Kuzê ki ta djuda-nu ten amor pa Deus i pa otus algen

Nbóra kristons é ka obrigadu sigi Lei di Muizes, kel dôs mandamentu ki é ama Deus i ama otus algen é un rezumu di tudu kel ki Jeová ta spéra di nos. (Mt 22:37-39) Kel tipu di amor li é ka un eransa ki nu ta dadu. Nu meste sforsa pa nu ten el. Má kuzê ki pode djuda-nu? Un manera inportanti é óras ki nu ta lé Bíblia tudu dia. Na Bíblia nu ta prende txeu kuza sobri manera di ser di Jeová. Óras ki nu ta studa-s, nu ta odja ‘bondadi di Jeová’. (Sal 27:4) Kel-li ta djuda-nu ten más amor pa Deus i pensa sima el. Tanbê nu ta ten más vontadi di obi ku mandamentu di Deus, sima kel mandamentu di mostra amor di verdadi pa otus algen. (Jo 13:34, 35; 1Jo 5:3) Odja três sujiston ki ta poi leitura di Bíblia fika más sábi:

• Imajina sima ki bu sta na kel lugar. Tenta odja lugar, obi son, xinti txeru i ntende modi ki kes algen sta ta xinti.

  

• Faze leitura di maneras diferenti. Bu pode lé ku vós altu ô obi leitura gravadu i ba ta sigi. Envês di lé kapítlu pa kapítlu, bu pode lé sobri un asuntu ô sobri un personájen di Bíblia. Pur izénplu, uza Apêndice A7-A , B , C , D , E , F , G i H ô Apêndice B12-A i B na Tradução do Novo Mundo da Bíblia Sagrada pa bu lé sobri Jizus. Lé kel kapítlu interu ki tradu testu di dia. Lé kes livru di Bíblia pa órdi ki es skrebedu.

  

• Lé pa bu ntende. Si bu lé sikrê un kapítlu pur dia pa bu ntende i pensa na kuza ki bu sta lé, é mutu más midjór ki lé txeu kapítlu sô pa lé. Pensa na kuza ki sta kontise. Djobe más informason. Uza mapa i nótas. Faze piskiza sobri un asuntu ki bu ka ntende. Si ta da, gasta kel mésmu ténpu ki bu uza pa bu lé tanbê pa pensa na kuza ki bu lé.