1-3. a) Akapela munu watunnagwaledya tulyudya dashi? b) Didini dyoe dijang’ula dashi kwa vyakudya avi?

IBIBILIYA inkutwaulila kenga muwakati wamushu “kupela hakupagwa shinu kavili.” (Maono 21:4) Mu Lishomo lya 5, tundilipundisha kenga lyambolelo linkuulula kutupwashela kupata shingumi shíkamalilika. Kanji tunkuka mushu tupela. (Nkúvalanga 9:5) Napanelo, tunalyudya doni: Munu akapela shintandeka nyamani?

² Lijibu lya shakudya ashi live na mana namene, kupunda namene akapela munu watunnagwaledya. Na tunalyudya doni: ‘aukile kwashi? Da ankutwona? Ankuulula kutupwashela? Da tunamwona kavili?’

³ Didini dyoe dinkuvanavo majibu akuvilingananga a vyakudya avi. Didini dinji dinkupundisha kenga ukatenda vinu vyambone unauka kuwa, na ukatenda vinu vyakunyata vanakutaa moto. Dinji dipundisha kenga ukapela undadyuka kuva imumu kuka ndanama kavili na valikola vako vapalenge. Na dinji dipundisha kenga munu akapela anaukumigwa, kuka navalekwa kavili au kuvanavo mili unji au kuva nkoko.

4. Didini dyoe dinkupundisha nyamani kwaupande wa kupela?

⁴ Didini dyoe dinkupundisha vinu vyakuvilingananga kwaupande wakupela. Kanji kwa didini adi uti dinkunganila shinu shimo. Dinkupundisha kenga munu akapela imumu inauma kuka ndanama kushinu kunji. Napanelo, au ni umwiu?

MUNU AKAPELA SHINTANDEKA NYAMANI?

5, 6. Munu akapela shintandeka nyamani?

⁵ Yeova ankumanya nyamani shinantandeka munu akapela, nae ankutwaulila kenga munu akapela shingumi shake, shindamalilika. Kupela kundivilingananga na shingumi. Napavedoni munu akapela hanauka shinu ndanama kushinu kunji, makumbukililo na ding’ano dyake dinamalilika.a Tukapela hatunalola, hatunaigwa na hatunakumbukila.

⁶ Umu Shalomoni andyandika kenga ‘vapadile hashipali shoeshoe shavamanya.’ Vapadile havananagwaledya au havananyatila, ‘halapali madengo, ata mipango, haupali umanyimanyi, ata limanyilo mulikabuli.’ (Shomya Nkúvalanga 9:5, 6, 10.) Na Dimu 146:4, Ibibiliya inkutwaulila kenga munu akapela ‘makumbukililo ake’ lanamalilika.

YESU ATANGWELE NYAMANI KWAUPANDE WA KUPELA?

7. Yesu atangwele nyamani kwaupande wa kupela?

⁷ Lashalu muje Yesu wakunagwaleka akapele, Yesu andívaulila vakwoda vake: “Njetu Lashalu andilala.” Kanji Yesu hashivalanga kenga Lashalu alele lwono. Yesu andyúka mushu atangola: “Lashalu andipela.” (Nshuwau 11:11-14) Napavedoni Yesu andilinganianga kupela na lwono. Nae hatangwele kenga Lashalu avele kuwa au avele pamo na valikola vake vapalenge kala. Na ata havalenge kenga nae ankuvauvanga kumoto wakushena au andivalekwa kavili kuva munu au nkoko. Kwaumwiu, nae ashivalanga kenga Lashalu ave mu lwono lukumene. Maandiko lanji yadavo landilinganianga kupela na lwono lukumene. Ibibiliya inkuvalanga kenga Shiteva pavamyee, ‘andilala lwono lwakupela.’ (Vitendo 7:60) Myombe paulu andyaandika kenga vaklistu vanji ‘vandilala mu lwono lwakupela.’—1 Vakolintu 15:6.

8. Tunkumanya dashi kenga Yeova havaumbile vanu pakulota vapele?

⁸ Da Nnungu amumbile Adamu namu Eva pakulota vaname wakati padyoko na vapele? Mene! Yeova anímumba Adamu namu Eva pakulota vavenavo lipuwilo na shingumi shíkamalilika. Yeova andivaumba vanu na lilotelo lyakunama myaka víkamalilika. (Nkúvalanga 3:11) Hapali tatamunu analota vanavake vakangapale na vapele na Yeova yadavo hanalota shinu kuvona vanu vapela. Ikava kenga Yeova andituumba pakulota tuname myaka víkamalilika, napanelo mwaa shani tunkupela?

