THUTO 19
A Bafakazi ba Jehova i Bakirisiti be Malebeswa?
Se Bafakazi ba Jehova, to duma kuti ti Bakirisiti be malebeswa. Ini ti jalo? Bona kuti cha ti no dumila cha ka teyiwa muni, zina la ti no tolela pezhugwi la ti no dangwa nalo, ne ludo gwa ti nago mu bangwe.
1. Chi no dumigwa ne Bafakazi ba Jehova cha ka teyiwa muni?
Jesu wa kati: “Dama [le Ndzimu] li malebeswa.” (Johani 17:17) Sa Jesu, Bafakazi ba Jehova ba no dumila chi mu Dama le Ndzimu. Bona se kwa ba ka thama be jalo mu histori ya ngwenu. Mu bupelo gwe makole e bo 1800, gubungano le badiyiwana be Baibili la ka lingisisa kwazo chi no diyiwa ne Baibili. Ba ka dumila muna cha i no leba, nenguba ichecho cha ka be chi si nga yendidzane ne zwidiyo zwe dzikereke. Shule kwa ikoko, ba ka tangisa ku budza bangwe cha ba zwidiya.a
2. Ini ti zwidana Bafakazi ba Jehova?
Jehova u no dana ba no nnamata eti Bafakazi babe ne kuti ba no budza bangwe malebeswa ne kukwe. (Bahebera 11:4–12:1) Ha ti lakidzila, ku dwa ntolo, Ndzimu wa ka dwa bathu babe eti: “Mu batendeki [bafakazi] bangu.” (Bala Izaya 43:10.) Jesu u no dangwa “ntendeki [nfakazi] unogalikabgwe.” (Zumbunulo 1:5) Ndizo, ne 1931 ta ka tangisa ku dangwa Bafakazi ba Jehova. To shathila ku dangwa ne zina ileli.
3. Bafakazi ba Jehova ba no yedza Jesu chini?
Jesu wa ka be e da badiyiwana babe kwazo, mu nli ya ka be i ngati ndi be nsha uwe. (Bala Mako 3:35.) Ne zila i no fanana, Bafakazi ba Jehova i nsha we shango yose wa ka batana. Ndizo ti danana titi nzwalani ne azwadzi. (Filimoni 1, 2) Kakale to tobela ndaulo i noti: “Mude zwikamu [zose] mubudumili.” (1 Pita 2:17) Bafakazi ba Jehova ba no lakidza ludo ne zila dzinjinji, dzi nonga ku batsha ba ti no namata nabo mu shango yose ha be sheta batsho.
ZWIDIYE KWA KA NGINILILA
Lingisisa kwazo histori ye Bafakazi ba Jehova, kakale u bone bufakazi gwa ka paphidzika gwe kuti ti Bakirisiti be malebeswa.
Bakirisiti be malebeswa ba no dumila chi mu Baibili ne ku chi diya bangwe
4. Cha ti no dumila cho dwa mu Baibili
Jehova wa ka lebela mbeli kuti luzibo gwe Baibili gowo chenesiwa. Bala Daniele 12:4, mu be mu lebesana ne kwe buzo i no tobela:
Ini chi no “wanda” mu bathu be Ndzimu ha be dwilila be shakisisa chi mu Baibili?
Bona se kwa gubungano le badiyiwana be Baibili, ku shanganyila Charles Russell, ba ka zwidiya Dama le Ndzimu. Zana VIDIYO, mu be mu lebesana ne kwe buzo i no tobela.
Mu vidiyo, Charles Russell ne badiyiwana naye be Baibili ba ka zwidiya Baibili chini?
A wa gala u ziba?
Mu zwingwe zwibaka, ta ka shandula zwa ta ka be ti dumila. Ne kutini? Koga se kwa zhuba li no buda li bonesa chedza chi no paphidzika ku swikila masikati, Ndzimu u no paphidza ku hwisisa kwedu chi mu Dama lile mu ku yenda kwe chibaka. (Bala Zwiani 4:18.) Nenguba chi mu Baibili chi si nga shanduke, to shandula cha ti no diya ha ti hwisisa kwa ka paphidzika chi mu Baibili.
