Bushe Gwe Ndzimu Ini?

Shathila Buchilo Cha Chose!—Zwidiyo Zwe ku Batshana ku Zwidiya Baibili
- THUTO 31
  
  Bushe Gwe Ndzimu Ini?
  Khani wulu mu Baibili ndi ye Bushe gwe Ndzimu. Jehova u nowo shingisa Bushe ku shingikadza mazwimisilo awe e kutanga ne kwe shango. Bushe gwe Ndzimu ini? To ziba chini kuti go busa ngwenu? Ngono gwa ka chi thamani kale? Kakale gowo thamani mu chibaka chi no zha? Buzo idzedzi dzowo dabigwa mu thuto iyeyi, ne mu thuto mbili dzi no tobela.
  
  1. Bushe gwe Ndzimu ini, kakale She wago ndi yani?
  
  Bushe i mbuso wa ka thamiwa na Jehova Ndzimu. Jesu Kirisiti, She we Bushe igogu u no busa ali kudzimu. (Matewu 4:17; Johani 18:36) Baibili ikati ne kwa Jesu: “Unowobusa nge kusingapele.” (Luke 1:32, 33) Se She we Bushe gwe Ndzimu, Jesu u nowo busa nngwe ne nngwe mu shango.
  
  2. Ndi boyani ba no busa na Jesu?
  
  Jesu ha a to busa ali yega. “Bathu kudwa mu ludzi gumwe ne gumwe ne mu lulimi gumwe ne gumwe ne mu bathu bamwe ne bamwe ne mu tjaba dzose . . . banowobusa mu shango.” (Zumbunulo 5:9, 10) Bathu ba nowo busa na Kirisiti ba nowo be bali ba ngana? Chinga kwa Jesu a ka zha mu shango, dzimiliyoni dze Bakirisiti dza ka be batobeli babe. Ngono ndi bali 144 000 koga ba no yenda kudzimu ku no busa na Jesu. (Bala Zumbunulo 14:1-4.) Bakirisiti bangwe bose mu shango ba nowo be be busiwa ne Bushe gwe Ndzimu.—Pisalema 37:29.
  
  3. Ini Bushe gwe Ndzimu gu pinda mibuso ye bathu?
  
  Nenguba babusi be bathu be lika ku thama zwithu zwa ka lulwama, ha ba na masimba e ku thama chingwe ne chingwe cha ba no shaka. Ba no pelela ba dusiwa ne bangwe, ngono naibo ba ngana ba ka lashilila bathu ba ba no busa. Ngono a kuna u nga dusa Jesu, She we Bushe gwe Ndzimu, mu bumo gugwe. Ndzimu wa ka tangisa “mbuso usitongoti ulipo ukakolomogwa.” (Daniele 2:44) Jesu u nowo busa shango yose, ngono ha a nga shalule kene ku tolela bangwe pezhugwi ku pindisa bangwe. U na ludo, buthu, ne ndulamo, kakale u nowo diya bathu kuti ba batane ne zila ya ka jalo—ne ludo, buthu, ne ndulamo.—Bala Izaya 11:9.
  ZWIDIYE KWA KA NGINILILA
  
  Bona kuti ini Bushe gwe Ndzimu guli butuka mu mibuso ye bathu.
  
  4. Mbuso u na masimba u nowo busa shango yose
  
  Jesu Kirisiti u na masimba a no pinda e babusi bose mu histori. Bala Matewu 28:18, mu be mu lebesana ne kwe buzo i no tobela:
  
  Ndaulo ya Jesu i no pinda ye babusi bose be shango chini?
  
  Mibuso ye bathu i no gala i shanduka, ngono mbusi nngwe ne nngwe u no busa shango ya ali mu ili, isini shango yose. Ti nga tini ne kwe Bushe gwe Ndzimu? Bala Daniele 7:14, mu be mu lebesana ne kwe buzo dzi no tobela:
  
  Ini kwa ka lulwama kuti Bushe gwe Ndzimu “agutowofa gwakolomogwa”?
  
