Primeru livru di Krónikas

22 Nton Davidi fla: “Li ta ben ser kaza di Jeová, kel Deus verdaderu, i li ta ben fika kel altar pa kes oférta kemadu di Israel.”

2 Dipôs, Davidi manda djunta tudu kes stranjeru ki ta viveba na téra di Israel. El pô-s ta korta pédra i ta pripara-s pa faze ténplu* di Deus verdaderu. 3 I Davidi pripara un monti féru pa faze prégu pa kes porton i pa faze kes fitxadura. Alén di kel-li, Davidi da un monti kóbri ki ka ta daba pa peza. 4 Tanbê el da txeu madera di sédru, pamodi kes algen di Sidon i kes algen di Tiru trazeba Davidi un monti madera di sédru. 5 I Davidi fla: “Nha fidju Salumon é jóven i el ka ten spiriénsia,* i kel kaza ki sta ben fazedu pa Jeová debe ser bunitu dimás, asi pa se fama i se beléza bira ta papiadu di el na tudu téra. Pur isu, N ta pripara kuzas pa el.” Nton, antis di Davidi móre el ranja un monti material.

6 Dipôs, el txoma se fidju, Salumon, i el fla-l pa el faze un ténplu pa Jeová, kel Deus di Israel. 7 Davidi fla Salumon, se fidju: “Nha dizeju di korason éra faze un kaza pa nómi di Jeová, nha Deus. 8 Má, N resebe kel mensajen li di Jeová: ‘Bu mata txeu algen i bu luta na txeu géra. Pur isu, bu ka ta faze un kaza pa nha nómi, pamodi bu mata un monti di algen nha dianti riba téra. 9 Bu ta ben ten un fidju ki ta ser un ómi di pas,* i N ta ben poi tudu ses inimigu na se vólta ta dexa-l en pas, pamodi se nómi ta ben ser Salumon,* i na se ténpu N ta poi Israel ta vive na pas i soségu. 10 É el ki ta ben faze un kaza pa nha nómi. El ta ben ser nha fidju i N ta ben ser se pai. I N ta ben poi tronu di se govérnu ta fika firmi na Israel pa tudu ténpu.’

11 “I gósi, nha fidju, N ta pidi Jeová pa sta ku bo i pa tudu kuza kóre dretu ku bo, i pa bu faze kaza di Jeová, bu Deus, sima el promete ma bu ta faze. 12 Pa Jeová da-u sabedoria i intendimentu óras ki el da-u autoridadi riba di Israel, asi pa bu kunpri lei di Jeová, bu Deus. 13 Nton, bu ta ten bons rezultadu si bu obi ku kuidadu kes lei i kes régra ki Jeová manda Muizés pa da Israel. Ten koraji i ser fórti. Ka bu ten medu i nen ka bu fika dizorientadu. 14 N faze txeu sforsu pa N ranja tudu kes kuza li pa kaza di Jeová. N djunta 3 milhon i 400 mil kilu* di oru i 34 milhon di kilu* di prata i un monti kóbri i féru ki ka ta da pa peza. Tanbê N pripara madera i pédra, má abo bu ta ben ranja más kuza inda. 15 Bu tene txeu trabadjador ta trabadja pa bo, sima kes kortador di pédra, pedreru, karpinteru, i tudu tipu di trabadjador ki ten txeu kapasidadi. 16 Bu tene txeu oru, prata, kóbri i féru ki ka ta da pa peza. Pur isu, kumesa trabadju i pa Jeová sta ku bo.”

17 Dipôs, Davidi manda tudu kes prínsipi di Israel pa djuda se fidju Salumon. El fla-s: 18 “Jeová, nhos Deus, ka sta ku nhos, i el ka poi tudu nhos inimigu na nhos vólta ta dexa nhos en pas? I dja el poi tudu algen di kel téra li na nha mô, i é Jeová i se povu ki sta ta kontrola kel téra li. 19 Pur isu, nhos sta disididu na buska Jeová, nhos Deus, di tudu nhos korason i di tudu nhos alma.* I nhos kumesa ta faze santuáriu di Jeová, kel Deus verdaderu, asi pa nhos leba Arka di Kontratu di Jeová i kes kuza sagradu di Deus verdaderu, pa kel kaza ki ta ben fazedu pa nómi di Jeová.”