LISHOMO 6

Valanganga mwaa shani undishomya lyaandiko

Nshuwau 10:33-36

IKUVAIKIDILE UTENDE DASHI: haunashomye vila lyaandiko kutwala kwinjila imbande inji. Avanavo wakika kenga vanu vakwigwilíla vankupatangila mana ashilá shautangola na shandikígwe.

MWAKUTANDELA:

Tandola malove lavenavo mana makumene. Baada yakushomya lyaandiko, valanganga manaake kwodananga na mwaa wautangola. Unkuulula kutenda shinu kenga ashi kwa kujidyaujidya malove au kudya pakulota vanu vakwigwilíla vaulule kwona malove lavenavo mana makumene mu lyaandiko.

Ikava kenga ulota Kutumila malove lako pauvalanganga lyaandiko, ivaikidile ulilaledye pakulota vanu vakwigwilíla vamanye shana kenga lilove livele mu Ibibiliya linkulingana na imbande yauvalanganga.
Idapedya dimbande dikumene. Ikava kenga utunduvanga kutambula lyaandiko lyaulota kushomya, paumalila kushomya idapedya lilove lilingana na imbande yauvalanganga.

Muwakati wauvalanganga lyaandiko, leka Ibibiliya yako mwandwa. Ukatenda davo, undavapwashela vanu vakwigwilíla pakulota vaulule kulinganianga na ashilá shauvalanganga shivele nkati munshitali waushamidye.
Valanganga mwakuvikila mmitendo mu inamuna íkakamadyanga. Leka kuvalanganga vinu víkave paida na imbande ikumene. Odedya avilá vyavamanya vanu vakwigwilíla kwaupande wa mwaa wautangola, amuwa kutandola malove lavalanganga shana imbande ivenavo mana makumene na lalota kwigwiniya.