Jardin di Éden — Foi kel primeru lugar ki izisti algen na Téra?
IMAJINA ma bu sta na un jardin. La ka ten nada ki ta tra-u bu pas. Bu ka ta obi ninhun son di karu ta pasa, nen ninhun barudju kasábi. Kel jardin é uma grandi i el ten un anbienti sábi di pas. Más sábi inda, é ki bu ka ten ninhun preokupason, bu ka ten ninhun duénsa, ninhun alerjia i ninhun dór. Bu ta pode xinti, odja i obi dretu tudu kuza sábi ki sta na bu vólta.
Bus odju ta brilha sô di odja kes flor ku un monti kor uma bunitu, ku kel agu linpu na un riu, kes monti planta verdi, uns más klaru, otus más sukuru, uns na sónbra, otus na sól. Bu ta xinti béntu ta da-u na róstu i ta traze kes txeru sábi di naturéza. Bu ta obi kel barudju sábi di fódjas ta da na kunpanheru, di agu ta da na rótxa, di pasus ta kanta i di insétus. Óras ki bu ta pensa na kel-li, ka ta da-u gana di sta na un lugar si?
Pesoas di tudu lugar na mundu ta kridita ma tinha un lugar asi na komésu. Duránti txeu séklu, pesoas di relijions diferenti sima judeus, musulmanus i kes ki ta kridita na Jizus prende sobri jardin di Éden, kel lugar na undi ki Deus poi Adon ku Eva. Bíblia ta fla ma kel kazal li tinha un vida sábi i filís. Es ta daba dretu ku kunpanheru, ku animal i ku Deus, ki éra kel algen ki daba es speransa di vive pa tudu ténpu na kel lugar sábi. — Génesis 2:15-24.
Kes algen di relijion indu ten ses própi krénsa sobri un paraízu ki izisti na ténpu antigu. Budistas ta kridita ma kes xéfi inportanti di ses relijion, ki es ta txoma Buda, ta parse na un ténpu spesial ki es ta txoma ténpu di oru, i es ta kridita ma óras ki kel-li ta kontise, mundu ta sta sima un paraízu. I txeu relijion na Áfrika ta konta alguns stória ki é kuazi igual ku kel di Adon ku Eva.
Algen di txeu kultura i relijion diferenti ta kridita ma kes primeru algen ki vive na Téra ta moraba na un paraízu. Un skritor fla: “Na pasadu txeu algen ta kriditaba na un paraízu ki izistiba, undi tudu kuza éra perfetu, pesoas ta viveba livri i na pas, es éra filís, tinha kumida avontádi, es ka tinha medu di nada i es ka tinha ninhun prubléma nen difikuldadi. . . Pamodi kel krénsa li, txeu algen ten vontadi di vive na kel paraízu ô di atxa un manera di torna vive na el.”
Dja ki txeu kultura diferenti ten stórias kuazi igual sobri un paraízu, kel-li ka ta pô-nu ta pensa ma jardin di Éden i Adon ku Eva izistiba mê?
Na es ténpu ki siênsia dja diskubri txeu kuza, txeu algen ta faze trósa di kel ideia li i es ta fla ma el é sô un stória inventadu. Un kuza ki ta dexa-nu más dimiradu inda é ki própi xéfis di relijion ta inxina ma jardin di Éden ka izistiba. Es ta fla tanbê ma kel ki Bíblia ta fla sobri el é sô fantujada ô un stória inventadu sô pa inxina un lison.
É simé ki Bíblia ten txeu stória sô pa inxina-nu un lison. Própi Jizus konta alguns di kes stória ki é txeu konxedu. Má kel ki Bíblia ta fla sobri jardin di Éden é ka sô un stória pamodi el izistiba mê. Alén di kel-li, si kes kuza ki Bíblia ta fla sobri jardin di Éden ka kontise, nton modi ki nu pode kunfia na kes otu párti di Bíblia? Nu ta ben odja pamodi ki alguns algen ka ta kridita na jardin di Éden i si es ten razon pa pensa si. Dipôs nu ta ben odja pamodi ki kel stória li é inportanti pa nos.