MWAA SHANI TUNKUPELA?

9. Mwaa shani lilamulo lyaumidye Yeova halikamadyenge Adamu namu Eva kwigwilila?

⁹ Muliteka lya ku Edeni, Yeova anímwaulila Adamu doni: “Milandi uti vipagwite muliteka amu vyepo vyake lyaa, haunajope. Kanji nnandi walimanyilo lyakupambula wambone na wakunyata, vyepo vyake haunalye mwaa muliduva lyaulota kulya vyepo vyake vyo, mwiu undapela.” (Kutunduvanga 2:9, 16, 17) Lilamulo ali halikamadyenge kwigwilila, mwaa live ngala na Yeova andivanavo aki yakuvaulila Adamu namu Eva vinu vyambone na vyakunyata. Kuleka vakamwigwilidile Yeova, vakandililodya kenga vankwishimu unanangalaledi wake. Nayadavo vakandililodya kenga vankunnambwalela Nnungu kwavinu uti vyavapele.

10, 11. a) Shatwani avaduwenge dashi Adamu namu Eva? b) Mwaa shani Nnungu havalivalidile makosha lavo?

¹⁰ Shitendo shashididi ni doni: Adamu namu Eva havamwigwilidile Yeova. Shatwani andímudya Eva doni: “Ashii Nnungu até dashi, atédoni, Milandi uti vipagwíte muliteka amu, vyepo vyake hamunalye?” Eva akajang’ula: “Mene, milandi uti vipagwíte muliteka amu, vyepo vyake tunkuulula kulya. Kanji Nnungu atédoni, ‘Nnandi uvéle pakatipakati liteka, vyepo vyake vyo hamunalye na ata hamunakumbe kwambangidya hamunapele.’”—Kutunduvanga 3:1-3.

¹¹ Shatwani kushidoni: “Umm hamupela. Ivé doni, Nnungu mwaa andimanya doni, muliduva lyamulota kulya mwenu mundang’amukanga kuva kenga jo mwene Nnungu, mundamanya wambone na wakunyata.” (Kutunduvanga 3:4-6) Shatwani ashilota Eva akumbukile kenga ankuulula kulilamulila jo mwene kumanya wambone na wakunyata. Nayadavo, anínshang’apila kwa avila vishilota vintandeke kwamwaa mene kumwigwilila Nnungu. Shatwani anímwaulila Eva kenga haupela, nae akalya shepo ashilá na akamupa ntwagwe. Adamu namu Eva vandímanya kenga Nnungu andívaleya kulya shepo asho. Pamo na davo, vakalye shepo vandíkosha pakati paunanangalaledi. Pavalile shepo, vanavo vandílilodya kumweludyanga Tatagwavo wakunagwaleka Yeova. Pavalakile kumwigwilila Nnungu vandyúka napela!

12. Mwaa shani Yeova inínyatila namene, kwa kupujungula kumwe Adamu namu Eva?

¹² Ni shinu shashididi kumanya kenga vatatavetu vatandi havamwigwilidile Nnungu! Kumbukila doni, wako utatamunu undilikanyalidya namene kuvashunga shana vanavako, kanji vanavo vakaleka kutenda vinu vyauvapundishidye wako, ulota kuligwa dashi? Aikunyatila?

13. Manaake nyamani Yeova patangwele ‘undau jila kavili kuva litutunga’?

¹³ Adamu namu Eva pavapujungwile, vandikatoka litala lyakupata shingumi shíkamalilika. Yeova anímwaulila Adamu: ‘Kwodamwaa wako ni litutunga, bai undaujila kavili kuva litutunga.’ (Shomya Kutunduvanga 3:19.) Manaake, Adamu akandyujila kuva litutunga, kenga momo mwavaladile hakanava kumbigwa. (Kutunduvanga 2:7) Adamu patagile andipela na andileka kupagwa.

