LISHOMO 10
Mikutano vya Mashaidi va Yeova vilota kukupa dashi wako ipaida?
Wako undiwai kuka ku mikutano vya Mashaidi va Yeova? Ikava kenga haunava kuka, ukakumbukila kuka ku nkutano muliduva litandi panji inkuululika kuva na mangaikangilo padyoko. Inkuululika wako kulyudya doni: ‘Mikutano avyo shitandeka nyamani?’ Mwaa shani vyanavo vinkuvanavo mana makumene? ‘Mwaa shani inguvaikidile nguke?’ Mulishomo ali, wako undauka ndalipundisha mwavilota kukupwashela mikutano pakulota ummandike namene Nnungu na vinakupwashela mushingumi shako sha kula liduva.
1. Mikutano vya Mashaidi va Yeova Ishabaa yake shana ni yakwashi?
Nkwaandika wa Ibibiliya jumo atedoni: “Mushipinga shikumene, nantumbyanga Yeova.” (Dimu 26:12) Na malove ala, nae andivalanganga Ishabaa inkumene ya mikutano: kulipudya kwake Nnungu. Mushilambo uti, Mashaidi va Yeova vanaimang’ananga kula ishumana pakulota kuntumbyanga Nnungu, kwimba na kushwali. Kula mwaka, vanavo vanaimang’ananga muvipinga vikumene pakulota valipudye kwake Nnungu.
2. Wako ulota kulipundisha nyamani ku mikutano vyetu?
Mu mikutano vyetu, shatunashomya namene ni lilove lya Nnungu, tunashomya “kutwala kuvalanganga shana na kulodya mana ake.” (Shomya Neemiya 8:8.) Ku mikutano, wako unauka nalipundisha kwaupande umwe Yeova na mavalelo lake lambone. Pauka nalipundisha kwaupande wa linagwaledyo lyavenavo Yeova kwako, unauka mushu ummandika namene nae. Namomo wako unauka ndanalela kenga Yeova ankuulula kukupwashela pakulota uvenavo shingumi sha lipuwilo.—Ishaiya 48:17, 18.
3. Kuvamanya vanu vanji ku mikutano vyetu kulota kukupa ipaida shani?
Yeova ankutwaulila doni “tukumbukila namene mwashi mwakwimulanila kwalinagwaledyo na kutandedya matendo lambone, hatunaleke kukadyanianga.” (Vabalaniya 10:24, 25) Mu mikutano vyetu, undavakodya vanu vakunagwaladyania kula munu na muje, kenga wako, vanavo vankulota namene kulipundisha kwaupande wake Nnungu. Kwanavo, unavaigwa vanu vatangola vinu vyambone vyamu Ibibiliya. (Shomya Valoma 1:11, 12.) Kuleka apo, wako undauka ndavamanya vanu voe, vakulomba na vakálambile, vapuwanga ivedavo vapíta matatisho. I pavila Yeova patumanyia pakulota twimang’anange.
LAMBELAKUMANYA VYOE
Analela nyamani shinatandeka ku mikutano vya Mashaidi va Yeova na mwaa shani ni shambone kulikanyalidya kuka ku mikutano avyo.
4. Mikutano vya Mashaidi va Yeova
Muwakati wa va myombe vake Yesu, Vaklistu ngwengwe vashinaimang’ananga pakulota kulipudya kwake Yeova. (Valoma 16:3-5) Shomya Vakoloshu 3:16, na badae mwambangile mwaa shakudya sha mwina:
Muwakati wa va myombe, Vaklistu vashilipudya dashi kwake Yeova?
Maduvano, Mashaidi va Yeova ngwengwe vanaimang’ananga pakulota kulipudya kwake Nnungu. Pakulota umanye mwavinatandakela mikutano vyetu, Lola VIDEO. Badae, lola ipisha ya nkutano na mwambangile mwaa vyakudya vya mwina.