  Ini ili chithu cha ka lulwama kuti gowo busa shango yose?
  
  5. Mibuso ye bathu ya ka fanila ku dusiwa
  
  Ini Bushe gwe Ndzimu gwa ka fanila ku dusa mibuso ye bathu? Zana VIDIYO,mu be mu lebesana ne kwe buzo i no tobela.
  
  VIDIYO: Bushe Gwe Ndzimu i ni?—Ipithu (1:41)
  
  Mibuso ye bathu ya ka thamani?
  
  Bala Nreri 8:9, mu be mu lebesana ne kwe buzo dzi no tobela:
  
  A u no kumbula kuti mibuso ye bathu ya ka fanila ku misigwa ne Bushe gwe Ndzimu? Ini u jalo?
  
  6. Babusi be Bushe gwe Ndzimu ba no ti hwisisa
  
  Ne kuti She wedu Jesu, wa ka tongo chila ali nthu, u no khona “kuhwisisa kusasima kwedu.” (Bahebera 4:15) Jehova wa ka shalula balume ne bakadzi bali 144 000 ba no thembeka “kudwa mu ludzi gumwe ne gumwe ne mu lulimi gumwe ne gumwe ne mu bathu bamwe ne bamwe ne mu tjaba dzose” ku busa na Jesu.—Zumbunulo 5:9.
  
  A no shathisiwa ne ku ziba kuti Jesu ne ba a no busa nabo ba no ziba kuti buchilo gwe nthu gwa ka tini? Ne kutini?
  
  Jehova wa ka shalula balume ne bakadzi ku dwa mu zwichaba zwa ka siyasiyana ku busa na Jesu
  
  7. Milayo ye Bushe gwe Ndzimu i pezhugwi kwe ye mibuso ye bathu
  
  Mibuso i no thama milayo ku batsha ne ku bakilila bathu bayo. Ne zila i no fanana, Bushe gwe Ndzimu gu na milayo ya ka fanila ku tobegwa ne ba no busiwa nago. Bala 1 Bakorinta 6:9-11, mu be mu lebesana ne kwe buzo dzi no tobela:
  
  U no kumbula kuti kowo be kuli chani ha nngwe ne nngwe e tobela milayo ye Ndzimu ye mazwibato?a
  
  A u no kumbula kuti ko hwika ku be Jehova a ka lingilila kuti ba no busiwa ne Bushe gwe Ndzimu ba tobele milayo iyeyi? Ne kutini?
  
  Ini chi no lakidza kuti bathu ba si nga tobele milayo iyeyi ba nga shanduka?—Bona ndimana 11.
  
  Mibuso i no thama milayo ku batsha ne ku bakilila bathu bayo. Bushe gwe Ndzimu gu na milayo i pezhugwi kwe ye mibuso ye bathu, i no batsha ne ku bakilila bathu bago
  
  UNGWE U NGANA A KATI: “Bushe gwe Ndzimu ini?”
  
  U nga dabila chini?
  CHA WA ZWIDIYA
  
  Bushe gwe Ndzimu i mbuso dumbu u kudzimu, u nowo busa shango yose.
  
  U Nga Tini?
  
  Babusi be Bushe gwe Ndzimu ndi boyani?
  
  Bushe gwe Ndzimu go pinda mibuso ye bathu chini?
  
  Jehova wa ka lingililani mu bathu ba nowo busiwa ne Bushe gwe Ndzimu?
  
  Thuto ya pela ne:
  
  Zwimisile
  Ku bala ne kwe bubusi gwa Jesu mu na Izaya 11:1-10 ku bona kuti ha gu to fanana chini ne mibuso ye bathu.
  
  Ne:
  Your other goal
  
  SHAKISISA
  
  Bona kuti Jesu wa ka diyani ne kwe kuti Bushe gwe Ndzimu gu ngayi.
  
  “A Bushe Gwe Ndzimu gu mu Moyo Uwo?” (Web article)
  
  Ini Bafakazi ba Jehova be themba Bushe gwe Ndzimu mu bumo gwe ku themba ku busa kwe bathu?
  
