Ntenga ukumene mu Ibibiliya ni Utawala wa Nnungu. Yeova andauka ndatumila Utawala awo pakulota kutadya shilambo shive palaishu. Kanji Utawala awo ni nyamani? Tunkumanya dashi kenga wanavo unkulangalalela? Utawala awo ulwile kutenda nyamani? Na ulota kuka natenda nyamani muwakati wamushu? Lishomo ali na mashomo mavili laatika landajang’ula vyakudya avi.

1. Utawala wa Nnungu ni nyamani, na Umu wa Utawala awo ni nyani?

Utawala wa Nnungu ni ishilikali yavikile mwene Yeova kuwa. Na Umu wa Utawala awo ni Yesu Klistu, na nae ankulangalalela kuwa. (Mateu 4:17; Nshuwau 18:36) Ibibiliya inkushidoni: Yesu “Anatawala kenga Umu . . . mu vyaka víkamalilika.” (Lukashi 1:32, 33) Kenga Umu wa Utawala wa Nnungu, Yesu andauka ndavalangalalela vanu uti mushilambo shapai.

2. Ni vanyani valota kulangalalela pamo namu Yesu?

Kanji Yesu halangalalela shinu gweka. Vanu “vakula likola, inangodi, venentete na shilambo . . . vanatawala mushilambo pamo namu nae.” (Maono 5:9, 10) Vanu vangapi valota kulangalalela pamo namu Klistu? Tangu Yesu kwida mushilambo shapai dimilioni dya vanu voe vandyuka ndava vakwoda vake. Kanji vanu 144.000 ni vauka kuwa nalangalalela pamo namu Yesu. (Shomya Maono 14:1-4.) Vaklistu vanji uti vavele mushilambo shapai vandauka ndatenda imbande ya venentete va Utawala wa Nnungu mushilambo shapai.—Dimu 37:29.

3. Mwaa shani Utawala wa Nnungu ni wambone kupunda dishilikali dya vanu?

Ata ikava kenga dishilikali dinkulikanyalidya kutenda vinu vyambone, dyanavo hadinavanavo shinu dimongo pakulota kutenda vinu uti vyavalota. Baada yakumalilika myaka vyavo vyakulangalalela, inkuululika kudiva vanji vákalota wambone kwa venentete. Kanji kwaupande umwe Yesu, Umu wa Utawala wa Nnungu, mwiko hapagwa shinu munu alota kudiva lyutu lyake. Nnungu “andivika Utawala úkalota kubamolegwa mwiko.” (Daniyele 2:44) Yesu andalangalalela shilambo uti, na havanavo shinu kupambula. Yesu ni walinagwaledyo, wambone, na waishaliya na nae andauka ndavapundisha vanu pakulota vatananane mu inamuna imo yoyo—kwalinagwaledyo, kwa wambone na kwaishaliya.—Shomya Ishaiya 11:9.

4. Ishilikali yadimongo indalangalalela shilambo uti

Yesu Klistu ankuvanavo dimongo dyoe namene pakulota kulangalalela  kumpunda nkúlangalalela woewoe apagwite. Shomya Mateu 28:18, na badae mwambangile mwaa shakudya sha mwina:

• Mwaa shani Yesu ankuvanavo madalaka makumene namene kumpunda nkúlangalalela woewoe wa dishilikali dya vanu?

Dishilikali dya vanu dinkubadilika kula wakati, na kula ishilikali ilangalalela isemu imo yashilambo. Ambi kushi Utawala wa Nnungu? Shomya Daniyele 7:14, na badae mwambangile mwaa vyakudya vya mwina:

• Mwaa shani ni shambone kumanya kenga Utawala wa Nnungu “haubamolegwa”?

• Mwaa shani ni shambone kumanya kenga undalangalalela shilambo uti?

5. Dishilikali dya vanu vandabadili

Mwaa shani Utawala wa Nnungu undabadili dishilikali dya vanu? Lola VIDEO, na badae mwambangile mwaa shakudya sha mwina.

VIDEO: Utawala wa Nnungu ni nyamani?—Imbande (1:41)

• Kulangalalela kwa dishilikali dya vanu shumilila nyamani?

Shomya Nkúvalanga 8:9, na badae mwambangile mwaa vyakudya vya mwina:

• Da wako unkwona kenga Utawala wa Nnungu undivaikila ubadili dishilikali dya vanu? Mwaa wa nyamani?

