Primeru livru di Krónikas

12 Kes-li é kes ómi ki djunta ku Davidi na Ziklagi, na kel ténpu ki el ka ta pode andaba livri di un ladu pa kel otu pamodi Saul, fidju di Kis. Es staba entri kes trópa balenti ki ta djudaba el na géra. 2 Es éra arkeru, ki ta uzaba funda pa da ku pédra i arku* pa da ku flexa. Es ta fazeba kel-li ku mô direita i ku mô skerda. I es éra irmon* di Saul, di tribu di Benjamin. 3 Kes-li éra kes ómi: Aiezer éra xéfi i Joás éra se ajudanti. Es éra fidju di Semá, di Jibeá. Tanbê tinha Jeziel i Pelete, ki éra fidjus di Asmavete; Beraka; Jeú, di Anatote; 4 Ismaías, di Jibion (ki éra un di kes 30 trópa balenti i ses xéfi); Jeremias; Jaziel; Joanan; Jozabade, di Jedera; 5 Eluzai; Jerimote; Bealias; Semarias; Sefatias, di Arife; 6 Elkana; Isias; Azarel; Joezer i Jazobion, ki éra disendentis di Korá. 7 Tanbê tinha Joela i Zebadias, fidjus di Jeron, di Jedor.

8 Alguns ómi di tribu di Gade toma ladu di Davidi i es ba atxa-l na dizértu, na undi ki el staba sukundidu. Es éra trópa balenti, trenadu pa géra i es staba armadu ku skudu grandi i ku lansa. Ses róstu éra sima di lion i es éra rápidu sima gazela na montanha. 9 Ezer éra xéfi, Obadias éra sugundu, Eliabe éra tirseru, 10 Mismana éra kuartu, Jeremias éra kintu, 11 Atai éra sestu, Eliel éra sétimu, 12 Joanan éra oitavu, Elzabade éra nonu, 13 Jeremias éra désimu i Makbanai éra désimu primeru. 14 Tudu kes ómi li, ki éra di tribu di Gade, éra xéfi di trópa. Kel ómi más fraku na ses meiu, ta baleba pa 100 trópa. I kel ómi más fórti na ses meiu, ta baleba pa mil trópa. 15 Es trabesa riu Jurdon, na primeru mês di anu, na ténpu ki riu ta intxiba i el ta binha pa téra séku. Es kóre ku tudu kes algen ki ta moraba na kes vali, na lésti i na oésti.

16 Alguns di kes ómi di tribu di Benjamin i di Judá tanbê ba atxa Davidi, na undi ki el staba sukundidu. 17 Nton, Davidi ba inkontra ku es i el fla-s: “Si nhos ben na pas pa djuda-m, nu ta bira amigu.* Má, si nhos ben pa trai-m i pa intrega-m na mô di nhas inimigu, enbóra N ka faze nada mariadu, pa Deus di nos gentis grandi odja kel-li i faze justisa.” 18 Nton, spritu di Deus ben riba di Amazai,* ki éra xéfi di 30, i el fla:

“Nu sta di bu ladu Davidi, fidju di Jesé, i nu ta sirbi-u.

Nton, Davidi resebe-s i el skodje-s pa es ser xéfi di ses trópa.

19 Alguns ómi di tribu di Manasés tanbê toma ladu di Davidi kantu el djunta ku kes filisteu pa ba luta kóntra Saul. Má Davidi ka djuda kes filisteu, pamodi dipôs ki kes governanti di kes filisteu pâpia ku kunpanheru, es manda-l bai se kaminhu, i es fla: “El ta ba fika na ladu di se sinhor Saul, i kel-li ta ben kusta nos kabésa.” 20 Kes-li é kes ómi di tribu di Manasés, ki toma ladu di Davidi kantu el txiga na Ziklagi: Adná, Jozabade, Jediael, Mikael, Jozabade, Eliú i Ziletai. Es éra xéfi di mil na tribu di Manasés. 21 Es djuda Davidi luta kóntra kel grupu di bandidu, pamodi es éra ómis balenti i korajozu, i es bira xéfi di trópa. 22 Tudu dia ta txigaba más ómi pa ba djudaba Davidi ti ki se kanpamentu bira grandi, sima kanpamentu di Deus.

23 Kel-li é nunbru di kes xéfi di kes ómi armadu pa géra, ki bai atxa Davidi na Ebron pa intrega-l govérnu di Saul, sima Jeová dja flaba. 24 Di tribu di Judá, tinha 6.800 ómi armadu ku skudu grandi i ku lansa, priparadu pa géra. 25 Di tribu di Simion, tinha 7.100 trópa fórti i korajozu.

26 Di tribu di Levi tinha 4.600 ómi. 27 Jeoiada éra xéfi di kes fidju di Aron i djuntu ku el staba 3.700 ómi. 28 Entri kes ómi staba Zadoki, un jóven fórti i korajozu, i el staba djuntu ku 22 xéfi di grupu di se família.

29 Di tribu di Benjamin, irmons* di Saul, tinha 3 mil ómi. Maioria di es éra lial pa Saul i pa família di Saul.* 30 Di tribu di Efrain, tinha 20.800 ómi fórti i korajozu, es éra ómis famozu na grupu di ses família.

31 Di metadi tribu di Manasés, tinha 18 mil ómi ki skodjedu pa nómi pa ba inkontra ku Davidi i pa poba el ta bira rei. 32 Di tribu di Isakar, tinha 200 xéfi. Es éra ómi ki sabia modi i na ki ténpu ki Israel debe ajiba. Tudu ses irmon staba dibaxu di ses órdi. 33 Di tribu di Zebulon, tinha 50 mil ómi ki pode sirbiba na izérsitu. Kes ómi staba prontu pa géra i armadu ku tudu tipu di arma di géra. Tudu es djunta ku Davidi i es éra konpletamenti lial pa el.* 34 Di tribu di Naftali, tinha mil xéfi i djuntu ku es staba 37 mil ómi armadu ku skudu grandi i ku lansa. 35 Di tribu di Dan, tinha 28.600 ómi prontu pa géra. 36 Di tribu di Azer, tinha 40 mil ómi ki pode sirbiba na izérsitu i ki staba prontu pa géra.

37 Di kel otu ladu di Jurdon, di tribu di Ruben, di tribu di Gade i di metadi tribu di Manasés, tinha 120 mil trópa ku tudu tipu di arma di géra. 38 Tudu es éra ómi di géra ki staba prontu pa luta. Es ben pa Ebron disididu na poi Davidi ta bira rei di tudu Israel, i tudu kes otu israelita tanbê krê* poba Davidi ta biraba rei. 39 I es fika três dia djuntu ku Davidi, ta kume i ta bebe, pamodi ses irmon di tribu di Judá dja priparaba kuzas pa es. 40 Tanbê kes ki ta moraba pértu di es i ti kes ki ta moraba lonji, sima tribu di Isakar, Zebulon i Naftali, traze buru, kamelu, mula i boi karegadu di kumida, sima farinha, tórta di figu séku, uva séku, vinhu i azeti. Tanbê, es traze un monti boi i ovelha pamodi tinha alegria na Israel.