Primeru livru di Krónikas
24 Davidi dividi kes família di Aron pa grupu. Kes fidju di Aron éra Nadabe, Abiú, Eliazar i Itamar. 2 Má, Nadabe i Abiú móre antis di ses pai i es ka tevi fidju. Eliazar i Itamar kontinua ta ser saserdóti. 3 Ku ajuda di Zadoki, família* di Eliazar, i Aimeleki, família di Itamar, Davidi organiza kes saserdóti na grupu pa faze ses trabadju. 4 Dja ki kes família di Eliazar tinha más xéfi di ki kes família di Itamar, es divididu di kel manera li: kes família di Eliazar tinha 16 xéfi di ses grupu di família, i kes família di Itamar tinha 8 xéfi di ses grupu di família.
5 Tanbê, kes família di Eliazar i kes família di Itamar, divididu pa sórti pamodi kes família di Eliazar i kes família di Itamar tinha kes xéfi ki éra responsável pa lugar santu, i tinha kes xéfi ki éra enkaregadu pa trabadju di Deus verdaderu. 6 Nton, Semaías, fidju di Netanel, i sekretáriu di kes levita, skrebe ses nómi dianti di rei, di kes prínsipi, di saserdóti Zadoki, di Aimeleki, fidju di Abiatar, i di kes xéfi di grupu di família di kes saserdóti i di kes levita. Es ba ta skodje kes grupu di família un tras di kel otu, un pa Eliazar i otu pa Itamar.
7 Primeru sórti kai na Jeoiaribe, sugundu sórti kai na Jedaías, 8 tirseru kai na Arin, kuartu kai na Seorin, 9 kintu kai na Malkias, sestu kai na Miamin, 10 sétimu kai na Akôs, oitavu kai na Abias, 11 nonu kai na Jezua, désimu kai na Sekanias, 12 désimu primeru kai na Eliazibe, désimu sugundu kai na Jakin, 13 désimu tirseru kai na Upa, désimu kuartu kai na Jezebiabe, 14 désimu kintu kai na Bilga, désimu sestu kai na Imer, 15 désimu sétimu kai na Ezir, désimu oitavu kai na Apizes, 16 désimu nonu kai na Petaías, vijézimu kai na Jeskel, 17 vijézimu primeru kai na Jakin, vijézimu sugundu kai na Gamul, 18 vijézimu tirseru kai na Delaías i vijézimu kuartu kai na Mazias.
19 É si ki es organizadu pa faze ses trabadju na kaza di Jeová. Es ta entraba la di akordu ku orientason ki ses família Aron da, sima Jeová, kel Deus di Israel, dja mandaba el.
20 Tanbê tinha kes levita li: di kes família di Anron, staba Subael; di kes família di Subael, staba Jedeías; 21 di kes família di Reabias, staba Isias, ki éra xéfi; 22 di kes família di Izar, staba Selomote; di kes família di Selomote, staba Jate; 23 di kes família di Ebron, staba Jerias, ki éra xéfi; sugundu éra Amarias, tirseru éra Jaziel i kuartu éra Jekamion; 24 di kes família di Uziel, staba Mika; di kes família di Mika, staba Samir; 25 di kes família di Isias, staba Zakarias. Isias éra irmon di Mika.
26 Kes fidju di Merari éra Mali i Muzi. Di kes família di Jazias, staba Benu. 27 Benu, Suon, Zakur i Ibri éra família di Jazias. Jazias i tudu kes ómi li éra família di Merari. 28 Eliazar éra família di Mali. Eliazar ka tevi ninhun fidju. 29 Jeramel éra família di Kis. 30 Kes família di Muzi éra Mali, Éder i Jerimote.
Kes-li éra família di Levi di akordu ku ses grupu di família. 31 Es tanbê es lansa sórti sima ses irmon, kes fidju di Aron. Es faze kel-li dianti di rei Davidi, di Zadoki, di Aimeleki i di kes xéfi di kes grupu di família di kes saserdóti i di kes xéfi di kes grupu di família di kes levita. Kes grupu di família di kes ómi más bédju tratadu di mésmu manera ki kes grupu di família di kes ómi más novu.