6. Vakulangalalela va Utawala wa Nnungu vankutumanya shana

Kwa kuva Umu wetu Yesu, andiwai kunama kenga mwana wa munu, ankuulula “kutwanangila shididi mukudabadabanga kwetu.” (Vabalaniya 4:15) Kuleka davo Yeova andivatandola valume na vakongwe vakukulupilika vakuwika 144.000 valota kulangalalela pamo namu Yesu, “kwalakela kula likola, inangodi, venentete na shilambo.”—Maono 5:9.

• Wako unkuligwa dashi kwa kumanya kenga Yesu na avalá valota kulangalalela namu nae vankumanya shinamilo shetu? Mwaa wa nyamani?

7. Malamulo la Utawala wa Nnungu ni lambone namene

Dishilikali dindaumya malamulo pakulota kuvapwashela na kuvashililidya venentete. Utawala wa Nnungu momo unkuvanavo malamulo lavaikidile venentete vake vaodedye. Shomya 1 Vakolintu 6:9-11, na badae mwambangile mwaa vyakudya vya mwina:

• Wako wona kenga shilambo shilota kuva dashi, vanu uti vakaigwilila malamulo ake Nnungu?a

• Da wako wona kenga Yeova ankuvanavo aki yakulota vanu uti vaigwilile malamulo la Utawala wake? Mwaa wa nyamani?

• Nyamani shilodya kenga vanu vákaodedya malamulo alo vankuulula kubadilika?—Lola nshitali 11.

KWAUNGWIPI

Utawala wa Nnungu ni ishilikali iu ivele kuwa na inauka nalangalalela shilambo uti.

Tukumbukilange

• Ni vanyani valota kulangalalela mu Utawala wa Nnungu?

• Mwaa shani Utawala wa Nnungu ni wambone kupunda dishilikali uti dya vanu?

• Yeova alindila venentete va Utawala wake vatende vinu shani?

LIPUNDISHE

Lola shapundishidye Yesu Utawala wa Nnungu uvele kwashi.

“Je, Ufalme wa Mungu Umo Moyoni Mwako?” (Makala iliyo kwenye mtandao)

Mwaa shani Mashaidi va Yeova vanatandola kukulupilika ku Utawala wa Nnungu kuleka dishilikali dya vanu?

Kuungila nkono Utawala wa Nnungu (1:43)

Lola Ibibiliya mwaivalangila kwaupande wa vanu 144.000 vatandalegwe namu Yeova valota kuka ndalangalalela namu Yesu.

“Ni Nani Wanaoenda Mbinguni?” (Makala iliyo kwenye mtandao)

Nyamani shintadidye kwamini nkongwe avele nkalaboshi kenga Nnungu bai ni alota kwangangola ungave-ishaliya mushilambo uti?

“Jinsi Nilivyopata Suluhisho la Ukosefu wa Haki” (Amkeni!, Novemba 2011)

Utawala wa Nnungu wanjenge kulangalalela kuwa mu mwaka wa 1914. Apo ni palatunduvenge maduva lamwisho adishilikali dya vanu. Tunkumanya dashi? Tunauka nalola nyamani shivalanga Ibibiliya kwaupande wa vinu avyo na nyamani shumilidile mushilambo tangu mwaka wa 1914.

1. Ibibiliya ivalenge nyamani?

Libuku limwe Daniyele linkutupwashela kumanya kenga Utawala wa Nnungu ukandyanjanga kulangalalela kumwisho wakati ushamegwa “wakati saba.” (Daniyele 4:16, 17) Vikapite myaka, Yesu andíshema wakati awo “kuva wakati wavo vamidi,” na nae andípundisha kenga wakati awo uvele ukanava kwila. (Lukashi 21:24) Tunauka nalipundisha kenga wakati saba umalilike mwaka wa 1914.

2. Kutunduvangila mwaka wa 1914 shilambo shivele dashi na vanu vankutenda nyamani?

Vakwoda vake Yesu vanímudya: “Twaulila! Da vinu avi vilota kutandeka duvani? shimanyikilo shani shilóta kulilodya kwida kwako na mwisho wawakati?” (Mateu 24:3) Yesu andívajang’ula avalanga vinu vyoe vishilota kutandeka muwakati washilota kutunduvanga kulangalalela kuwa kenga Umu wa Utawala wa Nnungu. Vinu vyatangwele ni ding’ondo, kwova kwa shakulya na vindangenda. (Shomya Mateu 24:7) Namomo Ibibiliya indívalanga mwashi mwavashilota “kuvalela vanu mumaduva amwisho.” (2 Timoti 3:1-5) Na kwamwaa wa shinu asho wakati ni wakujowa na vinu vyakunyata vinkuka mushu vyanjadyeka tangu mwaka wa 1914.

