Ebreus

10 Pamodi dja ki Lei ten un sónbra di kes bons kuza ki sta pa ben, envês di kes kuza ki é própi verdadi, nunka el ka ta konsigi poi kes ki ta adora Deus ta bira perfeitu ku kel mésmu sakrifisiu, ki sénpri ta oferesedu tudu anu. 2 Si ka éra asi, es ka ta paraba di faze sakrifisiu? Pamodi si kes ki ta faze sirvisu sagradu dja es staba purifikadu, es ka ta kontinuaba ta xinti kulpadu más. 3 Má, kes sakrifisiu li ta lenbra-s di pekadu tudu anu, 4 pamodi sangi di toru i di bódi ka ta pode tra pekadu.

5 Pur isu, kantu Kristu entra na mundu, el fla Deus: “‘Bu ka kreba sakrifisiu nen oférta, má bu pripara-m un korpu. 6 Bu ka seta ofértas kemadu i nen ofértas pa pekadu.’ 7 Dipôs N fla: ‘Odja! Dja N ben (na rolu* sta skrebedu sobri mi) pa faze bu vontadi, ó Deus.’” 8 Primeru el fla: “Bu ka kreba nen bu ka seta sakrifisiu, ofértas, ofértas kemadu i nen ofértas pa pekadu”, kes-li é sakrifisiu ki ta oferesedu di akordu ku Lei. 9 Dipôs el fla: “Odja! Dja N ben pa faze bu vontadi.” El ta kaba ku kel primeru pa el poi kel sugundu. 10 É pamodi kel “vontadi” li ki nu santifikadu através di oférta di korpu di Jizus Kristu, un bês pa tudu ténpu.

11 Tanbê, tudu saserdóti ta toma se lugar tudu dia pa faze sirvisu sagradu* i pa faze kes mésmu sakrifisiu txeu bês, má kes sakrifisiu ka ta pode tra pekadu. 12 Má Kristu oferese sô un sakrifisiu pa pekadu pa tudu ténpu i el xinta na ladu direita di Deus, 13 el fika la ta spera ti ki se inimigus podu dibaxu di se pé.* 14 Pamodi é sô ku un sakrifisiu ki el poi kes ki sta ta ser santifikadu ta bira perfeitu pa tudu ténpu. 15 Alén di kel-li, spritu santu tanbê da-nu tistimunhu, pamodi primeru el fla: 16 “Jeová* ta fla: ‘Kel-li é kel kontratu ki N ta ben faze ku es dipôs di kel ténpu. N ta ben poi nhas lei na ses korason, i N ta ben skrebe-s el na ses menti.’” 17 Dipôs el ta fla: “N ka ta ben lenbra más di ses pekadu i di kes kuza ki es faze kóntra lei.” 18 Undi ki ten perdon di kes kuza li, ka meste más ninhun oférta pa pekadu.

19 Pur isu irmons, dja ki nu ten tudu serteza* pa uza kel kaminhu di entrada na lugar santu através di sangi di Jizus, 20 kel kaminhu novu i bibu ki el abri* pa nos através di kurtina, ki é se karni, 21 i dja ki nu ten un grandi saserdóti ta toma kónta di kaza di Deus, 22 nu txiga na Deus ku un korason sinseru i ku fé fórti, ku nos korason purifikadu di un konsénsia mau i ku nos korpu labadu ku agu linpu. 23 Nu kontinua ta pâpia di nos speransa pa tudu algen sen duvida, pamodi kel ki promete kes kuza li é fiel. 24 I nu pensa na kunpanheru* pa nu motiva* kunpanheru pa mostra amor i faze bons óbra, 25 ka nu dexa di sta na runion, sima alguns ten kustumu di faze, má nu da kunpanheru koraji, i mutu más inda sima nu ta odja kel dia ta txiga.

26 Pamodi si nu kontinua ta faze pekadu di abuzu dipôs ki nu resebe konhisimentu izatu di verdadi, ka ten ninhun sakrifisiu más pa nos pekadu, 27 má nu ta spera un kastigu ku medu i nu ta spera un raiba ki ta kema sima lumi, ki ta ben distrui kes ki é kóntra Deus. 28 Kalker algen ki viola Lei di Muizés ta matadu sen péna* di el, ku bazi na dôs ô três tistimunha. 29 Kuzê ki nhos ta atxa di un algen ki piza Fidju di Deus i ki da poku valor pa kel sangi di kontratu ki el santifikadu ku el, i ki ofende i dispreza spritu di Deus ki sta di akordu ku se grandi bondadi? El ka merese mutu más kastigu inda? 30 Pamodi nu konxe Kel ki fla: “Vingansa é di meu. N ta da-s kel ki es merese.” I tanbê: “Jeová* ta ben julga se povu.” 31 É un disgrasa kai na mô di kel Deus bibu.

32 Má, nhos kontinua ta lenbra di kes dia ki dja pasa, dipôs ki Deus límia nhos, nhos aguenta un grandi luta ku txeu sufrimentu. 33 Alguns bês nhos insultadu i nhos pirsigidu na frenti di tudu algen,* i alguns bês nhos fika na ladu di kes ki staba ta pasa pa kes kuza li. 34 Pamodi nhos mostra konpaxon pa kes ki staba na kadia i nhos ka perde nhos alegria kantu nhos tomadu kuzas ki nhos ten, pamodi nhos sabe ma nhos tene un eransa midjór i ki ta dura.

35 Pur isu, ka nhos perde nhos koraji,* pamodi nhos ta ben resebe un grandi rekonpénsa. 36 Pamodi nhos meste aguenta firmi, asi dipôs ki nhos faze vontadi di Deus, nhos pode resebe kel ki el promete. 37 Pamodi “más un bokadinhu”, “kel ki ta ben ta txiga, i el ka ta dimora.” 38 “Má nha sérvu justu ta ben vive pamodi fé”, i “si el volta pa tras, N* ka ta fika kontenti ku el”. 39 Nos é ka di kes ki ta volta pa tras pa ser distruídu, má nos é di kes ki ten fé pa salva nos vida.*