  Ku Themba Kwa ka Pelela Bushe Gwe Ndzimu (1:43)
  
  Bona kuti Baibili i no tini ne kwe bali 144 000 ba ka shalugwa na Jehova ku busa na Jesu.
  
  “Ndi Boyani ba no Yenda Kudzimu?” (Web article)
  
  Ini cha ka thama kuti nkadzi u mu jele a dume ne buzhalo kuti Ndzimu ndiye koga u nga zhisa ndulamo mu shango?
  
  “Se Kwa Nda ka Ziba Malebeswa ne kwe ku sa be ne Ndulamo” (Mukani!, November 2011)
  a Kowo lebgwa ne kwe milayo iyeyi ye mazwibato mu Ipithu 3.

Bushe Gwe Ndzimu go Busa Ngwenu!

Shathila Buchilo Cha Chose!—Zwidiyo Zwe ku Batshana ku Zwidiya Baibili
- THUTO 32
  
  Bushe Gwe Ndzimu go Busa Ngwenu!
  Bushe gwe Ndzimu gwa ka tangisa ku busa kudzimu ne 1914. Kakale mazhuba e bupelo nthu e busa a ka tangisa mu gole ilelo. To ziba chini? Bona buporofiti gwe Baibili, chi no shingikala mu shango, ne mazwibato e bathu, ku tangisa ne 1914.
  
  1. Buporofiti gwe Baibili go lakidzani?
  
  Buka ye Baibili ya Daniele ya ka lakidza kuti Bushe gwe Ndzimu gowo tangisa ku busa ku bupelo gwe chibaka chi no dangwa “makole [zwibaka] ali kutendeka.” (Daniele 4:16, 17) Mu makole manjinji a ka tobela, Jesu wa ka dana chibaka ichecho eti “tjibaka tjebe Bezwitjaba,” kakale wa ka diya kuti cha ka be chi sathu chi ka pela. (Luka 21:24) Se kwa ti nowo bona, zwibaka zwili kutendeka (7) zwa ka wila mu gole le 1914.
  
  2. Chinga kwa 1914 ko shingikalani mu shango, kakale bathu ba no zwibata chini?
  
  Badiyiwana ba Jesu ba ka mbuzwa beti: “Zwithu izwezwi zowoshingikala lini ne tjilakidzo tje kuzha kwenyu ne tje kupela kwe shango tjowobeni?” (Matewu 24:3) Ya kati e dabila, Jesu wa ka lebela mbeli zwithu zwinjinji zwa ka be zowo shingikala shule kwe ku tangisa kukwe ku busa ali She we Bushe gwe Ndzimu kudzimu. Zwingwe zwe zwa a ka leba ne kwazo zo shanganyila nghwa, bhamba, ne ku tengenyeka kene zunguzika kwe shango. (Bala Matewu 24:7.) Kakale Baibili ya ka lebela mbeli kuti buthu gwe bathu mu “mazhuba e bupelo” gowo zhisa “misi yakabangalala.” (2 Timoti 3:1-5) Mamo iyawa ne buthu gwe bathu, a ka tangisa ku boneka kwazo ne 1914.
  
  3. Ini chimo che shango cha ka chinyika kwazo shule kwe ku tangisa kwe ku busa kwe Bushe gwe Ndzimu?
  
  Shule kwe kuti Jesu a be She we Bushe gwe Ndzimu, wa ka ghwa na Satani ne madimoni awe kudzimu. Satani wa ka kundiwa mu nghwa iyeyo. Baibili ikati wa ka ‘lashigwa pasi mu shango ne batumwa babe bose.’ (Zumbunulo 12:9, 10, 12) Satani u zhele bugali ne kuti u no ziba kuti u nowo chinyiwa. U no dziyidza bathu bose ne ku ba hwisa zogwadza. Ndizo ku si nga chenamise ku bona zwa ka bipa zwi shingikala mu shango. Bushe gwe Ndzimu gowo misa mathatha wose.
  ZWIDIYE KWA KA NGINILILA
  
  Shakisisa kuti to ziba chini kuti Bushe gwa ka tangisa ku busa ne 1914, kakale kuti ichecho cho dwani mu tili.
  
