Primera di Pedru

2 Nton, nhos bandona tudu tipu di maldadi, mintira, finjimentu, invéja i tudu tipu di kalúnia. 2 Sima mininu ki kaba di nase, nhos dizenvolve un dizeju fórti pa kel leti puru* di palavra di Deus, asi pa nhos pode kria i ganha salvason, 3 pamodi dja nhos ten próva* ma Sinhor é bon.

4 Timenti nhos ta txiga pa el, ki é un pédra bibu ki ómis nega, má ki skodjedu i ki ten txeu valor pa Deus, 5 anhos ki é sima pédras bibu, nhos é un kaza ki sta ta fazedu ku spritu di Deus pa nhos ser un grupu di saserdóti santu, asi pa nhos pode oferese sakrifisius spritual ki Deus ta seta através di Jizus Kristu. 6 Pamodi ten un párti di Skrituras ki ta fla: “Nhos odja! N sta ta poi un pédra skodjedu na Sion, un pédra di kantu di alisérsi ki ten txeu valor, i kenha ki poi fé na el nunka ka ta fika diziludidu.”*

7 Pur isu, é pa nhos ki el ten txeu valor, pamodi nhos é krenti. Má, pa kes ki ka ta kridita, “kel pédra ki kes konstrutor nega, é kel ki bira kel pédra prinsipal di kantu”* 8 i “un pédra di tropesu i un rótxa ki ta poi pesoas ta kai”. Es ta tropesa pamodi es ka ta obi ku palavra di Deus. Es skodjedu pa kel obijetivu li. 9 Má nhos é “un rasa skodjedu, un grupu di saserdóti ki é rei, un nason santu, un povu ki Deus skodje, pa pâpia di kes kualidadi rei di bon”* di Kel ki txoma nhos di sukuru pa se lus maravilhozu. 10 Pamodi antis nhos ka éra un povu, má gósi nhos é povu di Deus. Antis nhos ka mostradu mizerikórdia, má gósi nhos resebe mizerikórdia.

11 Nhas irmon ki N krê txeu, dja ki nhos é stranjeru i nhos sta ta mora pa poku ténpu na es mundu, N ta pidi nhos pa nhos ka seta di ninhun manera kes dizeju di karni ki ta géra kóntra nhos.* 12 Nhos mante un bon konportamentu na meiu di kes algen di nason, asi pa óras ki es akuza nhos di faze kuzas mariadu, es ta ser tistimunha di nhos bon óbra, i na fin es ta da Deus glória na dia di se inspeson.

13 Pamodi Sinhor, nhos obi ku tudu autoridadi di ómi, ka ta inporta si é un rei, pamodi el sta riba nhos, 14 ô governadoris, ki el manda pa kastiga kes ki ta faze kuzas mariadu i pa lova kes ki ta faze kuzas dretu. 15 Pamodi vontadi di Deus é pa nhos faze kel ki é dretu, asi nhos ta pode kala bóka* di kes ki ka ten juís ki ta pâpia sen sabe. 16 Nhos ser sima algen livri, má ka nhos uza nhos liberdadi sima un diskulpa pa faze kuzas mariadu, má pa nhos ser skravu di Deus. 17 Nhos onra pesoas di tudu tipu, nhos ten amor pa irmons* na mundu interu, nhos ten txeu ruspetu pa Deus i nhos da rei ónra.

18 Pa kes ki é sérvu obi ku ses dónu ku txeu ruspetu, ka sô ku kes ki é bon i ikilibradu, má tanbê ku kes ki é difísil di agrada. 19 Pamodi Deus ta fika kontenti óras ki un algen ta aguenta difikuldadi* i el ta sufri injustisa pamodi se konsénsia dianti di El. 20 Pamodi si nhos sotadu pamodi nhos peka i nhos aguenta, kal ki é valor di kel-li? Má si nhos aguenta sufrimentu pamodi nhos sta ta faze kel ki é dretu, Deus ta fika kontenti ku kel-li.

21 Na verdadi, é pa kel-li ki nhos txomadu, pamodi ti mésmu Kristu sufri pa nhos, i el dexa un izénplu pa nhos sigi se pasu di manera fiel.* 22 El ka faze pekadu, nen el ka fla palavras ki ta ingana. 23 Kantu el staba ta insultadu,* el ka ta insultaba* tanbê. Kantu el staba ta sufri, el ka ta amiasaba kes ki staba ta pô-l ta sufri, má el dexa kel asuntu na mô di Kel ki ta julga ku justisa. 24 El mê el karega nos pekadu na se própi korpu, na staka,* asi pa nu pode moreba pa* pekadu i viveba pa justisa. I “pamodi se frida nhos kuradu”. 25 Pamodi antis nhos éra sima ovelha ki staba perdedu, má gósi nhos volta pa kel pastor i enkaregadu di nhos alma.*