Ebreus
8 Kel-li é kel pontu prinsipal di kuzê ki nu sta fla: nu ten un saserdóti prinsipal sima kel-li, i el xinta na direita di tronu di kel Deus Grandi na séu. 2 El é sérvu* na kel lugar santu i na kel ténda di verdadi, ki é ka ómi ki faze, má Jeová. 3 Pamodi tudu saserdóti prinsipal ta skodjedu pa faze oférta i tanbê sakrifisiu. Pur isu, kel saserdóti prinsipal li tanbê meste tinha algun kuza pa oferese. 4 Si el staba na téra, el ka ta sérba saserdóti, pamodi dja ten ómis ki ta faze oférta di akordu ku Lei. 5 Kes ómi li ta faze sirvisu sagradu sima un kópia i un sónbra di kes kuza di séu, sima ta mostra na kel órdi ki Deus da Muizés, kantu el staba ta ba faze kel ténda. Pamodi El fla: “Toma kuidadu pa bu faze tudu kes kuza sima kel modelu ki bu mostradu na monti.” 6 Má gósi, Jizus resebe un trabadju* más inportanti, pamodi tanbê el é mediador* di un kontratu midjór, ki fazedu di manera legal ku bazi na kes promésa midjór.
7 Si kel primeru kontratu ka tinha fadja, ka mesteba un sugundu kontratu. 8 Pamodi el ta atxa fadja na povu óras ki el ta fla: “Jeová* fla: ‘Nhos odja! Ta ben txiga ténpu ki N ta ben faze un kontratu novu ku kaza di Israel i ku kaza di Judá.’ 9 Jeová* fla tanbê: ‘El ka ta ser sima kel kontratu ki N faze ku ses gentis grandi na kel dia ki N pega-s na mô pa N tra-s fóra di Ijitu, pamodi es ka kontinua fiel ku nha kontratu, pur isu N para di preokupa ku es.’
10 “Jeová* fla: ‘Pamodi kel-li é kel kontratu ki N ta ben faze ku kaza di Israel dipôs di kel ténpu. N ta ben poi nhas lei na ses menti, i N ta ben skrebe-s el na ses korason. I N ta ben bira ses Deus, i es ta ben bira nha povu.
11 “‘I es ka ta kontinua ta inxina kes algen di mésmu país ki es i ses irmon, ta fla: “Konxe Jeová!”* Pamodi tudu es ta ben konxe-m, désdi kel más pikinoti ti kel más grandi. 12 Pamodi N ta ben mostra mizerikórdia pa kes injustisa ki es faze, i N ka ta ben lenbra más di ses pekadu.’”
13 Kantu el fla “un kontratu novu”, el poi kel ki tinha antis ta kaduka. Un kuza ki dja kaduka i ki sta bira bédju, sta kuazi ta dizaparse.