ASUNTU DI KAPA DI REVISTA | ES KA KONSIGI KABA KU BÍBLIA!
Es ka konsigi kaba ku Bíblia sikrê ku pirsigison
PRIGU: Txeu xéfi di relijion i pulítika faze sforsu pa sukundi mensaji di Bíblia. Txeu bês, es uza ses autoridadi pa poi pesoas ta para di faze, traduzi i ti di ten un Bíblia. Nu ben odja dôs izénplu.
Pa vólta di anu 167 A.J: Rei Antíoku Epifániu krê forsaba judeus pa konverte pa relijion gregu. Pur isu, el manda distrui tudu kópias di Skrituras Ebraiku, ki oji é konxedu pa Velhu Testamentu. Storiador Heinrich Graetz skrebe ma kes algen ki rei manda, “ta ratxaba i ta kemaba kes rolu di Lei na undi ki es ta atxaba es i es ta mataba kes algen ki ta leba kes rolu pa atxaba forsa i konsolu”.
Uns 800 anu atras: Alguns xéfi di relijion katóliku fika xatiadu pamodi alguns algen di igreja staba ta inxina kuzê ki Bíblia ta fla, envês di inxina dotrina katóliku. Nton, es kumesa ta txoma di rebéldi kalker algen ki ka tinha puzison na igreja ki tinha kes livru di Bíblia, fóra livru di Salmos na latin. Na un runion di xéfis di igreja dadu kel órdi li: “Nhos ser fiel i sénpri nhos djobe dretu kes rebéldi... i nhos djobe na tudu kaza ki nhos ta diskunfia di el i na kes lugar baxu txon... Nhos debe distrui kel kaza ki nhos atxa un rebéldi.”
Si kes inimigu di Bíblia konsigi kababa ku el, se mensaji ta dizaparseba.
Kópias di Bíblia na inglês di William Tyndale proibidu i kemadu. Tyndale matadu na anu 1536. Má se traduson kontinua ti nos ténpu.
PAMODI KI ES KA KONSIGI KABA KU BÍBLIA: Tudu kel sforsu ki Rei Antíoku Epifániu faze pa konverte judeus fika konsentradu na nason di Israel. Má tinha grupus di judeu ki ta moraba na otus lugar. Alguns studiozu ta kridita ma na ténpu di Jizus, más di 60 pursentu di judeus ka ta moraba na Israel. Judeus ta guardaba kópias di Skrituras na ses sinagógas. Kes mésmu kópia uzadu pa txeu jerason i tanbê pa kristons. — Atos 15:21.
Dja ten uns 800 anu ki kes algen ki ta amaba Bíblia pirsigidu, má es kontinua ta traduzi i ta faze kópias di Skrituras. Pa vólta di anu 1450, inventadu inpresora ku létras ki ta da pa muda di lugar. Má antis di kel-li, talvês pártis di Bíblia dja staba na 33 língua. Dipôs ki inventadu kel inpresora li, Bíblia pasa ta traduzidu i ta inprimidu más di ki antis.
REZULTADU: Pesoas poderozu sima reis i xéfis di relijion pirsigi Bíblia. Má simé, Bíblia é kel livru más distribuidu i traduzidu na mundu interu. Es livru li, influensia leis i línguas di alguns país i tanbê vida di milhons di algen.