LISHOMO 38
Tumbyanga shawadi ya shingumi
Tunkuulula kutenda vinu vyoe na lipuwilo kwamwaa tunkuvanavo shingumi. Ata tukapita mmatatisho, tunkuulula kupuwanga mushingumi. Tulota kuulula dashi kunnodya Yeova kenga tunkutumbyanga shawadi ya shingumi? Ishabaa shani ikumene itutadya wetu kutenda davo?
1. Mwaa shani ituvaikidile tutumbyange shingumi?
Ituvaikidile tutumbyange shingumi mwaa ni shawadi yaloka kwa Atata wetu walinagwaledyo, Yeova. Nae ni ‘lipata lya shingumi’—yani nae ni aumbile kula shinu shivenavo shingumi. (Dimu 36:9) “Nae ni ávapa vanu uti shingumi, imumu na uti vinu.” (Vitendo 17:25, 28) Yeova ankutupa vinu vyatulota pakulota tuke mushu tuvanavo shingumi. Kuleka apo, nae ankutupa wakika kenga tunkuulula kupuwanga na shingumi.—Shomya Vitendo 14:17.
2. Tulota kuulula dashi kunnodya Yeova kenga tunkutumbyanga shawadi ya shingumi?
Tangu pauvele mu shitumbo ukanava kuvalekwa, Yeova andikushunga. Ibibiliya inkuvalanga kenga Daudi ntumika umwe Yeova andíshwali aashidoni: ‘Meo lako laningwona nguvele lidingi.’ (Dimu 139:16) Shingumi shako shinkuvanavo mana namene pameo pake Yeova. (Shomya Mateu 10:29-31.) Yeova inampwateka namene akamwona munu amyaa munu junji shinamadi, au alibyaa jo mwene.a (Kuma 20:13) Yeova momo anavanavo shipalodi tukanatumbyanga shingumi shetu au tukavika mu shijoidyo shingumi sha munu junji. Patushililidya shingumi shetu na patwishimu shingumi sha vanu vanji, tunkulodya kenga tunkutumbyanga shawadi ai yambone ya shingumi.
LAMBELA KUMANYA VYOE
Lambela kumanya dindila shani dyaulota kulodya kenga unkutumbyanga shawadi ya shingumi.
3. Shunga shingumi shako
Vaklistu vandijaula shingumi shavo uti pakulota kuntumikila Yeova. Ni kenga vanavo vandijaula mili vyavo vive shadaka kwake Nnungu. Shomya Valoma 12:1, 2, na badae mwambangile mwaa vyakudya vya mwina:
Nyamani shilota kukutadya wako kushunga shingumi shako?
Kwa dindila shani dyaulota kuulula kutenda davo?
4. Lilaledye pakulota haunatadye ajali au kupela
Ibibiliya inkutwaulila pakulota tunyeme kutenda vinu vitadya shingumi shetu kuva mu shijoidyo. Lola VIDEO pakulota umanye nyamani shivaikidile wako utende pakulota uke mushu ulilaledya.
Shomya Mikong’o 22:3, na badae mwambangile mwaa nyamani shivaikidile utende pakulota ushililidye shingumi shako na shingumi sha vanu vanji . . .
paupagwa pakaja.
paupagwa ku madengo.
muwakati wakupikita.
pautukusha ligali au pautenda mwanda mushombo shoeshoe.
5. Ishimu shingumi sha ndyoko hakanava kuvalekwa
Daudi andívalanga kenga Yeova ankwangaikangila shingumi sha ndyoko avele mushitumbo sha anyoke. Shomya Dimu 139:13-17, na badae mwambangile mwaa shakudya sha mwina:
Kulingana na maoni lamwe Yeova, shingumi sha munu shanjanga nkongwe pava na shitumbo au ndyoko pavalekwa?
Malamulo lavapéle Yeova Vanaishilaeli lashinavashililidya vajujumunu na vana vákanava kuvalekwa. Shomya Kuma 21:22, 23, na badae mwambangile mwaa vyakudya vya mwina:
Yeova angwene dashi munu atadídye bila kulota kupela kwa ndyoko akanava kuvalekwa?
Yeova alota kuligwa dashi munu akatenda shinu asho shinamadi?b
Wako wona dashi maoni a Nnungu kwaupande wa shinu ashi?
Ata nkongwe atumbyanga shingumi ankuulula kwona kenga áli yake inkumupa litala lyakutingulanga shitumbo. Shomya Ishaiya 41:10, na badae mwambangile mwaa vyakudya vya mwina:
Ikava kenga nkongwe vankunkanyalidya pakulota atingulange shitumbo ivaikidile alambele lipwashalelo kumwe nyani? Mwaa wa nyamani?
VANU VANJI VANKUSHIDONI: “Nkongwe ankuvanavo aki yakutingulanga shitumbo—mwaa mili wake.”
Nyamani shikupa wakika kenga Yeova ankutumbyanga shingumi sha jujumunu na sha mwana hakanava kuvalekwa?
KWAUNGWIPI
Ibibiliya inkutupundisha kenga ituvaikidile tunagwaledye, twishimu, na tushililidye shawadi ya shingumi yatupele Yeova. Asho shinkuvika nkati shingumi shetu na shingumi sha vanu vanji.
Tukumbukilange
Mwaa shani shingumi sha munu shive na mana namene pameo pamwe Yeova?
Yeova aligwa dashi munu akatadya shinamadi kupela kwa munu?
Mwaa shani wako unkutumbyanga shawadi ya shingumi?
LIPUNDISHE
Tulota kuulula dashi kunnambwalela Yeova kwa shawadi ya shingumi?
Lola lijibu lya shakudya ashi, da Nnungu ankuulula kunnivaliva nkongwe atíngulenge shitumbo?
“Biblia Inasema Nini Kuhusu Kutoa Mimba?” (Makala iliyo kwenye mtandao)
Lipundishe maoni lake Nnungu kwaupande wa shingumi lavaikidile atulangalalele muwakati watutandola vinu vyakupikitila.
“‘Michezo Hatari’—Je, Ujihatarishe?” (Amkeni!, Oktoba 8, 2000)
Napanelo ikava kenga munu akumbukila kulipambilila? Lola Ibibiliya mwailota kuululila kumpwashela.
“Ninataka Kufa—Je, Biblia Inaweza Kunisaidia Ikiwa Ninawazia Kujiua?” (Makala iliyo kwenye mtandao)
a Yeova ankuvangaikangila namene avalá vavenavo ntima washipalodi. (Dimu 34:18) Nae ankumanya kupwateka kwona munu alota kulipambilila, na nae ankulota kumpwashela. Pakulota wone mwashi mwavapwashalela vanu pakulota vateme makumbukililo alo, shomya lishomo “Ninataka Kufa—Je, Biblia Inaweza Kunisaidia Ikiwa Ninawazia Kujiua?”
b Avalá vatingulenge vitumbo kala haivavaikidile valigwe kenga vankuvanavo makosha, Yeova ankuulula kuvalivaliva. Pakulota umanye vyoe, shomya lishomo “Biblia Inasema Nini Kuhusu Kutoa Mimba?” livele isemu ya Lipundishe ya lishomo ali.