Pamodi ki es ka konsigi kaba ku Bíblia

Bíblia txiga ti nos ténpu sikrê dja pasa un monti anu, sikrê ku pirsigison i ku pesoas ta tenta muda se mensaji. Pamodi kel-li, oji bu pode ten i lé un Bíblia. I óras ki bu ta skodje un bon traduson di Bíblia, bu pode kunfia ma bu sta lé kel mensaji ki staba na kes skritura orijinal.a Má pamodi ki es ka konsigi kaba ku Bíblia? Pamodi ki kel livru li é txeu spesial?

Txeu algen ki ta studa Bíblia txiga kel mésmu konkluzon ki apóstlu Polu, ki skrebe: ‘Tudu ki sta na Skritura ben di Deus’. (2 Timóteo 3:16 ) Es ta kridita ma Bíblia txiga ti nos ténpu pamodi el é Palavra di Deus i pamodi Deus proteje-l. Faizal, ki dja nu papiaba di el na primeru artigu di kel revista li, disidi studa Bíblia pa diskubri si kel-li é verdadi. El fika dimiradu ku kuzê ki el prende. Pur izénplu, el odja ma txeu kuza ki relijions ki ta fla ma es é kriston ta inxina ka sta na Bíblia. Tanbê, el fika kontenti di odja kuzê ki Bíblia ta fla sobri vontadi di Deus pa Téra.

Faizal fla: “Gósi N ten sertéza ma kel Bíblia ki N ten é un prezenti di Deus. Si é Deus ki faze séu ku Téra, el ka ten kapasidadi di da-nu un livru i di proteje-l? Si un algen ka kridita na kel-li é sima si el sta duvida di puder di Deus. É sima si el sta fla ma kapasidadi di Tudu-Poderozu ten limiti. I ami é kenha pa duvida di puder di Deus?” — Isaías 40:8.