Mu video, vinu shani vyaugwene vitandeka ku Ing’ande yaUtawala vilingana na vyaushomidye mu Vakoloshu 3:16?
Mu video au mu ipisha, undyona shinu shinji shikunagwadilewoko kwaupande wa mikutano?
Shomya 2 Vakolintu 9:7, na badae mwambangile mwaa shakudya sha mwina:
Mwaa shani Mashaidi va Yeova havanajugwa njuluku ku mikutano vyavo?
Wako na mwalimu wako, lola mpangililo wa nkutano ulota kwaatika.
Imbande shani ya nkutano ya wona wako kenga ni yambone namene au ilota kukupwashela?
Wako ushindamanya?
Mu jw.org, wako unakodya lyutu na maduva la mikutano mushilambo uti.
Mikutano vyetu, tunkuulula kwigwa mwaa, malodya, na video. Mikutano vitunduvanga na lwimu kumalilikila na kushwali.
Dimbande dinji dya nkutano, vanu vankuulula kujang’ula vyakudya vakalota
Vankulalikigwa vanu uti—makola, vakalambile, vanang’olo na vadyoko.
Ku mikutano vya Mashaidi va Yeova, hapali hanajugwa njuluku
5. Inkulateka kulikanyalidya pakulotakuka ku mikutano
Lola mpano wa likola lyake Yesu. Myaka uti vashindauma ku Nashaleti kutwala kutenda mwanda mpaka ku Yelushalemu muwakati wa shikukulu sha pasaka, mwanda awo ushiva wakukamadyanga mwaa vashinawena Vyuluta 100, au maduva matatu vambokanga mashinga. Shomya Lukashi 2:39-42, na badae mwambangile mwaa vyakudya vya mwina:
Wako wona kenga ishilateka kulikanyalidya pakulota kutenda mwanda awo?
Mwaa shani myanda vinji inkulateka wako ulikanyalidyepakulota uke ku mikutano?
Wako wona kenga ni shinu shambone? Mwaa wa nyamani?
Ibibiliya inkuvalanga kenga ni shinu shambone kwimang’ananga pakulota kulipudya kwake Yeova. Shomya Vabalaniya 10:24, 25, na badae mwambangile mwaa shakudya sha mwina:
Mwaa shani indituvaikila tuke ku mikutano?
VANU VANJI VANKUSHIDONI: “Wako hainalateka shinu kwimang’ananga na vanuvanji pakulota kulipudya kwake Nnungu. Kushomya Ibibiliya gweka kunkutosha.”
Lyaandiko shani au mpano shani wa mu Ibibiliya ulodya nyamani shalota Yeova?
KWAUNGWIPI
Kuka ku mikutano kundakupwashela wako kulipundisha kwaupande umwe Yeova, kunanowanga umbodi wako namu nae na kulipudya kwake na vanu vanji.
Tukumbukilange
Mwaa shani Yeova ankulota wetu tuke ku mikutano?
Wako ulota kulipundisha nyamani ku mikutano vya Mashaidi va Yeova?
Unkukumbukila inamuna inji ilota kukupwashela kupatangila mana mikutano?
LIPUNDISHE
Ukakumbukila kuka ku mikutano kunakuleka wako na mangaikangilo? Shipali shintandeke nnume jumo, analela mwashi mwaukidile nanagwela kupagwa ku mikutano.
Lola mwaa shani nnemba vininnagwela mikutano na nyamani shatandile pakulota hanakatoke ata nkutano umo.
Analela mwavaligwidya vanu vanji kwaupande wa kuka ku mikutano.
“Kwa Nini Uhudhurie Mikutano Kwenye Jumba la Ufalme” (Makala iliyo kwenye mtandao)
Mmanye nnume ave nkalau na ashitenda shipinga sha vakalau mwaukidile ndabadili shingumi shake baada ya kuka ku mikutano vya Mashaidi va Yeova.
Nilitembea na BundukiKila Wakati” (Mnara wa Mlinzi, Julai 1, 2014)