Kolosensis
2 Pamodi N krê pa nhos da kónta di kel grandi luta ki N ten pa djuda nhos, pa djuda kes ki sta na Laodisea i pa djuda tudu kes ki ka konsigi odja-m.* 2 Nha obijetivu é pa ses korason ser konsoladu i pa es sta tudu unidu na amor. Di kel manera li, es ta ten kes rikéza, ki krê fla intende dretu kel konhisimentu izatu sobri kel segredu sagradu di Deus, ki é Kristu. 3 Tudu kes tizoru di sabedoria i di konhisimentu sta sukundidu na el. 4 N sta fla kel-li pa ningen ka ingana nhos ku ideias ki ta konvense. 5 Enbóra N ka sta la djuntu ku nhos, N sta ku nhos na pensamentu,* i N sta kontenti di odja nhos bon órdi i nhos fé fórti na Kristu.
6 Pur isu, sima nhos seta Kristu Jizus, ki é Sinhor, nhos kontinua ta anda unidu ku el. 7 Sima nhos inxinadu, nhos raís debe sta ben finkadu i ta kria na Jizus, i nhos debe sta firmi na fé i sénpri ta agradese Deus.
8 Nhos toma kuidadu pa ningen ka leba nhos prézu ku filozofia i ideias falsu ki ka ten bazi na Kristu, má na tradisons di ómi i na kuzas di mundu. 9 Má tudu kualidadi di Deus sta konplétu na Kristu. 10 I nhos konsigi tudu kuza através di el, kel ki é kabésa di tudu govérnu i autoridadi. 11 Dja ki nhos ten fé na Kristu, nhos sirkunsidadu ka sima ómis ta faze, má nhos dexa di faze vontadi di nhos korpu ki ten pekadu. Kel-li é kel sirkunsizon di kes sigidor di Kristu. 12 Pamodi nhos interadu djuntu ku el na se batismu. I pamodi nhos sta unidu ku el i tanbê fé ki nhos ten na kes kuza ki Deus faze ku se puder, nhos resusitadu* djuntu ku el. Na verdadi, Deus resusita-l.*
13 Tanbê, enbóra nhos staba mortu pamodi nhos fadja i nhos karni ka staba sirkunsidadu, Deus da nhos vida djuntu ku el. Ku bondadi, el purdua-nu tudu nos fadja. 14 El paga* kel lei ki skrebedu kóntra nos i ki tinha txeu régra. El tra-l di kaminhu kantu el prega-l na staka di tortura.* 15 Através di el,* El duspi kes govérnu i kes autoridadi, el mostra-s na frenti di tudu algen ma el vense-s i el leba-s sima prézu.
16 Pur isu, pa ningen ka julga nhos pa kel ki nhos ta kume ô bebe, ô sobri un fésta ki ta fazedu tudu anu, ô lua nova ô un sábadu. 17 Kes kuza li é sónbra di kel ki staba pa ben, má es ta ben kunpriba na Kristu. 18 Alguns algen ta finji ma es é umildi i es ta adora anjus, má ka nhos dexa kes algen li inpidi nhos di ganha nhos prémiu. Es ta insisti* na kuzê ki es odja, es ta xinti orgulhu di kes kuza ki ka ten valor, pamodi es ta pensa sô na kuzas di karni. 19 I es ka ta mante unidu ku kabésa, ki é kel ki ta djuda pa korpu interu ten kel ki el meste i ki ta pô-l ta fika unidu através di ses junta i ses ligamentu, i ta kontinua ta kria ku puder di Deus.
20 Si nhos móre djuntu ku Kristu pa kes ideia di mundu, pamodi ki nhos ta kontinua ta vive sima ki inda nhos ta faze párti di mundu? Pamodi ki nhos ta kontinua ta obidese kes régra? I pamodi ki nhos ta kontinua inda ta obi ku kes mandamentu li: 21 “Ka bu pega, ka bu sprimenta, ka bu toka”? 22 Kes mandamentu li é sobri kes kuza ki ta kaba óras ki es uzadu. Es é mandamentus ki ómis ta inxina. 23 Kes mandamentu li ta parse ma es ta da sabedoria, má es ka ta djuda pesoas fika kóntra kes dizeju di ses korpu. Kel-li ta kontise pamodi kes algen ta disidi modi ki es ta adora Deus. Es ta poi ses korpu ta sufri pamodi es krê pa pesoas pensa ma es é umildi.