3. Mwaa shani matatisho mushilambo lankuka mushu lanjadyeka tangu ukatunduvange kulangalalela Utawala wa Nnungu?

Wakati padyoko baada Yesu kuva Umu wa Utawala wa Nnungu kuwa, nae andítenda ing’ondo namu Shatwani pamo na vandamoni. Mu ing’ondo ayo Shatwani andikatoka lyutu lyake kuwa. Ibibiliya inkushidoni “nae pamo na vanjelo vake vandijalegwa mushilambo shapai.” (Maono 12:9, 10, 12) Shatwani nae andishimwa poe mwaa ankumanya kenga andabamolegwa. Ndyomana nae ankumilidya matatisho na mauvilo loe mushilambo uti. Ashi shinkutupwashela kumanya mwaa shani shinamilo mushilambo ni shakukamadyanga! Kanji Utawala wa Nnungu undauka namalidya matatisho uti.

LAMBELA KUMANYA VYOE

4. Vyakulava vyamu Ibibiliya vinkuvalanga mwaka wa 1914

VIDEO: Utawala wa Nnungu wanjenge kulangalalela mu mwaka 1914 (5:02)

Nnungu aníntadya Umu wa ku Babiloni Nabucudonosor kulatanga. Kulatanga ako na mana lavalenge Daniyele, kushilodya nyamani shilota kutandeka mu Utawala umwe Nabucudonosor na Utawala wa Nnungu.—Shomya Daniyele 4:17.a

Shomya Daniyele 4:20-26, na badae tumila libau lyaamba 133 pakulota ujang’ule vyakudya vya mwina:

• (A) Nabucudonosor agwene nyamani mu kulatanga kwake?—Lola mishitali 20 na 21.

• (B) Nyamani shishilota kutandeka na nnandi?—Lola nshitali 23.

• (C) Nyamani shishilota kutandeka baada yakumalilika “wakati saba”?—Lola nshitali 26.

Kulatanga kwa nnandi kunkwigwania dashi na Utawala wa Nnungu

Shakulava (Daniyele 4:20-36)

Utawala

(A) Nnandi ukumene namene

Utawala vandimidya

(B) “Gwiya nnandi,” na “muleke upite wakati saba”

Utawala undaujila

(C) “Vandaujiya utawala wako kavili”

Kutandeka kutandi kwa shakulava ashi . . .

• (D) Nnandi ushimwamba nyani?—Lola nshitali 22.

• (E) Utawala vaukile naimidya dashi?—Shomya Daniyele 4:29-33.

• (F) Nyamani shintandeke Nabucudonosor baada kwila “wakati saba”?—Shomya Daniyele 4:34-36.

KUTANDEKA KUTANDI

Utawala

(D) Nabucudonosor Umu wa ku Babiloni

Utawala vandimidya

(E) Baada ya mwaka 606 U.W.K., Nabucudonosor ankuva kenga munu wakudulumbuka na hanaulula shinu kulangalalela mu myaka saba

Utawala undaujila

(F) Nabucudonosor andyujila kuva mumi na andyanjanga kulangalalela kavili

Kutandeka kwambili kwa shakulava ashi . . .

• (G) Nnandi awo ushimwamba nyani?—Shomya 1 Maimyo 29:23.

• (H) Utawala wavo vaimidídye dashi? Tunkumanya dashi kenga Utawala undyuka mushu vaimididye mpaka muwakati Yesu pavele mushilambo?—Shomya Lukashi 21:24.

• (I) Utawala awo vaujiidye duvani na kwashi?

KUTANDEKA KWAMBILI

Utawala

(G) Vaumu va ku Ishilaeli vashilodya kulangalalela kwake Nnungu

Utawala vandimidya

(H) Yelushalemu indibamolegwa na vaumu va ku Ishilaeli vandimila kulangalalela mu myaka 2.520

Utawala undaujila

(I) Yesu panjanga kulangalalela kuwa kenga Umu wa Utawala wa Nnungu

5. Shilambo shibadilike tangu mwaka wa 1914

Lola VIDEO.

VIDEO: Shilambo shibadilike tangu mwaka wa 1914 (1:10)

Yesu andivalanga mwashi mwashilota kuvalela shilambo baada nae kuva Umu. Shomya Lukashi 21:9-11, na badae mwambangile mwaa shakudya sha mwina:

• Undiwai kwona au kwigwa vinu vyavavalenge?

