Intruduson

Un sinhor, ki txoma ­Dauda, fla: “N kriadu na un zóna pikinoti, ki ta fika na nórti di Séra Lioa. Un bês kantu mi éra mininu, nha família ku otu família staba ta briga un txon. Es tudu staba ta fla ma kel txon éra di ses. Pa rezolve kel prubléma es txoma un fitiseru. El poi un spedju na mô di un ómi i dipôs el kubri-l ku un panu branku. Kel ómi kumesa ta treme i ta baza soris. Kantu el djobe pa kel spedju el fla: ‘N sta ta odja un sinhor di idadi ta txiga! El sta bistidu un ropa branku i el é altu. El ten kabélu branku i el ta anda un bokadinhu nkurvadu.’

“El staba ta pâpia di nha avó! Dipôs el kumesa ta fika uma nervozu i el grita: ‘Si nhos ka ta kridita na mi, nhos ben odja ku nhos odju!’ É klaru ki ninhun di nos ka tevi koraji di faze kel-la! Pa poi kel ómi ta fika kalmu, kel fitiseru faze majia ku uns fódja ku agu i el bota-l.

“Nha ‘avó’ pâpia através di kel ómi ki tinha kel spedju na mô, i el fla-l ma kel txon éra di nha família. El fla nha avó, ki inda staba bibu, pa el símia kel txon sen preokupa txeu. Kel otu família seta kel disizon i prubléma fika rezolvidu.”

Kes kuza li ta kontise manenti na Áfrika. Má é ka sô la, kes kuza li ta kontise na otus párti di mundu, i milhons di algen ta kridita ma mortus ta bai pa un mundu di spritu i di la es ta pode odja i influensia vida di algen na Téra. Má kel-li ta kontise mê? Mortus sta bibu mê? Si es ka sta bibu, nton kenha ki é kes algen ki ta fla ma es é spritu di algen mortu? É rei di inportanti sabe respósta pa kes pergunta li, pamodi nos vida ta dipende di kel-li.