Milagri na Mar Burmedju

Lógu ki Faraó obi ma israelitas dja sai di Ijitu, el muda di ideia otu bês. El fla se trópas: ‘Nhos pripara tudu nhas karu di géra i nu bai ses tras! Éra pa nu ka dexaba es sai.’ El ku se trópas kumesa ta bai tras di israelitas.

Jeová sta ta giaba se povu. El ta uzaba un núven pa gia-s di dia i lumi pa giaba es di noti. El leba-s pa Mar Burmedju i el fla-s pa es arma ténda pa es fika na el.

Dipôs, israelitas odja Faraó ku se trópas ta ben ses tras. Es ka tinha undi bai. Ses frenti tinha mar i ses tras staba trópas di Faraó. Es fla Muizes: ‘Nu sta ben móre! Pamodi ki bu ka dexaba nos na Ijitu?’ Má Muizes fla: ‘Ka nhos xinti medu. Nhos fika kétu i nhos odja modi ki Jeová ta ben salva nhos.’ Bu ka ta atxa ma Muizes ta kunfiaba na Jeová di verdadi?

Jeová fla israelitas pa dizarma téndas. Na kel noti, Jeová muda núven di lugar. El pô-l na meiu, pa sipara trópas di Ijitu di israelitas. Pa ladu di trópas di Ijitu staba sukuru, má pa ladu di israelitas staba klaru.

Jeová fla Muizes pa stika mô pa mar. Dipôs Jeová faze un béntu fórti duránti kel noti. Mar abri i fika un kaminhu déntu meiu. Kes milhon di israelita anda na téra séku na meiu di mar.

Trópas di Faraó entra na meiu di mar, na téra séku, tras di israelitas. Nton, Jeová pô-s na konfuzon. Ródas di karu kumesa ta rinka. Trópas di Faraó grita: ‘Nu sai di li! Jeová sta luta pa es.’

Jeová fla Muizes: ‘Stika mô pa mar.’ Mar fitxa i tudu kel agu kai riba trópas di Ijitu. Faraó ku tudu se trópas móre. Ninhun ka skapa.

Na kel otu ladu di mar, milhons di algen lova Deus ku un múzika ki ta fla si: ‘Kanta pa Jeová, pamodi el podu riba la. El bota kabalu na mar djuntu ku kenha ki staba montadu na el.’ Timenti es staba ta kanta, mudjeris staba ta badja i ta toka tanbor. Tudu algen staba rei di kontenti pamodi gósi es éra livri di verdadi.