  4. Buporofiti gwe Baibili gu kati, Bushe gwa ka tangisa ne 1914
  
  Zana VIDIYO.
  
  VIDIYO: Bushe Gwe Ndzimu Gwa ka Tangisa ku Busa ne 1914 (5:02)
  
  Ndzimu wa ka thama kuti She Nebukadineza we Bhabhiloni wa ntolo, a wolote ne kwe chi nowo shingikala. Daniele wa ka chenesa kuti mawoloto iyawa, a ka be e leba ne kwe mbuso wa Nebukadineza kakale ne kwe Bushe gwe Ndzimu.—Bala Daniele 4:17.a
  
  Bala Daniele 4:20-26, u bo u shingisa chart ku dabila buzo dzi no tobela:
  
  (A) Nebukadineza wa ka bonani mu mawoloto awe?—Bona ndimana 20 ne 21.
  
  (B) Nti wa ka be wo shingikaligwa neni?—Bona ndimana 23.
  
  (C) Kwa kowo shingikalani mu “makole [zwibaka] ali kutendeka”?—Bona ndimana 26.
  
  Mawoloto ne Kwe Nti a no Yendidzana Chini ne Bushe Gwe Ndzimu?
  
  BUPOROFITI (Daniele 4:20-36)
  
  Mbuso
  
  (A) Nti nkulu
  
  Mbuso wa ka misiwa
  
  (B) “Temani nti,” “kudzina kwapinda makole [zwibaka] ali kutendeka”
  
  Mbuso wa tangisa kakale
  
  (C) “Bushe gwenyu mowogubgwilizigwa”
  
  Mu ku shingikadziwa kwe kutanga kwe buporofiti igogu . . .
  
  (D) Nti wa ka be u milila yani?—Bona ndimana 22.
  
  (E) Mbuso wa ka misiwa chini?—Bala Daniele 4:29-33.
  
  (F) Ini cha ka shingikalila Nebukadineza ku bupelo gwe “makole [zwibaka] ali kutendeka”?—Bala Daniele 4:34-36.
  
  KU SHINGIKADZIWA KWE KUTANGA
  
  Mbuso
  
  (D) Nebukadineza, She we Bhabhiloni
  
  Mbuso wa ka misiwa
  
  (E) Shule kwe 606 B.C.E., Nebukadineza u no penga, ngono e be e kongwa ne ku busa ne makole ali 7
  
  Mbuso wa tangisa kakale
  
  (F) Nebukadineza wa chi pola ngono u no tangisa ku busa kakale
  
  IMu ku shingikadziwa kwe bubili kwe buporofiti igogu . . .
  
  (G) Nti wa ka be u milila yani?—Bala 1 Shingikalo 29:23.
  
  (H) Mbuso wabo wa ka misiwa chini? To ziba chini kuti wa ka be u cha ka misiwa ha Jesu ali mu shango?—Bala Luka 21:24.
  
  (I) Mbuso iwoyi wa ka tangisa kakale lini, na ngayi?
  
  KU SHINGIKADZIWA KWE BUBILI
  
  Mbuso
  
  (G) Boshe be Iziraela ba no milila mbuso we Ndzimu
  
  Mbuso wa ka misiwa
  
  (H) Ku chinyiwa kwe Jerusalema, ko misa ku tobelana kwa boshe be Iziraela mu makole ali 2 520
  
  Mbuso wa tangisa kakale
  
  (I) Jesu u no tangisa ku busa kudzimu ali She we Bushe gwe Ndzimu
  
  Zwibaka zwili kutendeka zo milila chibaka chingapani?
  
