Ebreus
3 Pur isu, irmons ki é santu, kes ki ten párti na kel xamada* pa séu, nhos pensa na kel ki nu ta rekonhese* ma é apóstlu i saserdóti prinsipal, Jizus. 2 El foi fiel pa Kel ki skodje-l, sima Muizés tanbê foi fiel kantu el sirbi na kaza di Deus. 3 Pamodi atxadu ma el* merese más glória di ki Muizés, dja ki kel ki faze un kaza ten más ónra di ki kel própi kaza. 4 É klaru ki tudu kaza tevi un algen ki faze-l, má ken ki faze tudu kuza é Deus. 5 Muizés foi fiel na kaza interu di Deus. Se sirvisu éra un tistimunhu di kes kuza ki Deus ta ben flaba dipôs, 6 má Kristu foi fiel sima un fidju na kaza di Deus. Nos é Se kaza, désdi ki nu pega riju ti fin na kel liberdadi ki nu ten pa pâpia i na kel speransa ki nu ten orgulhu di el.
7 Pur isu, sima spritu santu ta fla: “Oji, si nhos obi se vós, 8 ka nhos bira nhos korason duru sima kantu nhos pô-m ta fika xatiadu, sima na kel dia ki nhos pô-m na próva na dizértu, 9 ki nhos gentis grandi pô-m na próva i es dizafia-m, enbóra es odja nhas óbra duránti 40 anu. 10 É pur isu ki N xatia ku kel jerason li i N fla: ‘Sénpri es disvia na ses korason, i es ka txiga di konxe nhas kaminhu.’ 11 Pur isu, N jura na nha raiba: ‘Es ka ta ben entra na nha diskansu.’”
12 Pur isu, irmons, nhos toma kuidadu pa ninhun di nhos ka afasta di kel Deus bibu, pamodi kel-li ta poi nhos ta dizenvolve un korason mau i sen fé. 13 Má nhos kontinua ta da kunpanheru koraji tudu dia, timenti nu sta vive na kel dia ki ta txomadu di “oji”, asi pa puder di pekadu ki ta ingana ka poi ninhun di nhos ta fika duru. 14 Pamodi sô nu ta ben partisipa na* kuzê ki Kristu sta ta partisipa, si nu pega riju ti fin na kel kunfiansa ki nu tinha na komésu. 15 É sima ta fladu: “Oji, si nhos obi se vós, ka nhos bira nhos korason duru sima kantu nhos pô-m ta fika xatiadu.”
16 Pamodi kenha ki obi i simé poi Deus ta fika xatiadu? Na verdadi, é ka tudu kes ki sai di Ijitu giadu pa Muizés? 17 Tanbê ku kenha ki Deus fika xatiadu duránti 40 anu? É ka ku kes ki peka i ki móre na dizértu? 18 I pa kenha ki el jura ma es ka ta entraba na se diskansu? É ka pa kes ki dizobidese? 19 Pur isu, nu ta odja ma es ka konsigi entra pamodi es ka tinha fé.