Mateus

13 Na kel dia, Jizus sai di kaza i el xinta na bera-mar. 2 I djunta tantu algen na se vólta ki el entra na un barku. El xinta i tudu kes algen fika na bera-mar. 3 Nton, el uza ilustrasons pa inxina-s txeu kuza. El fla: “Nhos obi! Un simiador sai pa símia. 4 Timenti el staba ta símia, alguns simenti kai na bera di strada, i pasus ben i kume-s. 5 Otus kai na txon sô pédra undi ki ka tinha txeu téra, i es nase lógu pamodi kel txon ka éra fundu. 6 Má kantu sol sai, es kema, i dja ki es ka tinha raís, es murutxa. 7 Otus kai na meiu di spinhu, i kes spinhu kria i sufoka-s. 8 Inda otus kai na bon txon, i es kumesa ta da simenti, kel-li 100 bês más, kel otu 60 i kel otu 30. 9 Ken ki ten obidu, pa obi ku atenson.”

10 Nton, kes disiplu ben pa el i pergunta-l: “Pamodi ki bu ta uza ilustrasons pa pâpia ku es?” 11 El responde-s: “Anhos, Deus dexa nhos intende kes segredu sagradu di Reinu di séu, má es nau. 12 Pamodi ken ki ten, el ta dadu más, i el ta fika ku mutu más txeu inda, má ken ki ka ten, ti mésmu kel ki el ten, el ta tradu el. 13 É pur isu ki N ta uza ilustrasons pa N pâpia ku es; pamodi es ta odja, má es ta odja atoa, i es ta obi, má es ta obi atoa, i nen es ka ta intende. 14 I na ses kazu, sta ta kunpri kel profesia di Izaías li: ‘Nhos ta obi, má nhos ka ta intende nada; i nhos ta djobe, má nhos ka ta odja nada. 15 Pamodi korason di kes algen li bira duru. Es tapa ses obidu i es fitxa ses odju, asi pa nunka es ka odja ku ses odju, nen pa es ka obi ku ses obidu, nen pa es ka intende ku ses korason i pa es volta pa mi, i pa N kura-s.’

16 “Má, filís é nhos odju pamodi es ta odja i nhos obidu pamodi es ta obi. 17 Pamodi N ta fla nhos verdadi, ma txeu proféta i ómis justu krê odjaba kes kuza ki nhos sta ta odja, má es ka odja-s, i obi kes kuza ki nhos sta ta obi, má es ka obi-s.

18 “Gósi nhos obi ilustrason di kel ómi ki símia. 19 Óras ki un algen ta obi palavra di Reinu, má el ka ta intende-l, Malvadu* ta ben i el ta rinka kuzê ki simiadu na se korason. Kel-li é kel ki simiadu na bera di strada. 20 Kel ki simiadu na txon sô pédra, é kel ki ta obi palavra i lógu el ta seta-l ku alegria. 21 Má, dja ki el ka ten raís, el ta kontinua sô pa algun ténpu, i óras ki difikuldadis ô pirsigison ben pamodi palavra, el ta tropesa lógu. 22 Kel ki simiadu na meiu di spinhu, é kel ki ta obi palavra, má kes preokupason di kel mundu li* i puder ki rikézas ten pa ingana ta sufoka palavra, i el ka ta da frutu. 23 Kel ki simiadu na bon txon, é kel ki ta obi palavra i ta intende-l, i el ta produzi, kel-li ta da 100 bês más, kel otu 60, i kel otu 30.”

24 El konta-s otu ilustrason. El fla: “Reinu di séu pode konparadu ku un ómi ki símia bon simenti na se kanpu. 25 Timenti kel ómi staba ta durmi, se inimigu ben i el símia joiu na meiu di trigu i el bai se kaminhu. 26 Kantu planta kria i el produzi, joiu parse tanbê. 27 Nton, kes skravu di dónu di kaza ben i es pergunta-l: ‘Sinhor, nho ka símia bon simenti na kanpu di nho? Nton modi ki joiu parse la?’ 28 El responde-s: ‘Un ómi ki é nha inimigu faze kel-li.’ Kes skravu pergunta-l: ‘Nho krê, nton, pa nu bai i pa nu panha joiu?’ 29 El fla-s: ‘Nau, pamodi na panha joiu, nhos pode rinka trigu djuntu ku el. 30 Nhos dexa es tudu dôs kria djuntu ti kodjéta, i na ténpu di kodjéta N ta fla kes algen ki ta faze kodjéta: primeru nhos panha joiu i nhos mara-s fexu-fexu pa ba kema, dipôs nhos djunta trigu na nha armazén.’”

