Ebreus

7 Pamodi kel Melkizideki li, rei di Salén i saserdóti di kel Deus Más Grandi, bai inkontra ku Abraon ki staba ta volta di kel géra ki el mata kes rei, i el abensua-l 2 i Abraon da-l* un désimu di tudu kuza. Primeru, se nómi traduzidu é “rei di justisa”, i tanbê el é rei di Salén, ki krê fla, “rei di pas”. 3 Sen pai, sen mai, sen lista di família, sen dia ki el nase nen dia ki el móre, má el fazedu sima Fidju di Deus, el ta kontinua saserdóti pa tudu ténpu.

4 Nhos odja modi ki kel ómi li éra inportanti, kel ki Abraon, kel xéfi di família,* da-l un désimu di kes midjór kuza ki el toma na géra. 5 É verdadi ki di akordu ku Lei, kes fidju di Levi ki ta skodjedu pa ser saserdóti, mandadu pa kobra dízimu di povu, kel-li krê fla, di ses irmons, enbóra es é disendenti di Abraon. 6 Má, kel ómi li ki ka éra di família di Levi resebe dízimu di Abraon i el abênsua kel algen ki fazedu kes promésa li. 7 Ka ta da pa nega ma é kel más grandi ki ta abênsua kel más pikinoti. 8 Kes levita resebe dízimu i es é ómi ki ta móre, má kel otu ómi ki resebe dízimu, Skrituras ta da tistimunhu ma el ta vive. 9 I nu pode fla ma mésmu Levi, ki resebe dízimu, paga dízimu através di Abraon, 10 pamodi inda el ka naseba sima un disendenti di Abraon kantu Melkizideki bai inkontra ku Abraon.

11 Nton, si trabadju di kes saserdóti di família di Levi ta poba pesoas ta biraba perfeitu (pamodi kel-li éra un sinal di Lei ki dadu pa povu), pa kuzê ki mesteba un otu saserdóti sima Melkizideki, envês di sima Aron? 12 Pamodi, óras ki trabadju di saserdóti ta mudadu, Lei tanbê ten ki mudadu. 13 Pamodi kel ómi ki ta fladu kes kuza li sobri el, ben di otu tribu, i ningen di es tribu ka sirbi na altar. 14 Pamodi sta klaru ma nos Sinhor éra disendenti di Judá, má simé Muizés ka fla ma ta binha saserdóti di es tribu.

15 I kel-li fika más klaru inda kantu parse otu saserdóti ki é sima Melkizideki. 16 El bira saserdóti, ka pamodi kel tribu ki el ben di el sima Lei ta iziji, má pamodi el ten puder ki ta da-l un vida ki ka pode distruídu. 17 Pamodi na un párti di Skrituras ta fla: “Abo é saserdóti pa tudu ténpu sima Melkizideki.”

18 Asi, kel mandamentu ki tinha antis ta kanseladu pamodi el é fraku i el ka ta pode djuda-nu. 19 Pamodi Lei ka bira nada perfeitu, má Deus da-nu un speransa midjór, i pamodi kel speransa nu ta pode txiga más pértu di el. 20 Tanbê, dja ki kel-li ka fazedu sen un juramentu 21 (pamodi é verdadi ki ten ómis ki bira saserdóti sen juramentu, má kel-li bira saserdóti através di un juramentu sobri el, ki fazedu pa Kel ki fla: “Jeová* faze un juramentu, i el ka ta muda di ideia:* ‘Abo é saserdóti pa tudu ténpu’”), 22 Jizus bira un garantia di* un kontratu midjór. 23 Tanbê, pamodi mórti, saserdótis ka ta konsigi kontinuaba na ses trabadju. É pur isu ki otus ta fikaba na ses lugar i es ta kontinuaba trabadju. 24 Má, dja ki el ta kontinua bibu pa tudu ténpu, ningen ka ta fika na se lugar di saserdóti. 25 Nton, tanbê el ta konsigi salva di manera konplétu kes ki ta txiga na Deus através di el, pamodi el sta sénpri bibu ta pidi pa es.

26 Pamodi nu meste un saserdóti prinsipal sima el, ki é lial, inosenti, sen mantxa, siparadu di kes pekador i ki podu pa riba di séu. 27 El é ka sima kes otu saserdóti prinsipal, dja ki el ka ten ki oferese sakrifisiu tudu dia, primeru pa se própi pekadu i dipôs pa pekadu di povu, pamodi el faze kel-la un bês pa tudu ténpu kantu el oferese se kabésa sima un sakrifisiu. 28 Pamodi Lei ta skodje ómis ki ten frakéza pa ser saserdóti prinsipal, má kel palavra di juramentu ki fazedu dipôs di Lei ta skodje un Fidju, ki biradu perfeitu pa tudu ténpu.