Primeru livru di Krónikas
11 Un ténpu dipôs, tudu israelita djunta ku Davidi, na Ebron i es fla-l: “Nos é di mésmu sangi.* 2 Na pasadu, kantu Saul éra rei, éra nho ki ta giaba Israel na ses géra.* I Jeová, Deus di nho, fla nho: ‘Bu ta ben pastora nha povu Israel i bu ta ben ser líder di nha povu Israel.’” 3 Nton, tudu kes ansion di Israel ba atxa rei Davidi na Ebron, i Davidi faze un kontratu ku es na Ebron, dianti di Jeová. Dipôs, es skodje Davidi pa ser rei di Israel, sima Jeová dja flaba através di Samuel.
4 Un ténpu dipôs, Davidi i tudu Israel bai pa Jiruzalen, kel-li krê fla pa Jebus, na kel lugar ki jebuzeus ta moraba. 5 Kes jebuzeu faze trósa di Davidi i es fla: “Nunka bu ka ta entra li!” Má, Davidi toma Sidadi di Sion, ki oji ta txomadu Sidadi di Davidi. 6 Nton, Davidi fla: “Kel primeru algen ki ataka kes jebuzeu ta bira xéfi* i prínsipi.” Joabe, fidju di Zeruia, foi kel primeru algen ki subi pa ataka-s i el bira xéfi. 7 Dipôs, Davidi ba mora na kel sidadi. Pur isu, es txoma kel lugar di Sidadi di Davidi. 8 El kumesa ta faze muralha di sidadi i otus konstruson na se vólta, désdi kel monti ki ta txomadu Milu* ti kes otu lugar déntu di sidadi. I Joabe konpo kes otu párti di sidadi. 9 Nton, Davidi ba ta bira kada bês más fórti, i Jeová di izérsitu staba ku el.
10 Kes-li éra kes xéfi di kes trópa balenti di Davidi. Djuntu ku tudu kes israelita, es da Davidi txeu apoiu duránti se govérnu. Tudu es djuda-l bira rei di Israel, sima Jeová dja prometeba Israel. 11 Kel-li é lista di kes midjór trópa di Davidi: Jazobion, fidju di un akmonita i xéfi di kes três. Un bês el mata 300 ómi ku se lansa. 12 Dipôs di el, éra Eliazar, fidju di Dodai. Dodai éra fidju di Auí. El éra un di kes três midjór trópa. 13 El staba djuntu ku Davidi na Pas-Damin, na undi ki filisteus djunta pa luta. La tinha un plantason di sevada i kes trópa fuji pamodi kes filisteu. 14 Má Eliazar fika na meiu di kel plantason i el ka dexa-s toma kel txon. El mata kes filisteu, pur isu Jeová da-s un grandi vitória.*
15 Três di kes 30 xéfi ba inkontra ku Davidi na rótxa, na kavérna di Adulon, timenti kes trópa filisteu tinha ses ténda armadu na vali di Refain. 16 Na kel ténpu, Davidi staba sukundidu i staba un grupu di trópa filisteu na Belen. 17 I Davidi lenbra di kes agu sábi di Belen i el fla: “N tene gana di bebe agu di kel sistérna ki ta fika djuntu di porton di Belen!” 18 Nton, kes três trópa invadi kanpamentu di kes filisteu i es tra agu di kel sistérna, ki ta fika djuntu di porton di Belen, i es leba Davidi. Má, Davidi nega bebe kel agu i el baza-l na txon dianti di Jeová. 19 El fla: “Pamodi ruspetu ki N ten pa nha Deus, nunka N ka ta fazeba un kuza di kel-li! Modi ki N pode bebe sangi di kes ómi ki poi ses vida* na prigu? Pamodi es poi ses vida na prigu pa traze kel agu li.” Pur isu, el nega bebe kel agu. Kes-li é kes kuza ki kes três midjór trópa di Davidi faze.
20 Abizai, irmon di Joabe, bira xéfi di otu grupu di três. El mata 300 ómi ku se lansa i el éra txeu konxedu sima kes três primeru midjór trópa di Davidi. 21 Entri kes três, el ta distakaba más txeu ki kes dôs i el éra ses xéfi. Má el ka txiga na nível di kes três primeru.
22 Benaia, fidju di Jeoiada, éra un ómi korajozu* ki faze txeu kuza grandi na Kabziel. El mata kes dôs fidju di Ariel, di Moabe, el dixi na un sistérna na un dia ki tinha nevi i el mata un lion. 23 Tanbê, el mata un ómi di Ijitu ki éra grandi dimás, ki tinha más di dôs métru* di altura. Enbóra kel ómi di Ijitu tinha un lansa na mô, sima silindru ki ta uzadu pa faze tisidu, Benaia luta ku el ku un pó. Benaia konsigi toma kel ómi di Ijitu kel lansa ki el tinha na mô i el mata-l ku el. 24 Kes-li é kes kuza grandi ki Benaia, fidju di Jeoiada faze, i el éra txeu konxedu sima kes três midjór trópa di Davidi. 25 Enbóra el ta distakaba más txeu di ki kes 30, el ka txiga na nível di kes três. Má, Davidi skodje-l pa el ser se guarda-kósta.
26 Kes-li éra kes trópa balenti ki tinha na izérsitu: Azael, irmon di Joabe; Elanan, fidju di Dodai, di Belen; 27 Samote, di Arode;* Elês, di Bete-Pelete;* 28 Ira, fidju di Ikês, di Tekoa; Abiezer, di Anatote; 29 Sibekai, kel uzatita; Ilai, di Auí; 30 Marai, di Netofa; Elede, fidju di Baná, di Netofa; 31 Itai, fidju di Ribai, di Jibeá di Benjamin; Benaia di Piraton; 32 Urai, di vali di Gás; Abiel, di Bete-Arabá;* 33 Asmavete, di Baurin; Eliaba, di Salbin; 34 kes fidju di Azén, di Jinzu; Jonatan, fidju di Saje, kel ararita; 35 Aion, fidju di Sakar, kel ararita; Elifal, fidju di Ur; 36 Éfer, kel mekeratita; Aías, kel pelonita; 37 Esru, di Karmelu; Narai, fidju di Esbai; 38 Juel, irmon di Natan; Mibar, fidju di Agrí; 39 Zeleki, di Amon; Narai, di Bierote (el ta karegaba arma di Joabe, fidju di Zeruia); 40 Ira, kel itrita; Garebe, kel itrita; 41 Urias, di Ete; Zabade, fidju di Alai; 42 Adina, fidju di Siza, di tribu di Ruben (el éra xéfi di kes algen di tribu di Ruben i djuntu ku el, staba 30 trópa balenti); 43 Anan, fidju di Maká; Jozafá, kel mitnita; 44 Uzia, di Astarote; Sama i Jeiel, fidjus di Oton, di Aroer; 45 Jediael, fidju di Sinri, i se irmon Joa, kel tizita; 46 Eliel, kel mavita; Jeribai i Jozavias, fidjus di Elnaon; Itma, di Moabe; 47 Eliel, Obede i Jasiel, di Zobá.