N prende ma Jeová ten mizerikórdia i el ta púrdua

MODI KI ÉRA NHA VIDA ANTIS:

N kriadu na un zóna póbri na sidadi di Montreal. Kantu N tinha 6 mês, nha pai móre i tudu responsabilidadi di família fika riba di nha mai. Nos éra 8 fidju. Ami éra kel más pikinoti.

Sima ténpu ba ta pasa, N ranja amizadi ku bandidus. Tanbê N nvolve ku dróga, ku djuga batóta i ku violénsia. Kantu N tinha 10 anu, N kumesa ta faze mandadu pa prostitutas i pa kes algen ki ta pistaba dinheru di manera ilegal i ta kobraba juru uma altu. Sénpri N ta kontaba mintira i N ta xintiba sábi di ranja kalker artimanha pa N nganaba algen. Kel-li éra un vísiu pa mi.

Kantu ki N tinha 14 anu, dja N biraba uma bon na ranja maneras diferenti pa N nganaba algen. Pur izénplu, N ta kunpraba txeu rilójiu, pulsera i anel ki pasadu na oru líkidu i dipôs N ta skrebeba na es ma es tinha más di ki metadi di oru. N ta bendeba es na rua i na lugaris di para karu na kes lója grandi. N gostaba txeu di ranjaba dinheru di manera fásil. Un bês N ganha 10.000 dóla di Kanadá (kuazi 747 kontu) sô na un dia!

Kantu ki N tinha 15 anu, N koredu ku el di kel lugar ki ta podu kes menór di idadi ki ten mau konportamentu. N ka tinha undi bai. Nton, N fika ta durmi kada óra na un lugar. Alvês N ta durmiba na rua, na prasa ô na kaza di alguns algen ki N konxeba.

Pamodi kes kuza ilegal ki N ta fazeba, txeu bês pulísias ta fazeba mi perguntas. Má kómu N ka ta bendeba kuzas furtadu, nunka N ka bai kadia. Simé, txeu bês N paga multas karu pamodi N ta nganaba algen, N ta falsifikaba kuzas i N ta bendeba sen ten lisénsa. Dja ki N ka tinha medu di ningen, N ta ba kobraba kes algen ki pistaba dinheru na kes bandidu. Kel-li éra un kuza prigozu, pur isu alvês N ta lebaba un pistóla. Alguns bês N trabadja ku kes organizason di krimi.

MODI KI BÍBLIA MUDA NHA VIDA:

N tinha 17 anu kantu N obi ta papiadu di Bíblia pa primeru bês. N staba moradu djuntu ku nha namorada kantu el kumesa ta studa Bíblia ku Tistimunhas di Jeová. Má, mi éra kóntra kes prinsípiu di Bíblia sobri konportamentu. Nton, N dana ku el i N ba mora ku un otu namorada ki nu staba ta namora tanbê.

Sô ki el tanbê el kumesa ta studa Bíblia ku Tistimunhas di Jeová! N fika spantadu pamodi el kumesa ta faze mudansas i el bira un algen más kalmu i ku más paxénxa. Nton, N seta un konviti pa sisti runion na Salon di Reinu di Tistimunhas di Jeová. Kes algen tinha bon konportamentu. Es resebe-m dretu i es mostra-m bondadi. Es éra diferenti di kes algen ki N konxeba! Nunka nha família ka mostra-m amor. N ta xintiba falta di karinhu i atenson kantu ki mi éra mininu. É kel amor ki tinha entri Tistimunhas di Jeová, ki N staba ta meste própi. Nton, kantu Tistimunhas di Jeová konvida-m pa N studa Bíblia ku es, N seta lógu.

Kel ki N staba ta prende na Bíblia, talvês salva nha vida. Mi ku nhas dôs kunpanheru nu staba ta faze planus pa bai furta, asi pa N pode pagaba nha dívida di más di 50.000 dóla di Kanadá (uns 3.700 kontu) pamodi djogus di batóta. Filismenti N dizisti di kel planu li! Má nhas dôs kunpanheru ka dizisti. Kantu es bai furta, un di es matadu i kel otu bai kadia.

Sima N ba ta studa Bíblia, N odja ma tinha txeu mudansa ki N meste fazeba. Pur izénplu, N prende kel ki Bíblia ta fla na 1 Coríntios 6:10. La ta fla: ‘Kes ladron, kes ki ten ganánsia, kes ki ta bebe dimás, kes ki ta injúria otus algen i kes ki ta ngana algen pa toma-s ses kuza, ka ta erda Reinu di Deus.’ Kantu N lé kel testu li N txora pamodi N odja ma nha situason éra gravi. N da kónta ma N mesteba muda nha vida konpletamenti. (Romanos 12:2) Mi éra txeu violéntu i nha vida interu staba xeiu di mintira.

Má, na nha studu di Bíblia N prende ma Jeová ten mizerikórdia i el ta púrdua. (Isaías 1:18) N inplora Jeová na orason pa el djuda-m libra di kel stilu di vida la. Ku ajuda di Jeová, poku-poku N konsigi muda nha manera di ser. Un pasu inportanti ki nu da é kantu mi ku nha namorada nu kaza.

Ku 24 anu, dja N staba kazadu i ku três fidju. Agó N tinha ki ranja un trabadju onéstu. Má N tinha poku skóla i N ka tinha ninhun spiriénsa ku trabadju. Más un bês N inplora Jeová na orason pa el djuda-m. Nton, N bai djobe trabadju. N fla kes responsável di inprézas ma N kria mudaba nha vida i ranjaba un trabadju onéstu. Alvês, N ta flaba es ma N staba ta studa Bíblia i ma N krê biraba un sidadon midjór. Kuazi ninhun di es ka ranja-m trabadju. Ti ki enfin, na un entrevista, N konta responsável di kel inpréza klaru sobri nha pasadu. El fla-m: “N ka sabe pamodi, má algun kuza sta ta fla-m ma N debe kontrata-u.” N ta kridita ma kel-li éra respósta pa nhas orason. Ku ténpu, mi ku nha mudjer nu batiza i nu bira Tistimunhas di Jeová.

MODI KI BÍBLIA MUDA NHA VIDA:

Oji N sta bibu pamodi N ta aplika konsedjus di Bíblia i N ta vive sima Deus ta krê. N ten un família unidu. N sta konvensidu ma Jeová dja purdua-m. Pur isu, N ten un konsénsia linpu.

Dja ten 14 anu ki N sta ta sirbi pa ténpu interu, ta djuda otus algen prende kuzê ki Bíblia ta inxina. I ka dura li, nha mudjer entra na sirvisu pa ténpu interu tanbê. Na kes 30 anu ki dja pasa, dja N konsigi djuda 22 di nhas koléga di trabadju kumesa ta sirbi Jeová. Ti inda N sta ta bai pa kes lója grandi má ka pa N bai ngana algen más, sima N ta fazeba antis. Gósi, txeu bês óras ki N ta bai la N ta pâpia ku pesoas sobri nha fé. N krê da-s un kuza, ki é kel speransa di vive na un mundu novu sen kes algen ki ta ngana algen. — Salmo 37:10, 11.