14. Mwaa shani tunkupela?

¹⁴ Kuleka Adamu namu Eva vamwigwilidile Nnungu vakandipagwa mpaka nelo. Kanji pavalakile kumwigwilila Nnungu, vandítenda lidambi na vandipela. Lidambi ni kenga shilwele shakujowa shatwambukishigwe na vanyakala vetu vatandi. Wetu uti tunkuvalekwa na lidambi ndyomana tunkupela. (Valoma 5:12) Kanji ala hanava shinu malotelo a Nnungu pameo pavanu. Nnungu havaumbile vanu pakulota vapele, ndyomana Ibibiliya inkushema kupela kuva “Mmongo.”—1 Vakolintu 15:26.

UMWIU UNKUTWAMBOLA NKATI MU USHWANG’A

15. Mwaa shani kumanya umwiu kwaupande wa vakupela ni shinu shambone?

¹⁵ Kumanya umwiu kwaupande wa vakupela unkutwaambola mu mapundisho akushang’apa. Ibibiliya inkutupundisha kenga vapadile havanaona kupwateka na havave shipalodi. Hatulula kutangola na vanavo. Hatulula kuvapwashela na vanavo havanatupwashela shinu, havaulula kutupa shaushanga ndyomana haituvaikidile tuvajope. Nayadavo, didini dyoe dinkupundisha kenga munu akapela andauka ndanama kushinu kunji na tunkuulula kuvapwashela kwa kuvalipa vananangalaledi va didini pakulota kuvashwalidya avala vapadile. Kanji tukamanya umwiu kwaupande wa vakupela hatuduwangika.

16. Didini dyoe dinkupundisha ushwang’a shani kwaupande wa vakupela?

¹⁶ Shatwani ankutumila didini dyakushang’apa pakulota tukumbukile kenga vanu vapadile vapali vangumi. Kwampano, didini dinji dinkupundisha kenga munu akapela imumu inauma ndanama kushinu kunji. Kushi wako idini yako ikupundishidye yadavo, au ikupundisha ashilá shitangaleka mu Ibibiliya kwaupande wa vakupela? Shatwani ankutumila kushang’apa pakulota kuvapukanianga vanu namu Yeova.

17. Mwaa shani lipundisho lya kuvataja vanu moto linkunyatiyanga lina limwe Yeova?

¹⁷ Didini dyoe dinkupundisha vinu vyakujowa namene. Kwampano dyanavo dinkupundisha kenga vanu vakalau vakapela Nnungu anavataja moto úkamalilika. Lipundisho alyo linkunyatyanga lina limwe Yeova. Nae haulula mwiko kuvauvyanga vanu davo! (Shomya 1 Nshuwau 4:8.) Ukangwene dashi tatamunu au jujumunu antaja mwanagwe moto makono? Kwaumwiu ulota kumwona kuva nkalau namene. Na ata haikunagwela kutenda imbodi na munu ajo. Kanji Shatwani alota wetu tukumbukile kenga Yeova ankuvauvyanga vanu.

18. Mwaa shani hainatuvaikila shinu kuvajopa vanu vapadile?

¹⁸ Didini dinji dipundisha kenga munu akapela, anabadilika kuva imumu yadimongo. Didini adyo dipundisha kenga indivavaikila vavaishimu na vavajope, mwaa vanavo vankuulula kuva vambodi au vammongo. Vanu voe vankwamini ushwang’a awo. Vankuvajopa vakupela, ndyomana vankulipudya kwavo vanavo kuleka kulipudya kwake Yeova. Manya kenga vapadile hashipali shoeshoe shavamanya na hainavaikila shinu kuvajopa. Yeova ni namalunda wetu. Nae ni Nnungu wa umwiu na indituvaikila tulipudye kwake nae bai.—Maono 4:11.

19. Kumanya umwiu kwaupande wa kupela tunkupata paida shani?

¹⁹ Kumanya umwiu kwaupande wa vakupela, unkutwambola mu mapundisho akushang’apa. Umwiu awo, unkutupwashela kumanya shana vyakulivikila vyake Yeova kwaupande washingumi muwakati wamushu.

20. Tulota kulipundisha nyamani mu lishomo lyaatika?

²⁰ Myaka vyoe vipitile kunyuma, ntumika jumo wa Nnungu walina Jobi andyúdya doni: ‘Munu akapela ankuulula kuja ndanama kavili?’ (Jobi 14:14) Da mwiu munu akapela inkuululika kudyuka ndanama kavili? Nnungu ankutupa lijibu lyambone mu Ibibiliya. Tunalipundisha ing’ano ayo mu lishomo lyaatika.

