Ebreus
5 Tudu ómi ki ta skodjedu pa ser saserdóti prinsipal ta sirbi ómis na kes kuza ki ten aver ku ses adorason pa Deus, asi pa el pode faze ofértas i oferese sakrifisius pa ses pekadu. 2 El ta konsigi trata ku konpaxon* kes ki ta faze éru* pamodi iginoránsia, dja ki el tanbê el ten ki lida ku se própi frakéza, 3 i pamodi kel-li el ten ki faze ofértas pa se própi pekadu sima el ta faze pa kes pekadu di povu.
4 Un ómi ka pode ser saserdóti prinsipal di el pa el, má é sô Deus ki pode skodje-l, sima el skodjeba Aron. 5 Di mésmu manera, Kristu ka skodje se kabésa pa ser saserdóti prinsipal, sin, el ka da se kabésa glória, má é Deus ki da-l glória kantu el fla-l: “Abo é nha fidju i oji N bira bu pai.” 6 Tanbê, na un otu párti di Skrituras el fla: “Abo é saserdóti pa tudu ténpu sima Melkizideki.”
7 Duránti se vida na téra,* Kristu faze pididu i tanbê el inplora,* ku vós altu i ku lágua, pa Kel ki ta pode salvaba el di mórti, i el obidu pamodi se grandi ruspetu pa Deus. 8 Enbóra el éra se fidju, el prende ser obidienti pamodi kes kuza ki el sufri. 9 I dipôs ki el bira perfeitu, el bira responsável pa salvason pa tudu ténpu di tudu kes ki ta obi ku el, 10 pamodi Deus skodje-l pa el ser saserdóti prinsipal sima Melkizideki.
11 Nu ten txeu kuza pa fla sobri el, i é difísil di splika, pamodi nhos bira léntu na intende. 12 Pamodi, enbóra gósi nhos debe sérba instrutor, nhos meste pa algen inxina nhos désdi komésu kes primeru kuza di palavra sagradu di Deus, i nhos meste leti, envês di kumida fórti. 13 Pamodi tudu kel ki ta kontinua ta bebe leti el ka konxe palavras di justisa, pamodi el é un mininu. 14 Má kumida fórti é pa algen maduru, pa kes ki ta uza ses kapasidadi di pensa,* asi pa es pode trena-l pa sabe kuzê ki é dretu i kuzê ki é mariadu.