31 El konta-s otu ilustrason. El fla-s: “Reinu di séu é sima un simenti di mustarda ki un ómi panha i el símia na se kanpu. 32 Na verdadi, el é kel simenti más pikinoti, má óras ki el kria, el é kel planta di órta más grandi ki ten i el ta bira un arvi, asi kes pasu di séu ta ben i es ta atxa lugar di mora na se ramus.”

33 El konta-s otu ilustrason: “Reinu di séu é sima fermentu ki un mudjer panha i el mistura ku três medida grandi di farinha ti ki tudu kel masa fermenta.”

34 Jizus uza ilustrasons pa fla tudu kes kuza li pa kes monti di algen. Na verdadi, el ka ta flaba es nada sen uza ilustrason, 35 asi pa kunpri kel ki proféta dja flaba: “N ta ben abri nha bóka i N ta pâpia ku ilustrason; N ta ben fla kes kuza ki sta sukundidu désdi fundason.”*

36 Nton, dipôs ki el manda kes monti di algen bai ses kaminhu, el entra na kaza. Se disiplus txiga na el i es fla-l: “Splika-nu kel ilustrason di joiu na kanpu.” 37 El responde-s: “Kel simiador ki símia kel bon simenti é Fidju di Ómi. 38 Kanpu é mundu. Kel bon simenti é fidjus di Reinu, má joiu é fidjus di Malvadu.* 39 I kel inimigu ki simia-s é Diabu. Kodjéta é ténpu di fin di kel mundu li* i kes algen ki ta faze kodjéta é anjus. 40 Nton, sima joiu ta panhadu i ta kemadu na lumi, é si tanbê ki ta ben kontise na ténpu di fin di kel mundu li. 41 Fidju di Ómi ta ben manda se anjus, i es ta ben tra di se Reinu tudu kes kuza ki ta poi algen ta tropesa i kes algen ki ta faze kel ki é kóntra lei, 42 i es ta ben bota-s déntu fornadja ku lumi. É la ki es ta txora i es ta rintxa* denti. 43 Na kel ténpu, kes justu ta ben brilha klaru sima sol, na Reinu di ses Pai. Ken ki ten obidu, pa obi ku atenson.

44 “Reinu di séu é sima un tizoru sukundidu na un kanpu, ki un ómi atxa i el sukundi-l otu bês; i pamodi alegria ki el xinti, el bai, el bende tudu kuza ki el tinha i el kunpra kel kanpu.

45 “Tanbê, Reinu di séu é sima un komersianti ki ta viaja pa djobe pérulas di bon kualidadi. 46 Kantu el atxa un pérula di txeu valor, el bai i el bende lógu tudu kuza ki el tinha i el kunpra-l.

47 “Tanbê, Reinu di séu é sima un redi ki botadu na mar i ki panha pexi di tudu tipu. 48 Kantu el fika xeiu, es rasta-l ti téra, es xinta i es djunta kes bon pexi na sestu, má kes ki ka ta sirbi es bota-s fóra. 49 É kel-li ki ta ben kontise na ténpu di fin di kel mundu li. Anjus ta ben i es ta sipara kes algen mau di kes justu, 50 i es ta ben bota-s déntu fornadja ku lumi. É la ki es ta txora i es ta rintxa* denti.

51 “Nhos intende tudu kes kuza li?” Es responde-l: “Sin.” 52 Nton, el fla-s: “Na kel kazu li, tudu instrutor ki ta inxinadu sobri Reinu di séu é sima un ómi, dónu di un kaza, ki ta tra di se tizoru kuzas novu i kuzas bédju.”

53 Kantu Jizus tirmina di konta kes ilustrason li, el sai di la. 54 Dipôs ki el txiga na se sidadi, el kumesa ta inxina-s na ses sinagóga. Es fika dimiradu i es fla: “Undi ki es ómi konsigi kel sabedoria li i puder pa faze kes milagri li? 55 Kel-li é ka fidju di kel karpinteru? Se mai ka txoma Maria i se irmons é ka Tiagu, Juzé, Simon i Judas? 56 I se irmans ka sta tudu li ku nos? Nton, undi ki el konsigi tudu kes kuza li?” 57 Pur isu, es kumesa ta tropesa pamodi el. Má Jizus fla-s: “ Un proféta ta ruspetadu na tudu lugar, ménus na se téra i na se própi kaza.” 58 I el ka faze txeu milagri la pamodi ses falta di fé.