1-3. (a) Wetu uti tuvele nkalaboshi shani? (b) Yeova alota kutenda nyamani pakulota kutwambola?

KUMBUKILA wako undyukumigwa na kutwala kukujela nkalaboshi paukauma kavili kwamwaa washinu shaukatandile. Halipali lilindililo lyakulota kwambolegwa. Wako undishanga na hashipali shoeshoe shakutenda. Pamo na kushanga kwako, kanji unkummanya munu avele na dimongo dyakulota kukwambola, nae ave tayali pakulota kukupwashela! Wako ukaligwite dashi?

² Wetu uti tundyungwa mu kupela. Hatunaulula shinu kutenda shoeshoe pakulota kulyambola mu kupela. Kanji Yeova ni ave na dimongo pakulota kutwambola mu kupela. Nae andilivikila kenga “mmongo wamwisho kubamolegwa alota kuva kupela.”—1 Vakolintu 15:26.

³ Kumbukila muwakati wida, vanu pavalota kunama kwabila kupela! Yeova hamalidya shinu kupela gweka, nae anavadyuwa vanu uti vapadile. Kumbukila vinu avi mwavilota kuvalela. Yeova andilivikila kenga ‘vakupela vake vandanama.’ (Ishaiya 26:19) Mu Ibibiliya shitendo asho vashema kudyuka.

AKAPELA MUNU WATUNNAGWALEDYA

4. (a) Tulota kupata kwashi lipambadyangidyo akapela munu wa palikola au njetu? (b) Vambodi vake Yesu vavé vanyani?

⁴ Akapela munu wa palikola au njentu watunnagwaledya, inatupwateka namene na tunashanga mwakutandela. Mwaa hatunaulula shinu kumujidya shingumi pakulota kunama kavili. Kanji tunkuulula kupata lipambadyangidyo lya umwiu mu Ibibiliya. (Shomya 2 Vakolintu 1:3, 4.) Tuke tulole mpano ulodya kenga Yeova namu Yesu vankulota kuvapa shingumi avalá vakunagwaleka vetu vapadile. Yesu papagwíte mushilambo shapai, ashinauka annola Lashalu pamo na valumbuvake, Malita namu Maliya. Vatatu ava uti vavele vambodi vambone vamwe Yesu. Ibibiliya inkuvalanga kenga: “Yesu ashinavanagwaledya namene vanu vatatu ava, Malita, Maliya pamo namu Lashalu.” Kanji liduva limo Lashalu andípela.—Nshuwau 11:3-5.

5, 6. (a) Yesu atándile nyamani akavone valumbuvake Lashalu valila? (b) Kumanya kenga Yesu ínampwateka kwamwaa wakupela, tunkupata nyamani?

⁵ Yesu andyúka nampambadyanga Malita namu Maliya. Malita akaígwe kenga Yesu ankwida, nae andyúka kunjini nanshinga. Akamwone Yesu nae andipuwanga namene na akamwaulila: “Kuleka ùpagwite apa numbwangu hanapele.” Malita ashikumbukila kenga Yesu andíkakova kuwika. Baada ya apo, Yesu anímwona Maliya alila. Yesu akavone vanavo valila, inímpwateka muntima nanae akalila. (Nshuwau 11:21, 33, 35) Yesu inímpwateka namene kenga momo mwainatupwatakela wetu akapela munu watunnagwaledya.

⁶ Kumanya kenga Yesu ínampwateka kwamwaa wakupela, tunkupata lipambadyangidyo. Yesu avé na mavalelo a Tatake. (Nshuwau 14:9) Yeova andivanavo dimongo dyakumalidya kupela na anatandedya muwakati wa kuvandika.

YESU ANKUNDYUWA LASHALU

7, 8. (a) Mwaa shani Malita hashilota vaumye lijanga palikabuli limwe Lashalu? (b) Yesu atandile nyamani baada ya kumya lijanga?

⁷ Yesu pawikile palikabuli pavanshíkile Lashalu, pannango vandídiva lijanga likumene. Yesu kushidoni: “usha lijanga lyo.” Kanji Malita kutwala kunneya. Mwaa landípita maduva nsheshe mili umwe Lashalu uvele mulikabuli. (Nshuwau 11:39) Malita hashimanya nyamani shashilota kutenda Yesu pakulota ampwashele kwaupande wanumbugwe.

