Ebreus

13 Nhos kontinua ta ama kunpanheru sima irmon. 2 Ka nhos skese di resebe algen dretu,* pamodi alguns resebe anjus sen es da kónta. 3 Nhos lenbra di kes ki sta na kadia,* sima si nhos staba na kadia djuntu ku es, i di kes ki sta ta maltratadu, dja ki nhos tanbê nhos sta na korpu.* 4 Tudu algen debe ruspeta kazamentu, i kama di kazadu debe ser puru, pamodi Deus ta ben julga kes ki ta faze konportamentu seksual mariadu* i kes ki ta faze adultériu. 5 Nhos manera di vive debe sta livri di amor pa dinheru, má nhos fika kontenti ku kes kuza ki nhos ten. Pamodi el fla: “Nunka N ka ta dexa-u i nunka N ka ta bandona-u.” 6 Pa nu fika xeiu di koraji i pa nu fla: “Jeová* é kel ki ta djuda-m. N ka ta xinti medu. Kuzê ki ómi pode faze-m?”

7 Nhos lenbra di kes ki ta orienta* nhos, kes ki pâpia ku nhos di palavra di Deus, i óras ki nhos odja rezultadu di ses konportamentu, nhos imita ses fé.

8 Jizus Kristu é kel mê onti, oji i pa tudu ténpu.

9 Ka nhos dexa pa alguns tipu di ensinu stranhu disvia nhos, pamodi é midjór pa korason resebe forsa através di kel grandi bondadi di Deus envês di kumida,* ki ka ta djuda kes ki ta preokupa ku el.

10 Nu ten un altar ki kes ki ta faze sirvisu sagradu na ténda ka ten direitu di* kume. 11 Pamodi korpu di kes animal ki saserdóti prinsipal ta leba ses sangi pa déntu di lugar santu pa ser oférta pa pekadu ta kemadu fóra di kanpamentu. 12 Pur isu, Jizus tanbê sufri fóra di porton di sidadi, asi pa el santifika povu ku se própi sangi. 13 Nton, nu bai inkontra ku el fóra di kanpamentu, i nu aguenta kel mésmu vergónha ki el aguenta, 14 pamodi nu ka ten un sidadi ki ta dura, má nu sta ta djobe ku inpenhu kel ki sta pa ben. 15 Através di el, sénpri nu oferese Deus un sakrifisiu di lovor, kel-li krê fla, kes palavra ki ta sai di nos bóka* óras ki nu ta pâpia na públiku sobri se nómi. 16 Tanbê ka nhos skese di faze kel ki é dretu i di dividi kel ki nhos ten ku otus, pamodi Deus ta fika kontenti ku kes sakrifisiu li.

17 Nhos obi ku kes ki ta orienta* nhos i nhos seta ses autoridadi, pamodi es ta kuida di nhos* i es ten ki presta kónta pa kel-li. Asi, pa es faze-l ku alegria envês di es xinti kansadu, pamodi kel-li ta prujudikaba nhos.

18 Nhos kontinua ta ora pa nos, pamodi nu ten serteza ma nu ten un bon konsénsia,* dja ki nu krê konporta ku onestidadi na tudu kuza. 19 Má N ta pidi prinsipalmenti pa nhos ora pa N volta pa nhos faxi.

20 Pa kel Deus di pas, ki resusita* nos Sinhor Jizus, kel grandi pastor di ovelha, ku sangi di un kontratu pa tudu ténpu, 21 da nhos tudu kes kuza dretu pa nhos faze se vontadi, i através di Jizus Kristu, pa el faze na nos kel ki ta agrada-l. Pa Deus dadu glória pa tudu ténpu. Amén.

22 Gósi, irmons, N ta pidi nhos pa nhos obi ku paxénxa kes palavra li ki ta da nhos koraji, pamodi N skrebe nhos un karta pikinoti. 23 N krê pa nhos sabe ma nos irmon Timótiu dja libertadu. Si el ka dura ki ben, N ta bai djobe nhos djuntu ku el.

24 Nhos da nha mantenha pa tudu kes ki sta ta orienta* nhos i pa tudu kes santu. Kes irmon na Itália sta ta manda nhos mantenha.

25 Pa Deus mostra nhos se grandi bondadi.