LISHOMO 42
Ibibiliya ivalanga nyamani kwaupande wa vakulomba na vákalambile?
Mu diyadi dinji, vaona kenga munu ankuulula kuvanavo lipuwilo akalomba au akalombwa. Kanji havanava shinu vanu uti valambile au valambwidye vavenavo lipuwilo, namomo havanava shinu vanu uti vákalambile au vákalambwidye vakavenavo lipuwilo. Ibibiliya inkuvalanga kenga kulomba au kulombwa na kwikala vila ni shawadi yaloka kumwe Yeova.
1. Dipaida shani dipagwite kwa kwikala vila bila kulomba au kulombwa?
Ibibiliya inkushidoni: “Aijá annomba mwali wake ankutenda shana napane aijá ákalomba ankutenda shinu shambone namene-uti.” (Shomya 1 Vakolintu 7:32, 33, 38.) Inamuna shani yatenda shana munu ákalambile au ákalambwidye namene-uti? Vaklistu vákalambile au vákalambwidye havavenavo mangaikangilo akunshunga ntwamunu au ndyamunu. Ndyomana vankuvanavo ulu woe namene. Kwampano, voe pakati pavo vankuulula kwanjedya shimadengo shavo kwa kutenda mwanda kuka ku shilambo shinji pakulota kwandadya ntenga wambone. Kupunda vinu uti, vankuvanavo wakati woe pakulota kummandika Yeova.
2. Ipaida shani ipagwite pakati pakwandikisha shitamu?
Kenga mwavavalalele vákalambile au vákalambwidye, shitamu shinkuvanavo dipaida dyapagweka. Ibibiliya inkushidoni: ‘kudyanga vavili kuliko jumo.’ (Nkúvalanga 4:9) Ashi ni shinu shiu kupunda namene kwa Vaklistu vaodedya malamulo ákabadilika lamu Ibibiliya pakati pa shitamu shavo. Vaklistu vanandikisha shitamu vanalivikila kenga, vananagwaladyania, vanaishimiana kula munu na muje na vanashungana. Pavedoni, vanaligwa kuvanavo lishililidyo kuvapunda avalá vanama pamo bila kwandikisha shitamu. Na shitamu shinatadya kuvanavo lishililidyo na kuvashunga shana vana.
3. Yeova avenavo maoni shani kwaupande wa shitamu?
Yeova patunduvenge shitamu shitandi, atangwele doni: “Napavedoni, nnume andalyumadyanga patatake na panyoke kutwala kuka ndalyunganianga na nkongwe.” (Kutunduvanga 2:24) Yeova anakubali nnume na nkongwe kulakana ikava kenga ntwamunu au ndyamunu vaninkamula ugoni. Kwa shitendo kenga ashi Yeova anannakela litala ntwamunu au ndyamunu ikava kenga ankulota kujaula talaka yakulekana.a (Mateu 19:9) Yeova hanalota shinu Vaklistu vandye, tushidoni nnume kuvanavo vakongwe voe au nkongwe kuvanavo valume voe.—1 Timoti 3:2.
LAMBELA KUMANYA VYOE
Lipundishe mwashi mwaulota kuululila kuvanavo lipuwilo—na kumpuwangidya Yeova—ivedavo haulambile au undilomba.
4. Mwashi mwakutumilila shingumi shavo vákalambile na vákalambwidye
Yesu ashona ukalomba na ukalombwa kuva shawadi. (Mateu 19:11, 12) Shomya Mateu 4:23, na badae mwambangile mwaa shakudya sha mwina:
Yesu atumidile dashi shawadi yakutumikila kenga munu ákalambile pakulota kuntumikila Tatake na kuvapwashela vanji?
Kenga Yesu Vaklistu vankuulula kupuwangila shawadi yaukalomba au yaukalombwa. Lola VIDEO, na badae mwambangile mwaa shakudya sha mwina.
Vaklistu valota kuulula dashi kutumila shawadi yaukalomba au yaukalombwa mu inamuna yambone?
Wako ushindamanya?
Ibibiliya hainavalanga shinu shilinga shakulomba au shakulombwa. Kanji, inkuvapa ntima shii vanu pakulota valindile “wakati washinemba upite”, mwaa muwakati awo lilotelo lyakutenda wendi liva na dimongo namene na inkuululika kukamadyanga kumya wamushi walimanyilo.—1 Vakolintu 7:36.
5. Ntandole munu waulota kunnomba au kukulomba kwa limanyilo
Kuntandola munu wakulota kunnomba au kukulomba ni wamushi ukumene mushingumi. Shomya Mateu 19:4-6, 9, na badae mwambangile mwaa shakudya sha mwina:
Mwaa shani Nklistu haimmaikidile apajakange kulomba au kulombwa?
