LISHOMO 57
Nyamani shikuvaikidile utende ukatenda lidambi likumene?
Ata ikava kenga unkunnagwaledya Yeova na ntima wako uti na unkulikanyalidya kutenda malotelo lake, myanda vinji unkuulula kukowa. Kanji vyakukowa vinji vinkuva vikumene kuliko vinji. (1 Vakolintu 6:9, 10) Ikava kenga unditenda lidambi likumene kumbukila kenga Yeova ankukunagwaledya, nae avele tayali kukulivaliva na kukupwashela.
1. Ituvaikidile tutende nyamani pakulota Yeova atulivalive madambi?
Munu annagwaledya Yeova anava na shipalodi akaona kenga anditenda lidambi likumene. Kanji shalivikidile Yeova shinkuvapa venentete vake lipambadyangidyo: ‘Ata ikava kenga madambi enu avele kenga ilangi yanauvi, landauka ndava kenga itabwe.’ (Ishaiya 1:18) Wetu tukalyambila na ntima wetu uti, Yeova anauka natulivaliva. Tulota kulodya dashi kenga tundilyambila? Ikava kenga tundilyambila kwaumwiu, wetu tunauka naleka kutenda vinu vyakunyata na kunjugwa Yeova pakulota atulivalive. Badae tunalikanyalidya pakulota kutenda mabadiliko nkati mmakumbukililo au mmadyavalelo lakunyata lalota kututadya kutega. Kuleka apo, tunalikanyalidya pakulota tuname kenga mwatupundishidye Yeova.—Shomya Ishaiya 55:6, 7.
2. Yeova avatumila dashi vanang’olo vashipinga pakulota vatupwashele tukatenda lidambi?
Ikava kenga tunditenda lidambi likumene, Yeova ankutwaulila pakulota “tuvasheme vanang’olo vapashipinga.” (Shomya Tiyagu 5:14, 15.) Vanang’olo vashipinga vankunnagwaledya Yeova na vangandolo vake. Vanavo vatumila limanyilo lyavavenavo lyamu Ibibiliya pakulota kutupwashela kujila kuvanavo umbodi wakunanopa namu Yeova.—Vagalata 6:1.
Vanang’olo vashipinga vatupwashela dashi ikava kenga tunditenda lidambi likumene? Vanang’olo vashipinga vavili au vatatu vanauka natumila Ibibiliya pakulota kutulodya kenga shatutandile ni shakunyata, vanavo momo vanatupa maoni na midimu pakulota hatunaujile kutenda kavili lidambi alyo. Vanavo panji vankuulula kwona kenga ni shambone mene kutenda madengo pashipinga muwakati padyoko mpaka patulota kujila kuva shana nkati mwimumu. Kanji ikava kenga munu anditenda lidambi likumene na hanalyambila shinu? Kwa shinu kenga ashi vanang’olo vashipinga vankuulula kuminganga munu ajo pakulota hanavambukishe vanu vanji.
LAMBELA KUMANYA VYOE
Lola mwashi Yeova mwatupwashalela tukatenda lidambi likumene.
3. Kulivalanga madambi kunkutupwashela
Tukatenda lidambi tunkuntadya shipalodi Yeova, ndyomana ituvaikidile tulivalangange kwake nae. Shomya Dimu 32:1-5, na badae mwambangile mwaa shakudya sha mwina:
Kuleka kupiyanga lidambi lyetu lyatutendile mwaa shani ni shambone kulivalanganga madambi etu kumwe Yeova?
Kuleka kulivalanganga madambi etu kumwe Yeova bai, tunauka naligwa shana tukajugwa lipwashalelo kwa vanang’olo vashipinga. Lola VIDEO, na badae mwambangile mwaa shakudya sha mwina.
Kulingana na video, vanang’olo vashipinga vampwashadile dashi Kanon kujila kumwe Yeova?
Ituvaikidile tuvé tuvakwaminika kwa vanango’olo vashipinga; mwaa vanavo vavele tayali pakulota kutupwashela. Shomya Tiyagu 5:16, na badae mwambangile mwaa shakudya sha mwina:
Mwaa shani vanang’olo vashipinga haivakamadyangidya shinu kutupwashela tukava tuvakwaminika?
Livalange madambi lako, ava wakukulupilika kwa vanang’olo vashipinga na kubali lipwashalelo lya linagwaledyo limwe Yeova
4. Kuvingigwa ni lipwashalelo limwe Yeova
Ikava kenga munu anditenda lidambi likumene na ankwita ashilá shamwaulila Yeova kenga ni shambone, munu ajo haivaikidile kutenda imbande ya pashipinga. Munu ajo vanamminganga na wetu hatunatangola namu nae. Shomya 1 Vakolintu 5:6, 11 na 2 Nshuwau 9-11, na badae mwambangile mwaa shakudya sha mwina:
Nkukumuku unatadya kukukumuka kwa ligung’u, kutangola na munu atandile lidambi na hakalota kulyambila, kulota kwambukisha dashi shipinga?
Voe vavingigwe badae yake vandyujila pashipinga ata ikava kenga kuduma ni shinu shakupwateka shindivapwashela vanavo kulyambila. (Dimu 141:5) Lola VIDEO, na badae mwambangile mwaa shakudya sha mwina.
Kulingana na video, kuvingigwa pashipinga kumpwashadíle dashi Sonia?
Kuvingigwa kunkulodya dashi . . .
ishima lina limwe Yeova?
kenga Yeova ni waishaliya na walinagwaledyo?
5. Yeova ankutulivaliva patulyambila
Yesu anditumila nkong’o utupwashela kumanya mwashi mwaligwidya Yeova munu akalyambila. Shomya Lukashi 15:1-7, na badae mwambangile mwaa shakudya sha mwina:
Lyaandiko ali linkutupundisha nyamani kwaupande umwe Yeova?
Shomya Shakiyele 33:11, na badae mwambangile mwaa shakudya sha mwina:
Tulota kulodya dashi kenga tundilyambila mwiu?
Kenga nkúshunga dinga- ndolo, Yeova yadavo anavangaikangila vangandolo vake
VANU VANJI VANKUSHIDONI: “Nikavaulila shangutandile vanang’olo, vashipinga vanavo vananguvinga.”
Wako ukamwaulidile nyamani munu aligwa davo?
KWAUNGWIPI
Ikava kenga tunditenda lidambi likumene, Yeova ankuulula kutulivaliva pavedoni, ituvaikidile tulyambile kwalakela muntima na kwamuwa mene kutenda vinu vyakunyata.
Tukumbukilange
Mwaa shani ni shambone kulivalanganga madambi etu kumwe Yeova?
Ituvaikidile tutende nyamani pakulota atulivalive madambi etu?
Ikava kenga tunditenda lidambi likumene, mwaa shani ituvaikidile tulambele lipwashalelo kwa vanang’olo vashipinga?
LIPUNDISHE
Lola mwashi nnume jumo mwashiligwidya na shididi shimwe Yeova shavandike mu Ishaiya 1:18.
Kuvingigwa kunkuvapwashela dashi avalá vanatenda lidambi likumene?
“Kutenga na Ushirika Ni Mpango Wenye Upendo” (Mnara wa Mlinzi, Aprili 15, 2015)
Manya mwashi mwakummalangangila munu kuvingigwa pashipinga ákave Nshaidi wa Yeova.
Pakulota umanye mwaa shani nnume alakíle umwiu andiligwa kenga Yeova animutidya kwake, Shomya shakupitila “Nangu ngushinalota kujila kumwe Yeova.”