3 Modi ki nu debe faze orason?

TXEU tradison di relijion ta konsentra más na puzison ki un algen debe sta óras ki el ta faze orason, na palavras ki el debe uza i na ritual. Bíblia ta djuda-nu ka konsentra na kes kuza li, má konsentra na kel párti inportanti di pergunta: “Modi ki nu debe faze orason?”

Bíblia ta pâpia di sérvus fiel di Deus ki ta oraba na txeu situason i na txeu puzison. Es ta oraba déntu di es ô ku vós altu di akordu ku situason. Timenti es ta oraba es ta djobeba pa séu ô es ta nbaxaba. Envês di es uza imajis, térsu ô livrus di orason, es ta papiaba di korason. Pamodi ki Deus obi ses orason?

Sima kel otu artigu dja flaba, es ta fazeba ses orason sô pa un Deus, Jeová. Má, ten otu kuza txeu inportanti. Nu ta lé sobri el na 1 João 5:14: “Kel-li é kunfiansa ki nu ten na el: ka ta nporta kuzê ki nu pidi di akordu ku se vontadi, el ta obi-nu.” Nos orason debe sta di akordu ku vontadi di Deus. Kuzê ki kel-li krê fla?

Pa nu ora di akordu ku vontadi di Deus, nu meste sabe kal ki é se vontadi. Nton, studa Bíblia é un kuza inportanti ki ta djuda-nu óras ki nu ta faze orason. Má kel-li krê fla ma Deus ta obi nos orason sô si nos é studiozus di Bíblia? Nau, Deus ta spéra pa nu prende kal ki é se vontadi, pa nu sforsa pa nu ntende-l i pa nu faze sima nu prende. (Mateus 7:21-23) Nos orason ten ki sta di akordu ku kes kuza ki nu ta prende.

Sima nu ta ba ta prende sobri Jeová i se vontadi, nos fé ta bira más fórti. Kel-li é un otu kuza inportanti na orason. Jizus fla: ‘Tudu kuza ki nhos pidi na orason, ku fé, nhos ta resebe.’ (Mateus 21:22) Fé ka krê fla kridita na tudu kuza ki nu ta obi. Má, krê fla kridita na un kuza ki sikrê nu ka ta odja, nu ten próva klaru sobri kel-li. (Hebreus 11:1) Na Bíblia nu ta atxa txeu próva ma Jeová, ki é un algen ki nu ka ta odja, é un algen rial, ki nu pode kunfia i el sta prontu pa responde orason di kes algen ki ten fé na el. Tanbê sénpri nu pode pidi más fé, i Jeová krê da-nu kes kuza ki nu meste. — Lucas 17:5; Tiago 1:17.

Ten otu kuza inportanti inda na modi ki nu ta faze orason. Jizus fla: ‘Ningen ka ta txiga na nha Pai si ka é através di mi.’ (João 14:6) Nton é sô através di Jizus ki nu ta konsigi txiga na nos Pai, Jeová. Pur isu, Jizus inxina se sigidoris pa ora na se nómi. (João 14:13; 15:16) Kel-li ka krê fla ma nu debe ora pa Jizus. Má, nu debe ora na nómi di Jizus i lenbra ma é através di el ki nu ta konsigi txiga na nos Pai ki é perfetu i santu.

Un bês kes sigidor di Jizus ki éra más se amigu pidi-l: “Sinhor, inxina-nu modi ki nu debe ora”. (Lúkas 11:1, Bíblia na Progrésu di Traduson pa Lingua Kabuverdianu, BPK) É klaru ki es ka krê sabeba sobri kes asuntu ki nu kaba di pâpia di el li. Má, kuzê ki es krê sabeba éra sobri ki asuntus es debe oraba.