5. To chila ku dumilana ne zina ledu
Ini ta ka shalula zina Bafakazi ba Jehova? Zana VIDIYO, mu be mu lebesana ne kwe buzo i no tobela.
Ini zina Bafakazi ba Jehova li fanila?
Ini Jehova a ka shalula bathu ku be bafakazi babe? Ne kuti ba nowo lakidza kuti ndiye Ndzimu we malebeswa, nenguba kwa ka lebgwa manyepkhwa manjinji ne kukwe. Lingilila manyepkhwa mabili a ka lebgwa.
Dzikereke dzingwe dzo diya ba no dzi ngina kuti Ndzimu u no shaka kuti ba shingise zwitshwantsho mu ku nnamata. Ne kwa ka jalo, bala Lifitiko 26:1, mu be mu lebesana ne kwe buzo dzi no tobela:
Baibili i ka tini? Jehova u no zwiwa chini ne kwe midzingwana?
Batungamili be dzikereke dzingwe ba no diya kuti Jesu i Ndzimu. Ne kwa ka jalo, bala Johani 20:17, mu be mu lebesana ne kwe buzo dzi no tobela:
Baibili i ka tini? A Ndzimu na Jesu i nthu u ngompela?
Ku ziba kuti Jehova wa ka tumila Bafakazi ku rera malebeswa ne kukwe ne Nkololo uwe ko thama kuti u zwiwe chini?
6. To dana
Baibili i no fanisa Bakirisiti ne ndungululo dza ka siyasiyana dze mbili we nthu. Bala 1 Bakorinta 12:25, 26, mu be mu lebesana ne kwe buzo dzi no tobela:
Bakirisiti be malebeswa ba ka fanila ku thamani ha bangwe Bakirisiti be dziyila?
Ini cha wa bona ne kwe ludo gu pakati kwe Bafakazi ba Jehova?
Ha Bafakazi ba Jehova be dziyila mu ingwe shango, Bafakazi bangwe mu shango yose ba no ba batsha chinyolocho. Ku bona chilakidzilo, zana VIDIYO. Mu be mu lebesana ne kwe buzo i no tobela.
Batsho ye Bafakazi ba Jehova i no lakidza chini kuti ba na ludo?
Bakirisiti be malebeswa ba no lakidza kuti ba no da bathu ba no sheta
BATHU BANGWE BA KATI: “Bafakazi ba Jehova i kereke iptshwa.”
Jehova wa ka tangisa lini ku dana ba no nnamata eti Bafakazi?
CHA WA ZWIDIYA
Bafakazi ba Jehova i Bakirisiti be malebeswa. Ti nsha we shango yose we ba no namata ba no diya chi mu Baibili, ne ba no zibisa malebeswa ne kwa Jehova.
U Nga Tini?
Ini ta ka shalula zina Bafakazi ba Jehova?
To batana chini?
A u no dumila kuti Bafakazi ba Jehova i Bakirisiti be malebeswa?
SHAKISISA
Zwidiye kwa ka paphidzika ne kwe histori yedu.
Basupi ba ga Jehofa—Ba Bontsha Tumelo ka Ditiro, Karolo 1: Go Tswa mo Lefifing (1:00:53)
Bona chilakidzilo che se kwa Bafakazi ba Jehova ba ka thama kuti zwidiyo zwe manyepkhwa zwi boneke pachena.
Bona dabilo dze buzo dza u nadzo ne kwe Bafakazi ba Jehova.
“Buzo Dzi no Gala Dzi Buzwiwa ne Kwe Bafakazi ba Jehova” (web page)
Stephen wa ka be e shema bathu be dzingwe njudzi kwa a ka be e ba thasela. Bona kuti ini cha a ka bona mu Bafakazi ba Jehova cha ka nshandula.
“Buchilo Gwangu Gwa ka be gu Chinyikila Mbeli” (Thungamakole, July 1, 2015)
a Ku tangisa ne 1879, tshambiso yedu ya ti no shingisa kwazo i noyi, Thungamakole, ya ka dwilila i leba ne kwe malebeswa a mu Baibili.