⁸ Yesu akanshema: “Lashalu umila panda apa!” Malita namu Maliya vandíshanga namene. “Mwaa munu wakupela jo andyúma madodo na makono vàntavilidyenge inguvo yanashwe.” (Nshuwau 11:43, 44) Lashalu akava mumi kavili! Nae andyújila kavili napagwa na likola pamo na vambodi vake. Vanavo vanínkumbatila, kunkamulanga na kutangolanavo. Alo lavele makango makumene namene! Yesu aníndyuwa Lashalu.

“MWALI, NINKUKWAULILA TAKATUKA!”

9, 10. (a) Nyani ampele Yesu dimongo dyakuvadyuwa vanu? (b) Mwaa shani vinu vyatushomya kwaupande wa kudyuka vinkuvanavo mana kwetu?

⁹ Da Yesu avadyuidye vanu kwa dimongo dyake jo mwene? Mene. Yesu hakanava kundyuwa Lashalu anínjugwa Yeova pakulota amupe dimongo dyakundyuwidya Lashalu. (Shomya Nshuwau 11:41, 42.) Hanava shinu gweka Lashalu wavandyuwídye. Ibibiliya inkummalanga mwali jumo wamyaka 12 avele nnwele namene. Tatamunu walina Yailu, andíshanga namene na anínjugwa Yesu pakulota amponie mwanagwe. Nae avenavo mwanagwe jumo bai. Yailu pashitangola namu Yesu, muwakati wowo vandíwika vanu vaashidoni: “Mwanavo jo andipela! Haunauke mushu undingadinga mwalimu jo?” Kanji Yesu akamwaulila Yailu: ‘Haunajope avanavo likulupililo, nae anambolegwa.’ Bai vakauka ku ing’ande kumwe Yailu. Vakawike paing’ande imwe Yailu, Yesu andívaona vanu valila. Yesu akavaulila: hamunalile mwaa nae “hanapela shinu alelé vila.” Valikola vake mwali vandíshanga namene kwa matangodi amwe Yesu. Yesu akavaulila vanu uti vaumanange na akavatwala tatake na anyoke mwali vakauka apala palele. Kutwala kunkamula nkono na kunshema aashidoni: ‘Mwali takatuka!’ Kumbukila lipuwilo lyavavénavo baada ya kumwona mwana atakatuka na awena! Yesu aníndyuwa mwanagwavo. (Malukushi 5:22-24, 35-42; Lukashi 8:49-56) Kutunduvangila wakati wowo, vakamwona mwali vashinakumbukila ashilá shatandile Yeova kupitila kwake Yesu.a

¹⁰ Vanu vavadyuwídye Yesu badae vandípela kavili. Kanji vinu vyatushomya kwaupande wakudyuka vinkuvanavo mana kwetu, mwaa vinkutupa likulupililo liu. Yeova ankulota kuvadyuwa vanu vapadile na anavadyuwa mwiu.

YEOVA ANAVADYUWA VAPADILE

11. Mu libuku lya Nkúvalanga 9:5 inkutupundisha nyamani kwaupande wakupela kwake Lashalu?

¹¹ Ibibiliya inkupundisha kenga ‘vapadile hashipali shavamanya.’ Kupela kumwe Lashalu kundilodya umwiu awo. (Nkúvalanga 9:5) Kwodananga na mwatangaladile Yesu, ivele kenga Lashalu ashilala lwono. (Nshuwau 11:11) Muwakati wavele mulikabuli, Lashalu hashimanya “shinu shoeshoe.”

12. Tunkumanya dashi kenga kudyuka kumwe Lashalu kunditandeka?

¹² Vanu voe vanímwona Yesu andyuwa Lashalu. Ata vammongo vake Yesu, vandímanya kenga nae ni atandile makango alo. Lashalu andyújila kuva mmumi kavili, ashi ni shilodya kenga kudyuka kunditandeka mwiu. (Nshuwau 11:47) Vanu voe vandyúka nannola Lashalu, vanavo vandyámini kenga Yesu andítumigwa na Nnungu. Vammongo vake Yesu haivanagwadíle, mpaka vandípakanila pakulota kumyaa Yesu namu Lashalu.—Nshuwau 11:53; 12:9-11.

