Primeru livru di Krónikas

10 Filisteus staba ta luta kóntra Israel. Kes ómi di Israel fuji di kes filisteu, i txeu di es matadu na monti Jilboa. 2 Kes filisteu bai tras di Saul ku ses fidju, es serka-s i es mata Jonatan, Abinadabe i Malkizua, ki éra fidjus di Saul. 3 Géra bira kada bês más fórti kóntra Saul. Kes arkeru odja Saul, es da-l ku flexa i Saul panha pankada. 4 Nton, Saul fla kel ajudanti ki ta karegaba se arma: “Puxa bu spada i mata-m, asi pa kes ómi ki ka sirkunsidadu ka maltrata-m.”* Má se ajudanti, ki ta karegaba se arma, ka krê fazeba kel-la pamodi el staba ku txeu medu. Nton, Saul panha se spada, el pô-l viradu pa el i el kai riba di el. 5 Kantu kel ajudanti di Saul odja ma Saul staba mortu, el tanbê el kai riba di se spada i el móre. 6 Nton Saul i ses três fidju móre, i tudu kes ki staba ta luta pa el* móre na kel dia. 7 Kantu tudu kes israelita ki staba na vali, odja ma tudu algen fuji i ma Saul ku ses fidju móre, es bandona ses sidadi i es fuji. Dipôs, kes filisteu volta i es fika ta mora la.

8 Na kel otu dia, kantu kes filisteu ba panha kes kuza di valor di kes algen ki móre, es atxa Saul ku ses fidju mortu na monti Jilboa. 9 Nton es duspi Saul, es korta-l kabésa i es tra-l se armadura. Es manda mensajerus pa tudu téra di kes filisteu pa ba spadja kel notísia pa ses deus i pa ses povu. 10 Dipôs, es poi se armadura na ténplu* di ses deus i es prinda se kabésa na ténplu di Dagon.

11 Kantu tudu kes algen di Jabes, na Jiliade, obi tudu kuza ki kes filisteu faze ku Saul, 12 tudu kes ómi balenti ba panha korpu di Saul i korpu di ses fidju. Es leba-s pa Jabes i es intera ses osu dibaxu di kel arvi grandi na Jabes, i es faze jejun duránti 7 dia.

13 Nton, Saul móre pamodi el ka foi fiel pa Jeová. El ka obi ku kuzê ki Jeová fla-l i tanbê el ba djobe orientason na un mudjer ki ta invokaba spritu, 14 envês di djobe orientason na Jeová. Pur isu, Deus poi Saul ta móre i el poi Davidi, fidju di Jesé, ta governa na se lugar.