Myombe Paulu andívalanga mwashi mwavalota kuvalela vanu mu maduva lamwishu mu kulangalalela kwa vanu. Shomya 2 Timoti 3:1-5, na badae mwambangile mwaa shakudya sha mwina:

• Wako wona kenga vanu vankuvanavo mavalelo alo?

6. Tulota kupwashela Utawala wa Nnungu

Shomya Mateu 24:3, 14, na badae mwambangile mwaa vyakudya vya mwina:

• Shimadengo shani shikumene shilodya kenga Utawala wa Nnungu undyanjanga kulangalalela?

• Wako ulota kutenda nyamani pakulota kupwashela shimadengo asho?

Ambi Utawala wa Nnungu unkulangalalela, na muwakati wakuvandika unalangalalela mushilambo uti. Shomya Vabalaniya 10:24, 25, na badae mwambangile mwaa shakudya sha mwina:

• Nyamani shivaikidile kutenda kula munu “patwona kuvandika liduva apa”?

KWAUNGWIPI

Vyakulava vyamu Ibibiliya na vitandeka mushilambo, vinkulodya kenga Utawala wa Nnungu unkulangalalela. Patwandadya ntenga na patuka ku mikutano, tunkulodya kenga tunkwamini shinu asho.

Tukumbukilange

• Nyamani shitandeke wakati saba uvalangangigwa mulibuku limwe Daniyele?

• Nyamani shikupa wakika kenga Utawala wa Nnungu wanjenge kulangalalela mu mwaka wa 1914?

• Ulota kulodya dashi kwamini kwako kenga Utawala wa Nnungu unkulangalalela?

LIPUNDISHE

Lola nyamani shavandike vakuvalanga maimyo na vanu vanji kwaupande wa mabadiliko mushilambo tangu mwaka wa 1914.

“Maadili Yalipoporomoka Ghafula” (Amkeni!, Aprili 2007)

Lola shakulava shipatikana mu Mateu 24:14 mwashukidile nabadilisha shingumi sha nnume jumo.

“Nilipenda Mchezo wa Besiboli Kuliko Kitu Kingine Chochote!” (Mnara wa Mlinzi, Na. 3 2017)

Tunkumanya dashi kenga shakulava shipatikana mu Daniyele nnango wa 4 shinkwamba Utawala wa Nnungu?

“Ufalme wa Mungu Ulianza Kutawala Lini? (Sehemu ya 1)” (Mnara wa Mlinzi, Oktoba 1, 2014)

Tunkumanya dashi “wakati saba” uvalangangigwa mu Daniyele nnango wa 4 umalilike mu mwaka wa 1914?

“Ufalme wa Mungu Ulianza Kutawala Lini? (Sehemu ya 2)” ( Mnara wa Mlinzi, Novemba 1, 2014)

Utawala wa Nnungu undyanjanga kulangalalela. Muwakati wakuvandika undatenda mabadiliko makumene mushilambo shapai. Tuke tulole vinu vyambone vilota kuka natandedya Utawala wa Nnungu.

1. Utawala wa Nnungu ulota kwidanavo dashi amani na ishaliya mushilambo shapai?

Yesu, Umu wa Utawala wa Nnungu, andauka navabamola vanu vakalau na dishilikali uti mu ing’ondo ya Alimagedoni. (Maono 16:14, 16) Wakati awo, shakulivikila ashi shindauka ndatandeka: ‘Muwakati wakuvandika vakalau uti havapagwa kavili.’ (Dimu 37:10) Kwaindila ya Utawala awo Yesu andauka nakikisha kenga ipali amani na ishaliya mushilambo uti.—Shomya Ishaiya 11:4.

2. Shingumi shilota kuva dashi mushilambo shapai palota kutandeka malotelo lake Nnungu?

Valangalalegwa na Utawala wa Nnungu, ‘vanu vaishaliya vandanama mushilambo shapai mu myaka víkamalilika.’ (Dimu 37:29) Kumbukila unama mushilambo mwavavele vanu vaishaliya, vannagwaledya Yeova, na vananagwaladyania kula munu na muje! Vanu havauka shinu nava valwele, na kula munu andanama mu myaka víkamalilika.

