N ta gostaba di djuga beizebol más ki kalker kuza!

MODI KI ÉRA NHA VIDA ANTIS

N kriadu na un sidadi pértu di mar na Kósta Rika, ki txoma Puerto Limón. Nha mai ku nha pai tevi 8 fidju i mi é kel sétimu. Kantu N tinha 8 anu, nha pai móre. Dipôs di kel-li nha mai kria-nu el sô.

N gosta di beizebol désdi mininu. Kantu mi éra rapás, N entra pa un ekipa ki ka éra profisional. Kantu N tinha 20 i poku anu un algen ki ta djobeba bons djugador konvida-m pa N bai djuga na un ekipa profisional di Nikarágua. Má na kel ténpu nha mai staba duenti i N staba ta kuida di el, pur isu N ka seta kel konviti. Dipôs, otu algen ki ta djobeba bons djugador konvida-m pa N bai djuga na ekipa di Kósta Rika, ki formadu pa kes midjór djugador di kes ekipa ki ka éra profisional. Di es bês, N seta konviti. N djuga na ekipa di país di 1949 ti 1952, i N djuga txeu bês na Kuba, na Méxiku i na Nikarágua. N ta djugaba dretu na un puzison inportanti. N txiga ti di djuga 17 jogu un tras di kel otu sen fadja ninhun bês. N gostaba txeu di obi kes algen ta grita nha nómi!

N ta fika tristi di fla ma N ta lebaba un stilu di vida txeu mariadu. N tinha sô un namorada, má N ta staba sénpri ku otus mudjer. Tanbê N ta bebeba txeu. Un dia, N bebe txeu dimás ki nen N ka ta lenbra modi ki N konsigi txiga kaza. Alén di kel-li, N gostaba di faze apósta na jogu di dominó i di djuga na lotaria.

Nha mai bira Tistimunha di Jeová na kel ténpu. El tenta pâpia ku mi sobri Bíblia má N ka liga, pamodi N ta pensaba sô na beizebol. Alvês N ta staba txeu konsentradu na djuga i na trena ki nen N ka ta xintiba fómi! N ta gostaba di djuga beizebol más ki kalker kuza!

Kantu N tinha 29 anu, N panha un pankada gravi timenti N staba ta tenta pega un bóla duránti un jogu. Dipôs ki N rekupera, N para di djuga na ekipa profisional. Má N kontinua ta trena djugadoris di un ekipa, ki ka éra profisional, pértu di nha kaza.

MODI KI BÍBLIA MUDA NHA VIDA

Na anu 1957, N bai sisti un kongrésu di Tistimunhas di Jeová na un stádiu ki dja N djugaba antis. Timenti N staba xintadu, N fika dimiradu di odja bon konportamentu di Tistimunhas di Jeová. Ka ta daba nen pa konpara ku kel konfuzon di kes monti di algen ki ta sistiba jogu di beizebol. Kuzê ki N odja la pô-m ta krê studa Bíblia i sisti runion ku Tistimunhas di Jeová.

N fika dimiradu ku txeu di kes kuza ki N prende na Bíblia. Pur izénplu, Jizus dja flaba ma na ténpu di fin se disiplus ta pregaba notísias sábi di Reinu di Deus na mundu interu. (Mateus 24:14) Tanbê N prende ma kes ki ta sigi Jizus di verdadi ka ta prega pa ganha dinheru. Jizus fla: ‘Nhos dadu di grasa; pur isu nhos da di grasa tanbê.’ — Mateus 10:8.

Timenti N staba ta studa Bíblia, N fika ta presta atenson pa N odja si Tistimunhas di Jeová ta fazeba kuzê ki es ta inxinaba. N fika dimiradu di odja ma es ta sforsa txeu pa prega notísias sábi di Reinu di Deus na mundu interu. Tanbê N odja ma es gostaba di da, sima Jizus fla ma se disiplus debe faze. Pur isu, kantu N lé konviti ki Jizus faze na Marcos 10:21, ‘ben bu ser nha sigidor’, N krê biraba un Tistimunha di Jeová.

Má leba algun ténpu pa N muda nha konportamentu. Pur izénplu, duránti txeu anu N tinha un nunbru di “sórti” ki N ta djugaba na lotaria tudu simana. Má N prende na Bíblia ma Deus ka gosta di ganánsia i nen pa nu adora ‘deus di bon sórti’. (Isaías 65:11; Colossenses 3:5) Pur isu N disidi para di faze apósta. Na primeru dumingu dipôs ki N para di djuga, nha nunbru di “sórti” ki sai! Tudu algen faze-m trósa pamodi N ka djuga na lotaria kel simana i es kumesa ta faze-m txeu preson pa N torna djuga, má N konsigi aguenta. Nunka más N ka torna djuga na lotaria.

N pasa pa otu tentason ki poi nha ‘manera di ser novu’ na próva, lógu na dia ki N batiza na anu 1958. (Efésios 4:24) Na kel dia di noti kantu ki N ben di kongrésu i N bai pa kel otel ki N staba, N nkontra ku kel minina ki nu ta namoraba antis ta spera-m na pórta di nha kuartu. El fla-m: “Ben li, Sammy. Nu ben pasa sábi es noti!” N responde kel óra: “Nau!” N lenbra-l ma gósi N staba ta vive di akordu ku kel ki Bíblia ta fla. (1 Coríntios 6:18) El fla-m: “Kuzê? Bu sta dodu. Sigi kes kuza ki Bíblia ta fla sobri séksu i kazamentu ka sta na móda más.” I el insisti ku mi pa nu torna fika djuntu. Má N iginora-l, N entra na kuartu i N tranka pórta. Oji N ta xinti kontenti di fla ma désdi ki N bira Tistimunha di Jeová, N konsigi mante fiel pa Jeová.

BENSONS KI N RESEBE

N ta atxa ma ta daba pa N skrebe un livru sobri kes monti benson ki N resebe pamodi N sigi kel ki Bíblia ta fla. Alguns di kes benson ki N resebe é ki N tene amigus di verdadi, N ten un obijetivu na vida i mi é un algen filís.

Ti inda N gosta di beizebol, má gósi ten kuzas ki é más inportanti pa mi. Kantu N ta djugaba beizebol, N ganha dinheru i fama má kes kuza li ka dura txeu. Má kel amizadi ki N ten ku Deus i ku nhas irmon ta ben dura pa tudu ténpu. Bíblia ta fla: ‘Mundu sta ta pasa, i se dizeju tanbê, má ken ki ta faze vontadi di Deus ta kontinua pa tudu ténpu.’ (1 João 2:17) Gósi N ta ama Jeová i se povu más ki kalker kuza!