Wako ulota kuulula dashi kupatangila mana kushomya kwa Ibibiliya

Wako uligwa dashi ukakumbukila kwanjanga kutenda madengo lanakukamadyangidya, inakudabadabyanga? Pakulota halanakukamadyangidye, wako unkuulula kujavanianga madengo madikidiki na makumene. Wako unkuulula kutandela momo paushomya Ibibiliya. Wako panji unkuulula kulyudya, ‘Ngulota kutunduvanga dashi?’ Pakulota hainakukamadyangidye, unkuulula kushomya dimbande padiki kula wakati. Mu lishomo ali, tunambangila mwaa vinu víkakamadyanga vivaikidile wako utende vilota kukupwashela kupuwanga na kushomya kwako kwa Ibibiliya na kulipundisha kwako.

1. Mwaa shani ni shambone kushomya Ibibiliya kula liduva?

Munu anashomya Ibibiliya kula liduva, au ‘lilamulo limwe Yeova,’ andava wakupuwanga na vinu uti vinamukila shana mushingumi. (Shomya Dimu 1:1-3.) Pakulota kutunduvanga, lingangila kushomya Ibibiliya kwa didakika padyoko kula liduva. Paulota kumanya shana Lilove lya Nnungu, ni apo paulota kunagwaledya namene kushomya kwa Ibibiliya.

2. Nyamani shilota kukupwashela kupatangila mana kushomya kwako kwa Ibibiliya?

Pakulota tupatangile mana kushomya kwa Ibibiliya, ituvaikidile kwimila pakulota tukumbukilange shana ashilá shatushomya. Ituvaikidile tushomye na ‘tukumbukilange muntima mwaa awo.’ (Yoshuwa 1:8, Inota) Paushomya, lyudye wako umwene vyakudya kenga avi: ‘Shinu ashi shinkungupundisha nyamani kwaupande umwe Yeova Nnungu? Ngulota kuvikila dashi mmitendo mushingumi shangu? Ngulota kutumila dashi mishitali avi pakulota kuvapwashela vanu vanji?’

3. Ulota kupata dashi wakati wakulota kushomya Ibibiliya?

Wako kunakukamadyangidya kupata wakati wakushomya Ibibiliya? Tuvoe pakati petu twona yadavo. Lingangila “kutumila shana wakati wamuvenavo.” (Vaepeshu 5:16) Unkuulula kutenda davo ulambela wakati uvaikidile pakulota kushomya Ibibiliya kula liduva. Vanu vanji vona lyamba kuva wakati wambone wakushomya Ibibiliya. Vanji vatandola wakati unji, kenga muwakati wakulya. Nayadavo vanji vashomya Ibibiliya yalyulo vakanava kulala. Kushi wako, wakati shani ulota kuva wambone kwako?

LAMBELA KUMANYA VYOE

4. Lipundishe kunagwaledya kushomya Ibibiliya

Inkuululika kuva shinu shakukamadyanga kwanjanga kushomya Ibibiliya. Pavedoni, wetu tunkuulula “kuvanavo àmu” yakushomya, kenga munu woewoe panjanga kulinga shakulya shaambi. Shomya 1 Patulu 2:2, na badae mwambangile mwaa shakudya sha mwina:

• Wako wona kenga kushomya Ibibiliya kula liduva, inakunagwela kuka mushu utenda davo?

Lola VIDEO pakulota ulole mwashi mwavapuwangila vanu vanji mwaa wakutunduvanga kushomya Ibibiliya. Badae mwambangile mwaa vyakudya vya mwina.

VIDEO: Vanemba vankulipundisha kunagwaledya Lilove lya Nnungu (5:33)

• Mu video, vyakukamadyanga shani vyavapitidile vanemba?

• Nyamani shivapwashadile kukamulila ishabaa yavo yakushomya Ibibiliya kula liduva?

• Nyamani shavatandile pakulota kushomya kwavo kwa Ibibiliya kuve kwambone namene?

Maoni:

• Tandola inangodi ilota kukupwashela kwigwa shana. Lingangila Tafsiri ya Ulimwengu Mpya Ikava kenga ipali mu inangodi yako.

• Tunduvanga kushomya dimbande dikunagwela wako. Maoni, lola shimanyikilo “Tunduvanga kushomya kwako kwa Ibibiliya.”

• Aandika mwina ashilá shaupanganienge. Pakulota kuulula tumila libau “Odedya kushomya kwako kwa Ibibiliya” shimanyikilo sha mulibuku ali.

• Tumila mpangililo JW Library^® Wako unkuulula kutumila mpangililo au, pakulota kushomya na kwigwilila Ibibiliya palyutu lyoelyoe, utumila ishimu au shombo shinji shakwinjilila mu inteleneti.

• Tumila diyapendice divele mu Tafsiri ya ulimwengu Mpya. Asho shinkuvika nkati mapa, lishauma lya malove, na glossário vilota kutadya kushomya kwako kuve kwambone.

5. Panganianga lipundisho lyako lya Ibibiliya

Shomya Dimu 119:34, na badae mwambangile mwaa shakudya sha mwina:

• Mwaa shani ni shambone kushwali ukanava kushomya Ibibiliya au kupanganianga lipundisho lyako lya Ibibiliya?

Ulota kuulula dashi kupatangila mana kula imbande ya lishomo? Paupanganianga lishomo ali, lingangila kwodedya midimu avi:

1. Shomya mapungu matandi la lishomo.

2. Lola na shomya maandiko, na lambela kumanya shana lankwigwania dashi na mwaa awo.

3. Kuvanga malove makumene lajang’ula kula shakudya; lanavo landakupwashela kwambangila shana mwaa kwaupande wa lishomo na mwalimu wako.

Wako ushindamanya?

Mashaidi va Yeova vanditumila Dibibiliya dyoe dyakuvilingananga. Ata ikava davo, yavanagwaledya namene ni Biblia Takatifu—Tafsiri ya Ulimwengu Mpya mwaa yanavo yambone, hainakamadyanga shinu kwigwa, na inkutumila lina lya Nnungu.—Lola ku makala iliyo kwenye mtandao “Je, Mashahidi wa Yehova Wana Biblia Yao Wenyewe?”

KWAUNGWIPI

Pakulota upatangile mana Ibibiliya, lambela wakati pakulota ushomye yanavo, shwali pakulota wigwe shana ashilá shaushomya, na panganianga dimbande dyalipundisho lyako lya Ibibiliya.

Tukumbukilange

• Nyamani shilota kukupwas ela wako kupatangila mana Ibibiliya?

• Wakati shani uvaikidlile wako ushomye na ulipundishe Ibibiliya?

• Mwaa shani ni shambone kupanganianga lipundisho lyako lya Ibibiliya?

LIPUNDISHE

Kumbukilanga maoni lanji lalota kukupwashela kupatangila mana kushomya kwako kwa Ibibiliya.

“Jinsi ya Kunufaika Zaidi Unapoisoma Biblia” (Mnara wa Mlinzi Na. 12017)

Lipundishe dinamuna nnatu pakulota kushomya Ibibiliya.

“Biblia Inaweza Kunisaidiaje?—Sehemu 1: Ichunguze Biblia Yako” (Makala iliyo kwenye mtandao)

Manya mwashi mwakupuwangila na kushomya kwa Ibibiliya.

“Biblia Inaweza Kunisaidiaje?—Sehemu 2: Fanya Usomaji wa Biblia Uwe Wenye Kufurahisha” (Makala iliyo kwenye mtandao)

Pata midimu vinji vyaloka kwa vanu vanjenge kushomya Ibibiliya kala.

Kushomya kwa pagweka kwambone (2:06)