Jizus resusitadu

Dipôs ki Jizus móre, un ómi riku ki txomaba Juzé, pidi Pilátus pa dexa-l tra korpu di Jizus di staka. Juzé nbrudja korpu di Jizus na panu di linhu finu, el poi purfumu ku ólhu spesial i el pô-l na un sipultura ki nunka ningen ka interadu na el. El tapa sipultura ku un pédra grandi. Xéfi di saserdótis fla Pilátus: ‘Nu tene medu pa disiplus di Jizus ka panha se korpu i dipôs pa es fla ma el resusita.’ Nton Pilátus fla-s: ‘Nhos fitxa sipultura dretu i nhos poi guarda la.’

Três dia dipôs, sédu palmanhan, alguns mudjer bai sipultura i es atxa pédra roladu na ladu. Déntu sipultura un anju fla kes mudjer: ‘Ka nhos xinti medu. Jizus dja resusita. Nhos bai i nhos fla se disiplus pa nkontra ku el na Galilea.’

Maria Madalena bai faxi bai atxa Pedru ku Juan. El fla-s: ‘Algen dja panha korpu di Jizus!’ Pedru ku Juan kóre pa sipultura. Kantu es odja ma nada ka staba la, es bai pa ses kaza.

Kantu Maria volta pa sipultura, el odja dôs anju la déntu i el fla-s: ‘N ka sabe undi ki es poi nha Sinhor.’ Dipôs el odja un ómi i el pensa ma el éra jardineru. Maria fla-l: ‘Sinhor, favor fla-m undi ki nho pô-l.’ Má kantu ki ómi fla-l: “Maria!”, el da kónta ma el éra Jizus. El grita: “Instrutor!” i el brasa-l. Jizus fla-l: ‘Bai bu fla nhas irmon ma bu odja-m.’ Kel óra, Maria kóre pa disiplus i el fla-s ma el odja Jizus.

Na kel dia di tardi, dôs disiplu staba ta anda di Jiruzalen pa un otu lugar ki txomaba Emaús. Un ómi bai djuntu ku es na kaminhu i el pergunta-s sobri kuzê ki es staba ta papiaba. Es fla: ‘Bu ka obi kuzê ki kontise? Dja ten três dia, ki xéfi di saserdótis manda mata Jizus. Gósi alguns mudjer sta ta fla ma el sta bibu!’ Kel ómi pergunta-s: ‘Nhos ka ta kridita na profétas? Es fla ma Kristu ta moreba i dipôs el ta resusitaba.’ El kontinua ta splika-s kuzê ki Skrituras ta flaba. Kantu es txiga na Emaús, disiplus pidi kel ómi pa bai ku es. Na óra di kume, kantu ki el faze orason, es da kónta ma el éra Jizus. Dipôs el dizaparse.

Kes dôs disiplu bai faxi pa Jiruzalen, na kaza ki apóstlus staba djuntadu i es fla-s kuzê ki kontise. Timenti es staba déntu kaza, Jizus parse pa tudu es. Na komésu apóstlus ka staba ta kridita ma el éra Jizus. Nton el fla-s: ‘Nhos odja nha mô; nhos pode poi mô. Dja staba skrebedu ma Kristu ta moreba i ta resusitaba.’