THUTO 20
Gubungano la ka Longolodziwa Chini?
Jehova ate ili Ndzimu we phiphiti. (1 Bakorinta 14:33) Ndizo ti nga lingilila kuti bathu babe ba be ne ndongoloso. Gubungano le Bukirisiti la ka longolodziwa chini? Ti nga li batsha chini kuti li dwilile zwibuyanana?
1. Nsholo we gubungano ndi yani?
‘Kirisiti i nsholo we gubungano.’ (Baefeso 5:23) Ku dwa kudzimu, u no tungamila mishingo ye bathu ba Jehova shango yose. Jesu wa ka shalula “nlanda unogagwabgwe, wakatjenjela”—gubungano li tukununu le bakugwana ba na chibaka chi lefu be shingila, kakale lo dangwa Gubungano li no Laula. (Bala Matewu 24:45-47.) Se baapostolo ne bakugwana be Jerusalema mu chibaka che Bakirisiti ba ntolo, Gubungano li no Laula lo pa gubungano le shango yose ndayilo. (Mishingo 15:2) Ngono balume ibaba ha te ili batungamili be gubungano. Ba no bala Baibili ku zwidiya ne ku bona kuti Jehova u no shaka kuti ba thameni, kakale ba no zwiyesa pasi kusi kwe bulauli gwa Jesu.
2. Nshingo we bakugwana ini?
Bakugwana i balume be Bakirisiti ba ka kula ba no diya ku dwa mu Hwalo kakale ba no batsha ne ku simisa bathu ba Jehova. Ha ba to ruelegwa nshingo wa ba no thama. Ne kwa ka jalo, ba no shinga ne ku da se “Ndzimu uda kuti [bathame], kusi kwe bugovu gwe mbuzilo.” (1 Pita 5:1, 2) Bakugwana ba no batshiwa ne balanda ba no shingila, ngono shule kwe chibaka, naibo ba nga fanilika ku be bakugwana.
Gubungano li no Laula lo shalula bangwe bakugwana ku be balingilili be poteleko. Ba no kumba kene etela makubungano kuti ba batshe bazwalani ne dziazwadzi ku dwilila be namata Ndzimu ne ku ba simisa. Ba no shingisa Baibili ku bona kuti a ba nga shalula nzwalani ku be nlanda u no shingila kene nkugwana.—1 Timoti 3:1-10, 12; Tito 1:5-9.
3. Nfakazi nngwe ne nngwe u na mazwidabililo api?
Bose mu gubungano ba no ‘kudza zina la Yahwe, Jehova’ ne ku be ne chiabe ku zwidiyo zwe gubungano ne mu nshingo we ku rera se ba nga khona.—Bala Pisalema 148:12, 13.
ZWIDIYE KWA KA NGINILILA
Zwidiye kuti Jesu i ntungamili wa ka tini, se kwa bakugwana be lika ku yedza chilakidzilo chiche, ne se kwa ti nga shingidzana na Jesu ne bakugwana.
4. Jesu i ntungamili u na ludo
Jesu u no ti koka ne zila i no kwebela. Bala Matewu 11:28-30, mu be mu lebesana ne kwe buzo i no tobela:
Jesu u no shaka kuti ti zwiwe chini ne kwe butungamili gugwe?
Bakugwana ba no yedza chini chilakidzilo cha Jesu? Zana VIDIYO.
Baibili i no chenesa zwibuyanana se kwa bakugwana ba ka fanila ku thama nshingo wabo.
Bala Izaya 32:2 na 1 Pita 5:1-3, mu be mu lebesana ne kwe buzo dzi no tobela:
U no zwiwa chini, ku ziba kuti sa Jesu, bakugwana ba ka zwimisila ku batsha bangwe?
Bakugwana ba no yedza Jesu ne zila dzipi dzingwe?
5. Bakugwana ba no diya ne mishingo yabo
Jesu u no shaka kuti bakugwana ba linge mazwidabililo abo chini? Zana VIDIYO.
Jesu wa ka siyila ba no tungamila mu gubungano chilakidzilo. Bala Matewu 23:8-12, mu be mu lebesana ne kwe buzo i no tobela:
Ini cha wa da ne kwe ku sa fanana pakati kwe dzifaniliko dze bakugwana dze Baibili ne cha wa ka bona mu batungamili be dzikereke?
Bakugwana ba na ndongoloso ye ku namata ibo ne be misha yabo
Bakugwana ba no thokomela bose mu gubungano
Bakugwana ba no gala be rera mu zwibaka zose
Bakugwana ba no diya. Kakale ba no batsha ne mingwe mishingo i no lingika isi ya chingwe se ku tshwayila Holo ye Bushe.
6. Ti nga shingidzana ne bakugwana
Baibili i no ti pa libaka gukulu gwe ku shingidzana ne bakugwana. Bala Bahebera 13:17, mu be mu lebesana ne kwe buzo dzi no tobela:
Ini Baibili iti ta ka fanila ku teedza ne ku hwa ba ka tungamila? Ne kutini?
Bala Luka 16:10, mu be mu lebesana ne kwe buzo i no tobela:
Ini ta ka fanila ku tolela pezhugwi ku shingidzana ne bakugwana ne mu zwithu zwi no lingika isi zwe chingwe?
BATHU BANGWE BA KATI: “Ha u to sheta ku be mu gubungano le budumili li na ndongoloso.”
U no kumbula kuti ku namata Ndzimu uli mu gubungano ku nga batsha chini?
CHA WA ZWIDIYA
Jesu ndiye nsholo we gubungano. To shathila ku shingidzana ne bakugwana ba kusi kukwe ne kuti ba no ti batsha ne ku ti diya ne mishingo yabo.
U Nga Tini?
Nsholo we gubungano ndi yani?
Bakugwana ba no batsha gubungano chini?
Mazwidabililo e nngwe ne nngwe u no namata Jehova ndi api?
SHAKISISA
Bona bufakazi gwe kuti Gubungano li no Laula ne bakugwana ba no lakidza kuti ba no amika ne kwe Bakirisiti ngwenu.
Zwidiye ne kwe nshingo u no thamiwa ne balingilili be poteleko.
Bala ne kwe chiabe che bakadzi mu gubungano.
“A Bafakazi ba Jehova ba na Bashingili be Bakadzi?” (Thungamakole, September 1, 2012)
Bona kuti bakugwana ba no shinga kwazo chini ku simisa ba no namata nabo.
“Bakugwana be Bakirisiti—‘Bashingi Naswi ku ti Shathisa’” (Thungamakole, January 15, 2013)