Ibibiliya ilota kutupwashela dashi mushinamilo shetu?

1. Mwaa shani tunkulota namene kulangalalegwa na Nnungu?

Nnungu ankumanya vinu vyoe kutupunda wetu. Nae ni tatamunu wa linagwaledyo na atushunga wetu, na wetu tunkulupila nae pakulota tuvenavo lipuwilo. (Yelemiya 10:23) Kenga momo mwanavalela mwana ndikidiki analoteka kupwashalegwa na tatamunu, wetu yadavo inkutubidi tupate lipwashalelo lya Nnungu. (Ishaiya 48:17, 18) Nnungu ankutupa lipwashalelo alyo kupitila mu Ibibiliya. Yanavo ni shawadi ya Nnungu kwetu wetu.—Shomya 2 Timoti 3:16.

Tukaodyedya malamulo amwe Yeova, tunanama shana nelo, na tunamanya shakwashi shakulota kutenda pakulota tuvenavo lipuwilo wakati wamushu. Nnungu ni atuumbile wetu. Napavedoni, inkutuvaikila twodyedye midimu vyake.—Shomya Dimu 19:7, 11; Maono 4:11.

2. Tulota kutumila dashi Ibibiliya wakati watulota kutenda shinu?

Mu myanda vinji, lilamulo lya mu Ibibiliya linkulula kutumika kwa shinu shimo. (Kumbukumbu 22:8) Kanji, mu myanda vinji, shitangaleka mu Ibibiliya shinkululika kutumika mu vinu vyakuvilingananga. Nadoni, inkutuvaikila shitandi tukumbukile mwashi mwa ilota Ibibiliya kutupwashela kumanya shakwashi shakulota kutenda. (Mikong’o 2:10-12) Kwa mpano, Ibibiliya inkutupundisha kenga shingumi ni shawadi ya Nnungu. Kumanya kwa shinu ashi, kunkulula kutupwashela kuvanavo lishililidyo mu shingumi shetu na shingumi sha vanu vanji. Wetu tunkulula kutenda shinu kenga ashi ku madengo, pakaja petu au mu myanda.—Shomya Vitendo 17:28.

3. Malamulo shani mavili makumene avé mu Ibibiliya?

Yesu andivalanga malamulo mavili makumene. Lilamulo litandi linkulodya tummanye Nnungu, tunnagwaledye na tuntumikile. Ivaikidile tukumbukile shinu ashi muwakati watulota kutenda shinu shoeshoe mu shinamilo shetu. (Mikong’o 3:6) Avika muntima lilamulo ali, anava mbodi wa Nnungu, anavanavo lipuwilo, na anapata shingumi shikamalilika.—Shomya Mateu 22:36-38.

Lilamulo lyambili linkutupwashela kunama nkati mu amani na vanu vanji. (1 Vakolintu 13:4-7) Kwigwilila lilamulo ali, manaa ake ni kuvatanana shana vanu kenga momo mwavatananila Nnungu.—Shomya Mateu 7:12; 22:39, 40.

4. Ibibiliya ilota kutupwashela dashi mu shinamilo shetu?

Ibibiliya inkuvapundisha valikola vavenavo kuungana na kunagwaledyania namene. (Vakoloshu 3:12-14) Yanavo indivalanga kenga shitamu ni shinu shivaikidile shiname maduva uti. Ndimu kenga au unkuvashililidya valikola.—Shomya Kutunduvanga 2:24.

Kutenda ashilá shitangaleka mu Ibibiliya inkululika kutushililidya mu vinu vyakuvilingananga. Kwa mpano, Ibibiliya inditangola kushidoni ivaikidile tuve tuvanu tuvakukulupilika na kukola shimadengo kwa dimongo. Myanda vyoe, vatajili vanavalota vamadengo vatenda vinu avi. (Mikong’o 10:4, 26; Vabalaniya 13:18) Ibibiliya inkwaula kenga ni shinu shikumene kuva mbodi umwe Nnungu kuliko kuvanavo njuluku woe. Yanavo inkutumanyia twangaikangile ashilá shilota kututadya wetu tuname.—Shomya Mateu 6:24, 25, 33; 1 Timoti 6:8-10.

Munu aigwilila ashilá shitangaleka mu Ibibiliya ankushunga shingumi shake. (Mikong’o 14:30; 22:24, 25) Kwa mpano, Ibibiliya hainaleya shinu kukumbila, kanji yanavo inkuvalanga kukumbila kupita shilinga ni shinu shakunyata. Kwigwilila lilamulo ali tunkulula kulishunga kwaupande wa malwele makumene au vijoidyo. (Dimu 104:15; Mikong’o 23:20; 1 Vakolintu 6:10) Kuleka avyo, Ibibiliya inkutupwashela kuvanavo makumbukililo lambone. (Dimu 119:97-100) Kwa umwiu, kutandedya ashilá shitangaleka mu Ibibiliya ni shinu shikumene shilota kutupwashela wetu. Kanji, vakutumika vake Nnungu vankutenda vinu avi mwaa vankulota vantumbiyange Yeova.—Shomya Mateu 5:14-16.