  Ndimana dzingwe dze Baibili dzo ti batsha ku hwisisa dzingwe. Ha ti lakidzila, buka ye Baibili Zumbunulo, ikati makole kene zwibaka zwili zwitatu ne gaswa (3 1⁄2) zo lizana ne mazhuba ali 1 260. (Zumbunulo 12:6, 14) Zwibaka zwili zwitatu ne gaswa zo ngina kabili mu zwibaka zwili kutendeka, kene mazhuba ali 2 520. Mu zwingwe zwibaka Baibili i no shingisa zhuba ku milila gole. (Ezekieli 4:6) Kwa ka jalo ne kwe zwibaka zwili kutendeka zwa ka lebgwa mu buka ya Daniele—zo milila makole ali 2 520.
  5. Kutangisa ne 1914 shango ya ka shanduka
  
  Zana VIDIYO.
  
  VIDIYO: Kutangisa ne 1914 Shango ya ka Shanduka (1:10)
  
  Jesu wa ka lebela mbeli chi nowo shigikala mu shango shule kwe kuti a be She. Bala Luka 21:9-11, mu be mu lebesana ne kwe buzo i no tobela:
  
  I zwithu zwipi zwa lakidziwa mu ndimana iyeyi, zwa wa ka bona kene hwa ne kwazo?
  
  Mpostolo Paulo wa ka leba kuti bathu ba nowo be ba ka tini mu mazhuba e bupelo e ku busa kwe nthu. Bala 2 Timoti 3:1-5, mu be mu lebesana ne kwe buzo i no tobela:
  
  A wa ka tongo bona bathu be zwibata ne zila ya ka jalo ngwenu?
  
  6. Ku busa kwe Bushe gwe Ndzimu ko ti sendedzela
  
  Bala Matewu 24:3, 14, mu be mu lebesana ne kwe buzo dzi no tobela:
  
  I nshingo upi u no tolegwa pezhugwi u no lakidza kuti Bushe gwe Ndzimu go busa?
  
  U nga batsha chini mu nshingo iwoyo?
  
  Bushe gwe Ndzimu go busa ngwenu, ngono go dwa gu busa shango yose mu chibaka cha swika. Bala Bahebera 10:24, 25, mu be mu lebesana ne kwe buzo i no tobela:
  
  Nngwe ne nngwe wedu wa ka fanila ku thamani ha “zhuba le kuzha kwa She losedzela pejo”?
  
  Ha wa zwidiya ne kwe chingwe cha u no ziba kuti chi nga batsha bangwe, u nowo thamani?
  
  UNGWE U NGANA A KATI: “Ini Bafakazi ba Jehova be lebeleka kwazo ne kwe 1914?”
  
  Iwe u nga tini?
  CHA WA ZWIDIYA
  
  Buporofiti gwe Baibili, ku tobelana kwe zwa ka shingikala, ne mamo e shango, zo lakidza kuti Bushe gwe Ndzimu go busa ngwenu. Ku rera ne kwe Bushe ne ku be po mu zwidiyo zwe gubungano ko lakidza kuti to duma kuti go busa.
  
  U Nga Tini?
  
  Kwa ka shingikalani mu bupelo gwe zwibaka zwili kutendeka zwa ka lebegwa mbeli mu buka ye Baibili ya Daniele?
  
  Ini u duma kuti Bushe gwe Ndzimu gwa ka tangisa ku busa ne 1914?
  
  U nga lakidza chini kuti u no duma kuti Bushe gwe Ndzimu go busa ngwenu?
  
  Thuto ya pela ne:
  
  Zwimisile
  Ku fanilika ku be nreri we ndebo mbuya.
  
  Ne:
  Your other goal
  
  SHAKISISA
  
  Bona kuti be histori ne bangwe, ba no tini ne kwe ku shanduka kwe chi no shingikala mu shango ku tangisa ne 1914.
  
  “Ku Bangalala kwe Mazwibato” (Mukani!, April 2007)
  
  Bala se kwa buporofiti gu mu na Matewu 24:14, gwa ka ama buchilo gwe nngwe nlume.
  
  “Nda ka be Ndi Da Baseball ku Pindisa Chingwe ne Chingwe!” (Thungamakole No. 3 2017)
  
  To ziba chini kuti buporofiti gwa ka kwagwa mu na Daniele ndima 4 go lebeleka ne kwe Bushe gwe Ndzimu?
  
