Ki tipu di algen éra Jizus?

Jeová manda Jizus pa Téra. 1 João 4:9

Si nu krê pa Deus fika kontenti ku nos, nu meste obi ku un otu algen inportanti. Monti ténpu antis di Jeová faze Adon, el faze un anju na Séu ki ten txeu puder.

Monti ténpu dipôs, Jeová manda kel anju pa Téra pa nase di un mudjer vírjen, ki txomaba Maria, na sidadi di Belen. Nómi di se fidju éra Jizus. — João 6:38.

Kantu Jizus staba na Téra, el mostra tudu manera di ser di se pai. El ta trataba tudu algen dretu, ku amor i ningen ka ta xintiba vergónha di txiga na el. Jizus ka tinha medu di inxina pesoas verdadi di Jeová.

Jizus faze kuzas dretu, má simé es odia-l. 1 Pedro 2:21-24

Jizus tanbê kura duentis i el resusita alguns algen ki dja moreba.

Kes xéfi di relijion tinha raiba di Jizus pamodi el ta mostraba ma kuzas ki es ta inxinaba éra mintira i ses konportamentu éra mariadu.

Kes xéfi di relijion konta kes governanti di Roma mintira pa pô-s ta da Jizus ku xikóti i ta mata-l.