Deuteronómiu

24 “Si un ómi kaza ku un mudjer, má el ka fika kontenti ku el pamodi algun kuza indisenti ki el diskubri sobri kel mudjer, nton el debe skrebe-l un sertidon di divórsiu, da-l kel sertidon i manda-l se kaminhu. 2 Dipôs ki el sai di se kaza el pode bira mudjer di otu ómi. 3 Si kel sugundu ómi odia-l* i el skrebe-l un sertidon di divórsiu, el da-l el i el manda-l se kaminhu ô si kel sugundu ómi ki kaza ku el móre, 4 nton kel primeru maridu ki mandaba el se kaminhu ka pode torna toma-l pa el ser se mudjer dipôs ki el bira inpuru, pamodi kel-li é un kuza ki Jeová ta ôdia. Bu ka debe traze pekadu riba di kel téra ki Jeová, bu Deus, da-u pa ser bu eransa.

5 “Un ómi ki ka dura ki kaza, ka debe bai trópa nen dadu ninhun otu responsabilidadi. El debe fika dispensadu duránti un anu, kontinua na kaza i faze se mudjer filís.

6 “Ningen ka debe toma un muinhu di mô ô kel pédra ki ta fika di riba pa ser garantia di un inpréstimu, pamodi si el faze si, el sta ta toma pa ser garantia un kuza ki algen ta meste pa el kontinua bibu.

7 “Si diskubridu ma un algen rapta un di ses irmon israelita, el maltrata-l i el bende-l, kel algen ki rapta debe móre. Bu debe kaba ku mal di bu meiu.

8 “Óras ki parse un kazu di lépra,* nhos ten kuidadu pa faze tudu kuza ki kes saserdóti levita fla nhos. Nhos toma kuidadu pa nhos faze sima N manda-s. 9 Lenbra di kuzê ki Jeová, bu Deus, faze ku Mirian na kaminhu, kantu nhos staba ta sai di Ijitu.

10 “Si bu inprista bu prósimu kalker kuza, bu ka debe entra na se kaza pa bu tra-l kel ki el da-u pa ser garantia. 11 Bu debe fika di ladu di fóra i kel ómi ki bu inprista-l debe traze pa fóra kel kuza ki el da-u pa ser garantia. 12 I si kel ómi é póbri, bu ka debe ba deta ku kel kuza ki el da-u pa ser garantia. 13 Lógu ki sol kanba bu debe divolve-l kel ki el da-u pa ser garantia, sen falta. I el ta ba deta ku se ropa i el ta abensua-u, i Jeová, bu Deus, ta odja ma bo é un algen justu.

14 “Bu ka debe splora un trabadjador kontratadu ki sta pasa nisisidadi i ki é póbri, ka ta inporta si é un di bus irmon ô un stranjeru ki ta mora na bu téra, déntu di bu sidadi.* 15 Bu debe paga-l se saláriu na kel mésmu dia, antis di sol kanba, pamodi el sta pasa nisisidadi i se vida* ta dipende di kel saláriu. Sinon, el ta txoma Jeová kóntra bo, i bu ta fika kulpadu di kel pekadu.

16 “Pai ka debe matadu pamodi kuzê ki ses fidju faze i fidjus ka debe matadu pamodi kuzê ki ses pai faze. Un algen debe matadu sô pamodi se própi pekadu.

17 “Bu ka debe faze julgamentu mariadu di un stranjeru ô di un mininu ki ka ten pai,* nen bu ka debe toma ropa di un viúva pa ser garantia di un inpréstimu. 18 Lenbra ma bu bira skravu na téra di Ijitu, i ma Jeová, bu Deus, liberta-u di la. É pur isu ki N sta ta da-u kel órdi li.

19 “Óras ki bu faze kodjéta di bu kanpu i bu skese di un fexu na kanpu, ka bu volta pa panha-l. Dexa-l pa kel stranjeru ki ta mora na bu meiu, pa mininu ki ka ten pai i pa viúva, asi pa Jeová, bu Deus, pode abensua-u na tudu kuza ki bu ta faze.

20 “Óras ki bu sakudi kes ramu di bu olivera, ka bu torna faze-l. Kel ki resta debe fika pa kel stranjeru ki ta mora na bu meiu, pa mininu ki ka ten pai i pa viúva.

21 “Óras ki bu kodje kes uva di bu plantason di uva, ka bu volta pa panha kes ki resta. El debe fika pa kel stranjeru ki ta mora na bu meiu, pa mininu ki ka ten pai i pa viúva. 22 Lenbra ma bu bira skravu na téra di Ijitu. É pur isu ki N sta ta da-u kel órdi li.