  “Bushe Gwe Ndzimu Gwa ka Tangisa ku Busa Lini? (Ipithu 1)” (Thungamakole, October 1, 2014)
  
  Ini chi no lakidza kuti “makole [zwibaka] a li kutendeka” a ka lebgwa mu na Daniele ndima 4 a ka wila ne 1914?
  
  “Bushe Gwe Ndzimu Gwa ka Tangisa ku Busa Lini? (Ipithu 2)” (Thungamakole, November 1, 2014)
  a Bona dzitshambiso mbili dze bupelo mu thuto iyeyi pa ka kwagwa “Shakisisa.”

Bushe Gwe Ndzimu Gowo Thamani?

Shathila Buchilo Cha Chose!—Zwidiyo Zwe ku Batshana ku Zwidiya Baibili

THUTHO 33

Bushe Gwe Ndzimu Gowo Thamani?

Bushe gwe Ndzimu go busa. Mu chibaka chi pejo gowo shandula zwithu ne zila i no chenemisa mu shango. Ima ti lingilile zwingwe zwe zwithu zwa ka lulwama zwa u nga lingilila mu ku busa kwe Bushe gwe Ndzimu.

1. Bushe gwe Ndzimu gowo zhisa chini mbakiso ne ndulamo kakale mu shango?

Jesu, She we Bushe gwe Ndzimu, u nowo chinya bathu ba ka bipa ne mibuso ku nghwa ye Amagedoni. (Zumbunulo 16:14, 16) Mu chibaka ichecho, thembiso iyeyi ye Baibili i nowo be ya shingikadziwa ne buzhalo: mu “tjibakana koga, babi banowobe basitjipo.” (Pisalema 37:10) Jesu u nowo shingisa Bushe kuti ku be ne mbakiso ne ndulamo mu shango yose.—Bala Izaya 11:4.

2. Buchilo gowo be gwa ka tini ha ku da kwe Ndzimu ku shingikadziwa mu shango?

Mu mbuso we Bushe gwe Ndzimu, “balulwami banowothuwa shango bakagala muili nge kusingapele.” (Pisalema 37:29) Kumbula koga u gala mu shango ina bathu bose ba ka lulwama ba no lakidzana ludo kakale be da Jehova! A kuna u nowo gwala, ngono nngwe ne nngwe u nowo chilila chose.

3. Bushe gwe Ndzimu gowo thamani shule kwe ku chinyiwa kwe bathu ba ka bipa?

Shule kwe ku chinyiwa kwe bathu ba ka bipa, Jesu u nowo busa ali She ne makole ali 1 000. Mu chibaka ichecho, iye ne bali 144 000 ba a nowo be e busa nabo, ba nowo batsha bathu mu shango kuti ba zwilizanile, ba sina chibi. Kowoti chibaka ichecho chi pinda, shango yose i nowo be ya chi shanduka ku be paradaisi ya ka naka, ili zhele ne bathu ba ka shatha ne kuti ba nowo be, be tobela milayo ya Jehova. Ku dwa ipapo, Jesu u nowo gwiliza Bushe kuna Tate babe Jehova. Ichecho chowo thama kuti, zina la Jehova “liyengamadziwe” ne zila i sathu ika tongo shingikala. (Matewu 6:9, 10) Kowo boneka dumbu kuti Jehova i Mbusi wa ka lulwama u no da bathu babe. Ku dwa ipapo Jehova u nowo chinya Satani, madimoni, ne bathu bose ba ka shalula ku lamba bulauli gugwe. (Zumbunulo 20:7-10) Mamo e buchilo a ka zwilizanila a nowo zhisiwa ne Bushe gwe Ndzimu kakale a nowo galila cha chose.

ZWIDIYE KWA KA NGINILILA

Bona kuti ini ti nga themba kuti Ndzimu u nowo shingisa Bushe, ku shingikadza thembeso dzose dze Baibili, mu chibaka cha swika.