3. Utawala wa Nnungu ulota kutandedya nyamani baada ya kuvabamola vakalau?

Baada ya kuvabamola vakalau, Yesu andalangalalela kenga Umu mu myaka 1.000. Wakati awo, Yesu na vakulangalalelamwagwe 144.000 vanavapwashela vanu vavele mushilambo shapai kuva vakukulupilika na vakavé lidambi. Kumwisho kwa myaka avyo, shilambo uti shinauka nava palaishu, na vanu uti vanauka napuwanga kwamwaa wakwigwilila malamulo lamwe Yeova. Badae Yesu anaujiya Utawala kwa Tatake Yeova. Muwakati awo, ‘lina limwe Yeova linauka nashwalela.’ (Mateu 6:9, 10) Yeova andauka nalodya kenga nae ni nkúlangalalela wambone na avatanana venentete vake. Badae Yeova anauka nambamola Shatwani, vandamoni, na vanu vanji valota kupinga kulangalalela kwake. (Maono 20:7-10) Kwamwaa wa Utawala wa Nnungu shingumi shinauka nava shambone namene mu myaka víkamalilika.

LAMBELA KUMANYA VYOE

4. Utawala wa Nnungu undauka nabamola dishilikali dya vanu

‘Munu ankutawala munu mwagwe kwa ukalau.’ (Nkúvalanga 8:9) Kupitila Utawala wake Yeova anamalidya ungave-ishaliya.

Shomya Daniyele 2:44 na 2 Vateshalonika 1:6-8, na badae mwambangile mwaa vyakudya vya mwina:

• Yeova na Mwanagwe Yesu, valota kutenda nyamani kwaupande wa dishilikali dya vanu na avalá vaungila nkono?

• Ukakumbukila vinu vyaulipundishidye kwaupande umwe Yeova namu Yesu, vinkukupa dashi wakika kenga kuukumu kwake Nnungu kundava kwa ishaliya?

5. Yesu ni Umu wambone

Kenga Umu wa Utawala wa Nnungu, Yesu andauka natenda vinu vyoe pakulota kuvapwashela venentete vake. Lola VIDEO pakulota wone kenga mwiu Yesu ankulota kuvapwashela vanu na Nnungu animupa dimongo pakulota kutenda shinu asho.

VIDEO: Yesu andilodya vinu vilota kutandedya Utawala (1:13)

Yesu pavéle mushilambo shapai andilodya vinu vilota kuka natenda Utawala wa Nnungu. Dinudyo shani dyavavalenge dyaulindilila wako na amu? Shomya maandiko alodyegwa pakulota ulipundishe vyoe kwaupande wa dinudyo adyo.

6. Utawala wa Nnungu unaidanavo shingumi shambone muwakati wamushu

VIDEO: Dinudyo dyambone dya wakati wamushu (4:35)

Shomya Dimu 145:16, na badae mwambangile mwaa shakudya sha mwina:

• Unkuligwa dashi kwa kumanya kenga Yeova anauka ‘natandedya malotelo a kula shinu shinama’?

KWAUNGWIPI

Utawala wa Nnungu undauka natandedya vinu uti vyalota Nnungu vitandeke. Undauka natadya shilambo kuva palaishu yavaumbele vanu vambone, valota kulipudya ngwengwe kumwe Yeova.

Tukumbukilange

• Utawala wa Nnungu ulota kuka dashi nashwaledya lina limwe Yeova?

• Mwaa shani tunkuulula kwamini kenga Utawala wa Nnungu undauka natandedya vyakulivikila uti vivele mu Ibibiliya?

• Kwa vinu vyoe vilota kuka natandedya Utawala wa Nnungu vinu shani vikunagwadile wako vitandeke?

LIPUNDISHE

Manya manaake Alimagedoni.

“Vita vya Har–Magedoni Ni Nini?” (Makala iliyo kwenye mtandao)

Manya nyamani shilóta kutandeka mu myaka 1.000 mu kulangalalela kumwe Yesu, namomo shomya nyamani shilóta kuka natandeka baada ya apo.

“Ni Nini Kitakachotokea Katika Siku ya Hukumu?” (Mnara wa Mlinzi, Septemba 1, 2012)

Lola likola likumbukilanga kwaupande wa dinudyo dya wakati wamushu dya Utawala wa Nnungu.

Likumbukile uvele ku palaishu (1:50)

Lishomo “Dívanavo vyakudya vyoe vishingudingadinga,” lola mwashi nnume washiyasha mwaukidile napata majibu a vyakudya vyavenavo vishimwangaisha.

“Biblia Inabadili Maisha” (Mnara wa Mlinzi, Januari 1, 2012)