzimu mu zwithu zwa a ka bumba.​—Pisalema 8.

Mbayilo ungwe u no yendidzana ne ntembezelo wu kuti “kunyalala kwe Ndzimu kopinda hwisiso yose.” (Bafilipi 4:7) Ku galamoyo mu shango iyeyi ya ka bipa i chithu chi si nga bongwe bulelu. Kakale ku na mamuko a ka naka. (Zwiani 14:30) Ngono a ko zwizhisila koga ne bukhoni gwedu? Kene ku na chingwe chikulu chi no sheteka?

Buzo iyeyi i no thama kuti bathu ba shathe kwazo ne ku da ku ziba. Baibili i no lakidza kuti Jehova u no teedza mitembezelo ngwenu. Kuti u no hwa mitembezelo yedu kene ha a to i hwa ku mu tili.

Jesu wa ka chemela batungamili be budumili ba ka be be tembezela ne zila ye ku zwinyanyayidza; ba ka be be lakidza ndulamo yabo ne ku zwitolela pezhugwi koga. Jesu wa ka ti balume ibabo ba nowo “amutjila mbhayilo wabo,” e dwa kuti ba no amuchila koga, icho cha ba no shaka ku kudziwa ne bathu, i si cha ba no sheta ku hwa Ndzimu. (Matewu 6:5) Ne zila i no fanana ngwenu, bathu ba no tembezela ku yenda ne ku da kwabo ku si ku da kwe Ndzimu. Be lambana ne milayontewo ye Baibili ya ta tongo leba ne kwayo, ha ba to shaka teedza Ndzimu.

Ku yingwi ne kuko? Ndzimu u no hwa ne ku dabila mitembezelo iyo? Dabilo ha i to dwa mu kuti u we ludzi gupi, ichaba chipi, kene mamo a ka tini. Baibili i no ti thembesa i ti: “Ndzimu autoshalaula. Koga mu njudzi dzose, mmwe ne mmwe unotja Ndzimu ethama tjakalulwama, Ndzimu unon’amutjila.” (Mishingo 10:34, 35) A matama iyawo a no leba cha u li icho? Ha ili kuti u no da Ndzimu, u no ntolela pezhugwi kwazo, u cha ku nhwisa zogwadza. Ha u thama cha ka lulwama, u no shaka kuti u thame chi no diwa ne Ndzimu mu kuti u thame chi no diwa nawe kene chi no diwa ne bathu. A u no shaka dumbu kuti Ndzimu a teedze mitembezelo iyo? Baibili i no ku lakidza kuti u nga thama chini kuti u dabigwe ne Ndzimu.a

Kwa ka jalo bathu banjinji ba no shaka kuti Ndzimu a dabile mitembezelo yabo ne zila i no chenamisa. Ne mu chibaka che ku kwagwa kwe Baibili, Ndzimu wa ka be e so dabila mitembezelo ne zila i no chenamisa mu zwibaka zwingwe. Mu zwibaka zwingwe kwa ka be ku pinda makole manjinji ku sina jenamiso la shingikala. Pezhugwi kwa ikoko, Baibili i no lakidza kuti ku shinga zwithu ne jenamiso kwa ka pela shule kwe mazhuba e baapostolo. (1 Bakorinta 13:8-10) A ichecho cho dwa kuti Ndzimu ha a to dabila mitembezelo ngwenu? A ku zo jalo! Bona mitembezelo ingwe ya a no dabila.

Ndzimu u no pa bunchenjedu. Buchenjedu gose gwe malebeswa go dwa ku na Jehova. Ha a to gu nyima bathu, u no gu pa ba no shaka butungamili gugwe ne ba no shaka chila nago.​—Jakuba 1:5.

Ndzimu u no pa bathu babe meya dza ka yengemala kuti dzi ba batshe. Meya dza ka yengemala i masimba e Ndzimu a no shinga. Ha ku na masimba a no pinda iyawo. A nga ti batsha kuti ti mililane ne dzindiko. A nga ti pa mbakiso ha ti khathazeka. A nga ti batsha kuti ti be ne buthu gwa ka lulwama gu no amuchiligwa. (Bagalatiya 5:22, 23) Jesu wa ka thembesa badiyiwa babe kuti Ndzimu ha a to nyima bathu chipo ichechi.​—Luka 11:13.

Ndzimu u no diya bose ba no nshaka ne malebeswa. (Mishingo 17:26, 27) Ku na batho mu shango yose ba no shaka malebeswa. Ba no shaka ziba Ndzimu​—zina lile, mazwimisilo awe ne kwe shango ne bathu, ne se kwa ba nga be pejo naye. (Jakuba 4:8) Bafakazi ba Jehova ba no shangana ne bathu ba ka jalo ngono ba no shathila ku dabila buzo dza ka jalo ku dwa mu Baibili.

A ndicho cha ka thama kuti u amuchile magazini iwoyo? A u no shaka ku ziba ne kwe Ndzimu? Pangwe ndiko se kwa e shaka ku dabila mitembezelo iyo.