Ibibiliya inkuulula kukupwashela kummanya munu avaikidile pakulota kunnomba au kukulomba. Shinu shikumene munu ajo immaikidile antumikile Yeova.b Shomya 1 Vakolintu 7:39 na 2 Vakolintu 6:14. Badae mwambangile mwaa vyakudya vya mwina:
Mwaa shani ituvaikidile tunnombe au tulombwe na munu antumikila Yeova?
Yeova alota kuligwa dashi tukannomba au tukalombwa na munu ákantumikila Nae?
Vanyama vavili vakuvilingananga vakavaungila likangoti limo lyolyo vankuulula kwona kupwateka. Kulingana na mpano au, Nklistu alota kunnomba au kulombwa na munu hakantumikila Yeova nayadavo ankuulula kuvanavo matatisho loe
6. Avanavo maoni kenga lamwe Yeova kwaupande wa shitamu
Kala valume vashitenda imbande ya venentete vake Nnungu vashinapukananganavo na vadyavavo kwa dishabaa dyavo vo vene. Shomya Malakiya 2:13, 14, 16, na badae mwambangile mwaa shakudya sha mwina:
Mwaa shani Yeova anavangedya kulakana kúkaigwania na Ibibiliya?
Ugoni na kulakana kunaidanavo mauvilo kwa munu hakavenavo makosha pamo na vana
Lola VIDEO, na badae mwambangile mwaa shakudya sha mwina.
Ikava kenga wako ulambwidye na munu ákantumikila Yeova, ikuvaikidile utende nyamani pakulota uvenavo shitamu sha lipuwilo?
7. Vikila mmitendo ashilá shavalanga Yeova kwaupande wa shitamu
Panji munu ivaikidile alikanyalidye pakulota kuvikila mmitendo midimu vimwe Yeova kwaupande wa shitamu.c Kanji Yeova anauka nalaliya kulikanyalidya kwako. Lola VIDEO.
Shomya Vabalaniya 13:4, na badae mwambangile mwaa vyakudya vya mwina:
Kwa maoni lako, inkuululika kuvikila mmitendo kwa ashilá shavalanga Yeova kwaupande wa shitamu? Mwaa wa nyamani?
Vilambo vyoe, dishilikali dinavakanyalidya vanu pakulota vandikishe shitamu shavo pavalambana au pavalakana, Yeova alindila Vaklistu uti vaigwilile malamulo alo. Shomya Titu 3:1, na badae mwambangile mwaa shakudya sha mwina:
Ikava kenga wako undilomba au undilombwa, unkuvanavo wakika kenga shitamu shako undyandikisha ku ishilikali na shinkumanyika kulingana na malamulo?
VANU VANJI VANKUULULA KUDYA: “Mwaa shani ituvaikidile twandikishe shitamu ku ishilikali? Da hainatosha shinu kunama vila pamo?”
Wako ulota kujang’ula dashi?
KWAUNGWIPI
Kulomba au kulombwa na mene kulomba au kulombwa ni shawadi yaloka kumwe Yeova. Vakulomba au valambwidye na vákalambile au vákalambwidye, vankuulula kuvanavo lipuwilo na kuligwa shana mushingumi, ikava kenga vankunama kwodananga na malotelo lamwe Yeova.
Tukumbukilange
Ákalambile au ákalambwidye alota kutumila dashi shana shingumi shake?
Mwaa shani Ibibiliya inkuvalanga kenga ituvaikidile tunnombe au tulombwe na munu antumikila Yeova?
Indila shani ivalanga Ibibiliya yakulota kulakananga?
LIPUNDISHE
Kulomba au kulombwa “nkati mumwe Umu” mana ake nyamani?
“Maswali Kutoka kwa Wasomaji” (Mnara wa Mlinzi, Julai 1, 2004)
Lola video vitatu vingwipi vilota kukupwashela kumya wamushi wambone kwaupande wa mapenji na kulomba au kulombwa.
Lola mwaa shani nung’unumunu jumo andyona kenga Yeova, animupa shinu shambone kuliko ashilá shalakile kunyuma.
Nangu ndívanavo lilindililo kenga nae akandyuka ndalipundisha umwiu (1:56)
Ikava kenga ukumbukila kulakana au kwapukananga, vinu shani vivaikidile ukumbukile?
“Heshimu ‘Kile Ambacho Mungu Ameunganisha’” (Mnara wa Mlinzi, Desemba 2018)
a Lola imbande Igwa shana 4 pakulota umanye kwaupande wakulakana ikanapagwa ishabaa ya ugoni.
b Mu diyadi dinji, vatatamunu ni vanantandola nyani wakunnomba au kulombwa na mwanawavo. Napavedoni, vatatamunu valinagwaledyo, shinu shikumene shavanalola ni kumanya ikava kenga munu ajo ankunnagwaledya Yeova, i kulola kwaupande wa njuluku au mali.
c Ikava kenga unkunama na munu waukaungilenavo shitamu, unkuulula kwamuwa kunneka au kunga shitamu na munu ajo, kanji ni wamushi wako umwene.