THUTO 15
Ini wa ka Fanila ku Dwilila u Zwidiya?
1. Ku dwilila u zwidiya Baibili kowo ku batsha chini?
Malebeswa hwuti, ku zwidiya zwidiyo zwe Baibili zwe ntewo ne zila iyeyo kwa ka simisa ludo gugo mu na Jehova. Ludo igogu go sheta ku dwilila gu simisiwa. (1 Pita 2:2) Ku lingilila mbeli kuko mu ku bona buchilo gu singa pele, ko dwa mu kuti u nowo dwilila u li pejo na Jehova ne ku zwidiya Dama lile.—Bala Johani 17:3; Juta 21.
Ha lizibo gugo mu Ndzimu gu kula, ku galamoyo kuko kowo sima. Ku galamoyo kuko mu Ndzimu kowo thama kuti u nshathise. (Bahebera 11:1, 6) Kowo thama kuti u zwibone nlandu ne ku zwibata ne zila ya ka lulwama mu buchilo gugo.—Bala Mishingo 3:19.
2. Lizibo gugo ne kwe Ndzimu gowo batsha bangwe chini?
U nga wanana kwazo kwazo na Jehova
Ko shingikala koga kuti u budze bangwe cha wa zwidiya—tose to shathila ku lebeleka ne kwe ndebo mbuya. Ha u dwilila u zwidiya Baibili, u nowo bona kuti u nga shingisa Baibili chini, ku chenesa ku galamoyo kuko muna Jehova ne mu ndebo mbuya.—Bala Baroma 10:13-15.
Bunji go tangisa ku budza bakhwinya ne makamu ne kwe ndebo mbuya. Shingisa buchenjedu. Mu bumo gwe ku ba budza kuti bodumili gwabo ha gu to diya malebeswa, ba budze ne kwe thembiso dza Ndzimu. Kumbula, mu zwibaka zwi njinji bathu ba no khatiwa kwazo ne butho gugo mu bumo gwe cha u no leba.—Bala 2 Timoti 2:24, 25.
3. U nga shingidzana chini ne Ndzimu kuti u shathe?
Ku zwidiya Dama le Ndzimu kowo ku batsha kuti u be pejo naye. Gu bupelo u nga na u ka wanana kwazo kwazo na Jehova. U nowo be nngwe we be nsha uwe.—Bala 2 Bakorinta 6:18.
4. U nga dwilila u li pejo na Jehova chini?
U nga be pejo kwazo na Jehova ha u dwilila u zwidiya Baibili. (Bahebera 5:13, 14) Kumbila nngwe we Bafakazi ba Jehova ku zwidiya Baibili nawe mu shingisa buka ye What Can the Bible Teach Us? Ha u zwidiya kwa ka paphidzika mu Dama le Ndzimu buchilo gugo gowo yenda zubuyanana.—Bala Pisalema 1:1-3; 73:27, 28.
Ndebo mbuya dzo dwa ku na Jehova, Ndzimu wa ka shatha. U nga be pejo kwazo naye ha u li pejo kwazo ne bathu babe. (Bahebera 10:24, 25) Ha u dwilila u thama kose kwa u nga khona ku shathisa Jehova, u mu zila ye ku bona buchilo dumbu –buchilo gu singa pele. Ku be pejo na Jehova i chithu chino zwi pinda zose mu na zwa u nga thama.—Bala 1 Timoti 1:11; 6:19.