Primeru livru di Krónikas
28 Nton, Davidi djunta na Jiruzalen tudu kes prínsipi di Israel, kes prínsipi di kes tribu, kes xéfi di kes grupu ki ta sirbiba rei, kes xéfi di mil, kes xéfi di 100, kes enkaregadu di tudu rikéza i di kes animal di rei, kes enkaregadu di kes fidju di rei, kes funsionáriu di palásiu i tudu kes ómi fórti i ki tinha kapasidadi. 2 Dipôs, rei Davidi fika di pé i el fla:
“Nhos obi-m, nhas irmon i nha povu. Nha dizeju di korason éra fazeba un kaza pa ser un lugar di diskansu pa Arka di Kontratu di Jeová pa tudu ténpu i pa ser un bankinhu pa nos Deus poi pé, i N pripara kuzas pa faze kel konstruson. 3 Má Deus verdaderu fla-m: ‘É ka bo ki ta ben faze un kaza pa nha nómi, pamodi abo é un ómi di géra i bu mata txeu algen.’ 4 Má Jeová, Deus di Israel, skodje-m na meiu di tudu família di nha pai pa N bira rei di Israel pa tudu ténpu, pamodi el skodje Judá pa ser líder, i na meiu di tribu di Judá el skodje kaza di nha pai, i di kes fidju di nha pai, el skodje-m pa N bira rei di tudu Israel. 5 I di tudu nhas fidju, pamodi Jeová da-m txeu fidju, el skodje nha fidju Salumon pa xinta na tronu di Jeová i pa governa Israel.
6 “El fla-m: ‘É bu fidju Salumon, ki ta ben faze nha kaza i nhas pátiu pamodi N skodje-l pa el ser nha fidju i N ta bira se pai. 7 N ta poi se reinu ta fika firmi pa tudu ténpu, si el kontinua disididu na obi ku nhas mandamentu i nhas lei sima el sta ta faze oji.’ 8 Pur isu, N ta fla nhos dianti di tudu Israel, ki é kongregason di Jeová, i dianti di nos Deus: nhos sforsa pa nhos konxe i pa nhos obi ku kuidadu tudu kes mandamentu di Jeová, nhos Deus, asi pa nhos pode kontinua na kel bon téra li i pa nhos da nhos fidju el pa ser ses eransa pa tudu ténpu.
9 “I bo, Salumon, nha fidju, konxe Deus di bu pai i sirbi-l ku un korason konplétu* i ku bon vontadi, pamodi Jeová ta izamina tudu korason i el sabe tudu intenson di nos pensamentu. Si bu djobe-l, el ta dexa-u atxa-l, má si bu bandona-l, el ta nega-u pa tudu ténpu. 10 Lenbra ma Jeová skodje-u pa bu faze un kaza pa ser un santuáriu. Pur isu, ten koraji i kumesa trabadju.”
11 Nton, Davidi da se fidju Salumon, kel prujétu di konstruson di pórtiku,* di kes diferenti sala, di kes dispénsa, di kes sala di riba, di kes sala di pa déntu i di kel sala undi ki Deus ta púrdua pekadu.* 12 El da-l kel prujétu i tudu kel ki el resebe através di spritu di Deus, kel-li krê fla un prujétu pa kes pátiu di kaza di Jeová, di tudu kes lugar di kume na se vólta, di kes tizoru di kaza di Deus verdaderu i di kes tizoru ki santifikadu.* 13 Tanbê, el da-l instruson sobri kes grupu di kes saserdóti i di kes levita, sobri tudu kes trabadju ki es ta fazeba na kaza di Jeová i sobri tudu kes kuza ki es ta uzaba na sirvisu na kaza di Jeová. 14 Tanbê, el fla kantu oru ki es ta mesteba pa faze tudu kes kuza di oru, ki es ta uzaba na kes diferenti trabadju. Alén di kel-li, el fla kantu prata ki es ta mesteba pa faze tudu kes kuza di prata i tudu kes kuza ki es ta uzaba na kes diferenti trabadju. 15 Tanbê, el fla kantu oru ki es ta mesteba pa faze kes kandelabru di oru, i ses lánpida di oru, kes diferenti kandelabru i ses lánpida i tanbê kantu prata ki es ta mesteba pa faze kada kandelabru di prata i ses lánpida di prata, di akordu ku ses uzu. 16 Davidi tanbê fla kantu oru ki es ta mesteba pa faze kada méza pa pon sagradu,* kantu prata ki es ta mesteba pa faze kes méza di prata, 17 kantu oru puru ki es ta mesteba pa faze kes garfu, kes tijéla i kes jaru di oru, kantu oru ki es ta mesteba pa faze kes tijéla pikinoti di oru i kantu prata ki es ta mesteba pa faze kes tijéla pikinoti di prata. 18 Tanbê, el fla kantu oru refinadu ki es ta mesteba pa faze altar di insénsu i pa reprizentason di karu, ki é kes kerubin di oru ki sta ku aza abértu ta kubri Arka di Kontratu di Jeová. 19 Davidi fla: “Mô di Jeová staba riba mi, i el da-m sabedoria pa N skrebe tudu kes informason sobri es prujétu di konstruson.”
20 Dipôs, Davidi fla se fidju Salumon: “Ten koraji i ser fórti, i kumesa trabadju. Ka bu ten medu i nen ka bu fika dizorientadu, pamodi Jeová, nha Deus, sta ku bo. El ka ta dexa-u nen el ka ta bandona-u, má el ta ben sta ku bo ti ki finda tudu trabadju ki ten aver ku sirvisu na kaza di Jeová. 21 I li sta kes grupu di saserdóti i di kes levita pa faze tudu trabadju na kaza di Deus verdaderu. Bu tene trabadjadoris ki tene vontadi di trabadja i ki é bon na faze tudu tipu di trabadju, alén di prínsipis i tudu povu, ki ta ben sigi tudu bus orientason.”