13. Mwaa shani indituvaikila twamini kenga Yeova anavadyuwa vanu vapadile?

¹³ Yesu andítangola kenga “vanu uti vavéle muvyonga” vakumbukiligwa na Nnungu vandadyuka. (Nshuwau 5:28) Shinu ashi shinkulodya kenga vanu uti vapadile vakumbukiligwa namu Yeova vandadyuka. Kanji pakulota Yeova andyuwe munu, inkulateka ammanye shana kwaupande wamunu ajo. Da Nnungu anaulula kutandedya mwiu? Elo, mwaa dipali dimilioni dyoe dya dinondo kuwa. Ibibiliya inkuvalanga kenga Yeova ankumanya kula inondo na lina lyake. (Shomya Ishaiya 40:26.) Ikava kenga ankukumbukila mena a dinondo uti, tunkuulula kuvanavo wakika kenga hainkamadyangidya shinu kuvakumbukila vanu uti vavalota kuvadyuwa. Yeova ni aumbile vinu uti, ndyomana tunkwamini kenga andivanavo dimongo dyakuvadyuwa vanu vapadile.

14, 15. Tulipundisha nyamani kwa malove amwe Jobi kwaupande wakudyuka?

¹⁴ Jobi ntumika wake Nnungu, andívanavo wakika kenga kunapagwa kudyuka. Nae andyúdya doni: ‘Munu akapela ankuulula kuja ndanama kavili?’ Nae akamwaulila Yeova: ‘Wako undashema, na nangu nakwitika. Unavanavo ámu kwa shimadengo shamakono ako.’ Kwaumwiu, Jobi andímanya kenga muwakati wamushu Yeova anavatakatuwa vanu vapadile.—Jobi 14:13-15.

¹⁵ Wako ukumbukila dashi kwaupande wakudyuka? Wako unkuulula kulyudya doni: ‘Da likola lyangu pamo na vambodi vandauka nadyuka?’ Kumanya kenga Yeova anavadyuwa vanu vapadile, tunkupata lipambadyangidyo. Tuke tulole mwaitangalela Ibibiliya kwa avalá valota kudyuka na lyutu shani lyavalota kunama.

“KWIGWA LIDI LYAKE KUTWALA KUMA”

16. Avalá valota kudyuka valota kuvanavo shinamilo shani?

¹⁶ Kala, vanu vavadyúwidye vandyújila ndanama kavili mushilambo shapai pamo na likola lyavo na vambodi. Kudyuka ako kunauka natandeka kavili muwakati wamushu, kanji kwa dindila dyambone namene. Mwaa shani? Mwaa avalá valota kudyuka vanapata litala lyakunama kavili mushingumi shíkamalilika na mwiko havapela. Nayadavo, uti vandanama mushilambo shambone kupunda shatunama nelo. Haipagwa ing’ondo, ukalau ata malwele.

17. Ni nyani alota kudyuka?

¹⁷ Ni nyani alota kudyuka? Yesu andítangola kenga ‘vanu uti vavéle muvyonga vakumbukiligwa vandaigwa lidi lyake kutwala kuma.’ (Nshuwau 5:28, 29) Mu Maono 20:13 pankushidoni: ‘Imanga indívajaula vakupela vapagwíte amo, Kupela na likabuli kuvajaula vakupela vapagwíte kwanavo.’ Manaake, dimilioni dyavanu voe vapadile vandadyuka. Myombe Paulu anditangola kenga “kunapagwa kudyuka kwavaishaliya na vaungave-ishaliya.” (Shomya Vitendo 24:15.) Manaake ni nyamani?

18. “Vaishaliya” ni vakwashi?

¹⁸ “Vaishaliya” ni avalá vatumika vakukulupilika vake Yeova, vanamíle muwakati Yesu hakanava kwida mushilambo shapai. Vanu avo ni kenga Noe, Abulaamu, Shalaa, Musha, Luti namu Eshiteli ava vanadyuka kunama kavili mushilambo shapai. Wako unkuulula kushomya libuku lya Vabalaniya nango wa 11 kwaupande wavanu avo. Kushi vatumika vakwaminika vake Yeova vapela maduva anelo? Vanavo uti “vaishaliya” vandadyuka.

