Primeru livru di Krónikas
27 Kel-li é nunbru di kes israelita, kel-li krê fla di kes xéfi di grupu di família, di kes xéfi di mil, di kes xéfi di 100 i di ses enkaregadu ki ta sirbiba rei. Es ta kuidaba di tudu kes asuntu ki tinha aver ku kes grupu ki ta fazeba turnu tudu mês duránti anu. Kada grupu tinha 24 mil ómi.
2 Jazobion, fidju di Zabdiel, éra xéfi di primeru grupu i es ta sirbiba na primeru mês. Grupu di Jazobion tinha 24 mil ómi. 3 Jazobion éra disendenti di Peres. El éra xéfi di tudu kes xéfi di grupu ki skodjedu pa sirbi na kel primeru mês. 4 Dodai, disendenti di Auí, éra xéfi di kel grupu ki ta sirbiba na sugundu mês. Miklote éra se ajudanti i grupu di Dodai tinha 24 mil ómi. 5 Benaia, fidju di saserdóti prinsipal Jeoiada, éra xéfi di tirseru grupu i es ta sirbiba na tirseru mês. Grupu di Benaia tinha 24 mil ómi. 6 Kel Benaia li éra un di kes 30 trópa balenti i el éra xéfi di kes 30. Se fidju, Amizabade, éra enkaregadu di kel tirseru grupu. 7 Azael, irmon di Joabe, éra xéfi di kuartu grupu. Se fidju, Zebadias, bira xéfi na se lugar i es ta sirbiba na kuartu mês. Grupu di Zebadias tinha 24 mil ómi. 8 Samute, disendenti di Isra, éra xéfi di kintu grupu i es ta sirbiba na kintu mês. Grupu di Samute tinha 24 mil ómi. 9 Ira, fidju di Ikês, di Tekoa, éra xéfi di sestu grupu i es ta sirbiba na sestu mês. Grupu di Ira tinha 24 mil ómi. 10 Elês, kel pelonita, éra xéfi di sétimu grupu i el éra disendenti di Efrain. Es ta sirbiba na sétimu mês i grupu di Elês tinha 24 mil ómi. 11 Sibekai, kel uzatita, éra xéfi di oitavu grupu i el éra disendenti di Zerá. Es ta sirbiba na oitavu mês i grupu di Sibekai tinha 24 mil ómi. 12 Abiezer, di Anatote, éra xéfi di nonu grupu i el éra disendenti di Benjamin. Es ta sirbiba na nonu mês i grupu di Abiezer tinha 24 mil ómi. 13 Marai, di Netofa, éra xéfi di désimu grupu i el éra disendenti di Zerá. Es ta sirbiba na désimu mês i grupu di Marai tinha 24 mil ómi. 14 Benaia, di Piraton, éra xéfi di désimu primeru grupu i el éra disendenti di Efrain. Es ta sirbiba na désimu primeru mês i grupu di Benaia tinha 24 mil ómi. 15 Eldai, di Netofa, éra xéfi di désimu sugundu grupu i el éra disendenti di Otniel. Es ta sirbiba na désimu sugundu mês i grupu di Eldai tinha 24 mil ómi.
16 Kes-li é kes líder di kes tribu di Israel: Eliézer, fidju di Zikri, éra líder di tribu di Ruben. Sefatias, fidju di Maká, éra líder di tribu di Simion. 17 Azabias, fidju di Kemuel, éra líder di tribu di Levi. Zadoki éra líder di kes disendenti di Aron. 18 Eliú, un di kes irmon di Davidi, éra líder di tribu di Judá. I Onri, fidju di Mikael, éra líder di tribu di Isakar. 19 Ismaías, fidju di Obadias, éra líder di tribu di Zebulon. Jerimote, fidju* di Asriel, éra líder di tribu di Naftali. 20 Ozeias, fidju di Azazias, éra líder di tribu di Efrain. Juel, fidju di Pedaías, éra líder di metadi tribu di Manasés. 21 Idu, fidju di Zakarias, éra líder di metadi tribu di Manasés na Jiliade, i Jasiel, fidju di Abner, éra líder di tribu di Benjamin. 22 Azarel, fidju di Jeron, éra líder di tribu di Dan. Tudu kes ómi li éra prínsipi di kes tribu di Israel.
23 Davidi ka konta kes ómi ki tinha ménus di 20 anu, pamodi Jeová dja prometeba ma el ta biraba israelitas txeu sima strélas na séu. 24 Joabe, fidju di Zeruia, kumesa ta konta povu, má el ka tirmina di faze-l. Deus fika txeu xatiadu ku Israel* pamodi Davidi manda konta povu i nunbru di kes algen ki es konta ka skrebedu na livru di stória di ténpu di rei Davidi.
25 Asmavete, fidju di Adiel, éra enkaregadu di kes tizoru di rei. Jonatan, fidju di Uzias, éra enkaregadu di kes armazén* na kes kanpu, na kes sidadi, na kes vila i na kes tori. 26 Esri, fidju di Kelube, éra enkaregadu di kes agrikultor ki ta trabadjaba na kanpu. 27 Simei, di Ramá, éra enkaregadu di kes plantason di uva. Zabdi, di Sifmote, éra enkaregadu di kes armazén di guarda vinhu ki es ta fazeba ku kes uva ki es ta panhaba na kodjéta. 28 Baal-Anan, di Jeder, éra enkaregadu di kes pé di olivera i di kes pé di figu* na Sefelá, i Joás éra enkaregadu di kes armazén di azeti. 29 Sitrai, kel saronita, éra enkaregadu di kes boi ki ta staba na kes kanpu di Saron, i Safate, fidju di Adilai, éra enkaregadu di kes boi ki ta staba na kes vali. 30 Obil, disendenti di Ismael, éra enkaregadu di kes kamelu, i Jedeías, di Meronote, éra enkaregadu di kes buru.* 31 Jazis, kel agarenu, éra enkaregadu di kes ovelha. Tudu kes ómi li éra enkaregadu di tudu kes rikéza di rei Davidi.
32 Jonatan, subrinhu di Davidi, éra un ómi intilijenti. El ta daba konsedju i el éra sekretáriu. Jeiel, fidju di Akmoni, ta kuidaba di kes fidju di rei. 33 Aitofel ta daba rei konsedju, i Uzai, kel arkita, éra amigu* di rei. 34 Dipôs di Aitofel, kes ómi ki ta daba rei konsedju éra Jeoiada, fidju di Benaia, i Abiatar. I Joabe éra xéfi di kes trópa di rei.