4. Bushe gwe Ndzimu gowo chinya mibuso ye bathu

“Bathu bakabhatisana kunolema behwisana zogwadza.” (Nreri 8:9) Jehova u nowo shingisa Bushe gugwe ku misa ku sa be ne ndulamo.

Bala Daniele 2:44 ne 2 Bathesalonika 1:6-8, mu be mu lebesana ne kwe buzo dzi no tobela:

Jehova na Jesu ba nowo thamani ne kwe mibuso ye bathu ne batobeli bayo?
Ta zwidiya kuti Jehova na Jesu ba nowo be ba ka tambuka kakale ba ka lulwama. Ini ti themba ichecho?

Jesu e busa paradaisi i mu shango ali She ye bushe gwe kudzimu.

5. Jesu i She i no fanila dumbu

Jesu, She we Bushe gwe Ndzimu, u nowo thama kunjinji ku batsha bathu ba a nowo be e ba busa mu shango. Zana VIDIYO ku bona kuti Jesu wa ka lakidza chini kuti u no shaka ku batsha bathu, kakale u na masimba a a ka piwa ne Ndzimu ku thama e jalo.

VIDIYO: Jesu wa ka Lakidza Kuti Bushe Gwe Ndzimu Gowo Thamani (1:13)

Zwithu zwa ka thamiwa na Jesu ha ali mu shango zo lakidza kuti Bushe gwe Ndzimu gowo thamani. I zwithu zwipi zwi no shathisa zwa ka lakidziwa ipapa zwa wa ka lingilila ku bona zwi shingikala? Bala ndimana dza ka lakidziwa kuti u khone ku hwisisa zwibuyanana zwithu izwezwi zwi no shathisa.

HA ALI MU SHANGO JESU WA KA . . .	HA ALI KU KUDZIMU JESU U NOWO . . .
laula phepo ne liwate.—Mako 4:36-41.	baakanya shango, ya ka chinyiwa ne bathu—Izaya 35:1, 2.
pa dzi-thousand zojiwa ne jenamiso.—Matewu 14:17-21.	pedzisa zhala mu shango.—Pisalema 72:16.
podza bathu banjinji ba ka be be gwala.—Luka 18:35-43.	thama kuti nngwe ne nngwe a zwilizanile a sina bugwele.—Izaya 33:24.
musa bafi.—Luka 8:49-55.	pedzisa magwadzi a no thangwa ne lufu.—Zumbunulo 21:3, 4.

6. Bushe gwe Ndzimu gowo zhisa mbakiso

Bushe gowo shingikadza, Jehova cha a ka be a ka zwimisila ku chi thamila bathu gwe kutanga. Bathu ba nowo chilila chose mu shango ye paradaisi. Zana VIDIYO ku bona kuti Jehova u no shingisa Jesu chini ku shingikadza mazwimisilo awe.

VIDIYO: Ku Lingilila ku Shango i no Shathisa (4:38)

Bala Pisalema 145:16, mu be mu lebesana ne kwe buzo i no tobela:

Ku ziba kuti Jehova u nowo “gutsha njemulo dze zose zwinotjila,” ko thama kuti u zwiwe chini?

BATHU BANGWE BA KATI: “Ha ti shingidzana tose, ti nga misa mathatha a mu shango.”

Bushe gwe Ndzimu gowo misa mathatha api, a ka kona mibuso ye bathu?

CHA WA ZWIDIYA

Bushe gwe Ndzimu gowo thama chi no shakiwa ne Ndzimu. Gowo shandula shango yose kuti i be paradaisi i na bathu ba ka lulwama, ba nowo be be namata Jehova ne ku singapele.

U Nga Tini?

Bushe gwe Ndzimu gowo yengemadza zina la Jehova chini?
Ini ti nga duma kuti Bushe gwe Ndzimu gowo shingikadza cha ka thembesiwa ne Baibili?
Ini cha wa ka lingilila kwazo chi nowo shingakadziwa ne Bushe?

Ipithu ichechi cha pela ne:

Zwimisile

Ku shingisa phephana li noti Bushe Gwe Ndzimu Ini? ku tangisa ndebeleko.

Ne:

Your other goal