19. “Vaungave-ishaliya” ni vakwashi? Yeova alota kuvapa litala shani?

¹⁹ “Vaungave-ishaliya” ni dimbumba dyavanu voe vakapatile litala lyakummanya Yeova. Ata ikava kenga vandipela, Yeova hanavalivaliva shinu. Nae andavadyuwa vanu avo, na anavapa litala lyakummanya nae na kutandedya malotelo ake.

20. Mwaa shani vanu vanji havadyuka shinu?

²⁰ Napanelo, kwaneka vanu uti vapalenge vandadyuka? Mene. Yesu anditangola kenga vanu vanji havadyuka shinu. (Lukashi 12:5) Kanji nyani alota kwamuwa kwa aijá alota kudyuka au mene? Yeova ni Nkuukumu wamwisho, kanji nae yadavo animupa Yesu madalaka “pakulota avaukumu vangumi na vapadile.” (Vitendo 10:42) Kanji vanu vakalau vakalatile kuleka vitendo vyakunyata havadyuka.—Lola imbande Igwa Shana 19.

KUDYUKA KWA AVALÁ VOLOTA KUKA KUWA

21, 22. (a) Avalá valota kudyuka kuka ndanama kuwa valota kuvanavo mili shani? (b) Ni nyani ntandi kudyuka kuka ndanama kuwa?

²¹ Ibibiliya inkutwaulila kenga vanu vanji vanauka ndanama kuwa. Vanu valota kudyuka kuka ndanama kuwa, havanadyuka shinu na mili washimunu. Vanavo vankudyuka kuka ndanama kuwa na mili waimumu.

²² Yesu ni munu ntandi adyukile kuka ndanama kuwa. (Nshuwau 3:13) Baada yakupita maduva matatu Yesu apadile, Yeova aníndyuwa. (Dimu 16:10; Vitendo 13:34, 35) Yesu havandyuwidye na mili washimunu. Myombe Patulu andítangola kenga Yesu ‘kwashimunu vanimpedya, kanji vanindyuwa kwa imumu.’ (1 Patulu 3:18) Yesu andyujila kuwa ndanama kenga munu wa imumu yadimongo! (1 Vakolintu 15:3-6) Kanji Ibibiliya inkuvalanga kenga Yesu hanava shinu gweka.

23, 24. “Shipinga shidikidiki” shatambwile Yesu ni vakwashi na vavé vangapi?

²³ Yesu hakanava kupela, andívaulila vakwoda vake vakukulupilika: “Ninkuka nampanganiangidya mautu.” (Nshuwau 14:2) Shinu asho manaake ni vakwoda vanji vake Yesu vandadyuka kuka ndanama pamo namu Yesu kuwa. Vanu vangapi? Yesu andíshema kuva “shipinga shidikidiki “mwaa vakanave vanu voe. (Lukashi 12:32) Myombe Nshuwau andyóna shipinga asho mwashivaladile. Nae andítangola kenga anímwona Yesu kuwa “àimidile Palishinga lya Shiyau pamo na vanu 144.000.”—Maono 14:1.

²⁴ Vaklistu 144.000, duvani pavatunduvenge kudyuka pakulota kuka ndanama kuwa? Ibibiliya inkuvalanga kenga kudyuka ako kukanditandeka baada yakutunduvanga Yesu kutawala kuwa. (1 Vakolintu 15:23) Ambi tunkunama wakati wowo, pakati pavanu 144.000 vandidyuka kuka kuwa. Avalá vabakidile mushilambo shapai baada yakupela vankudyuka kuka ndanama kuwa. Namomo, dimbumba dyavanu voe muwakati wamushu vandadyuka kunama mu Palaishu mushilambo shapai.

25. Tulota kulipundisha nyamani mu lishomo lyaatika?

²⁵ Muwakati wakuvandika, Yeova anatuvika mu ulu kwaupande wakupela, na kupela hakupagwa kavili! (Shomya Ishaiya 25:8.) Avalá valota kudyuka kuka ndanama kuwa valota kutenda nyamani kwanavo? Ibibiliya inkuvalanga kenga vanavo vandatawala pamo namu Yesu kupitila Utawala wa Nnungu. Mu lishomo lyaatika tunalipundisha vinu vyoe kwaupande wa Utawala awo.