VIVE SIMA UN KRISTON

Bu sta tra pruvetu di Izamina testu di dia?

Bu ta lé testu di Bíblia i komentáriu ki ta sta na Izamina testu di dia, pa bu amizadi ku Jeová bira más fórti? Si inda nau, pamodi ki bu ka ta kumesa faze-l tudu dia? Txeu algen ta izamina testu di dia sédu palmanhan, asi es pode kontinua ta pensa na el duránti dia, timenti es ta faze ses atividadi. (Jos 1:8; Sal 119:97) Modi ki bu pode tra más pruvetu di testu di dia? Un manera pa djuda-u ntende midjór é lé kes versíklu antis i dipôs di kel testu di Bíblia. Otu kuza ki bu pode faze é pensa na un izénplu di Bíblia ki ten aver ku kel testu di dia. Dipôs faze sima bu prende. Asi, óras ki bu ta toma un disizon, bu pode ten sertéza ma bu ta ten bons rezultadu. — Sal 119:105.

Família di Betel na mundu interu ta izamina testu di dia antis di kumesa trabadju. Na kes últimu anu, txeu di kes Adorason di palmanhan di Betel podu na JW Broadcasting ^®, na grupu di vídiu PRUGRAMAS I RUNIONS SPESIAL. Kal ki é últimu bês ki bu sisti un di kes Adorason di palmanhan? Talvês un di kes vídiu é kel ki bu sta ta meste própi. Pur izénplu, kuzê ki bu pode prende ku izénplu di Ló sobri toma disizons?

ODJA VÍDIU KA NHOS AMA MUNDU (1JO 2:15). DIPÔS RESPONDE KES PERGUNTA LI:

Ki prinsípiu di Bíblia é bazi pa kel Adorason di palmanhan li?
Kuzê ki nu pode prende di stória di Ló sobri ka ama mundu nen kuzas di mundu? — Gén 13:12; 14:12; 19:3, 12, 13, 24-26.
Modi ki nu pode mostra ma nu ta ama Jeová i ma nu ka ta ama mundu nen kes kuza di mundu?

Fotus i dizenhus: Duránti dia un irmon ta pensa na testu di dia i komentáriu. 1. Timenti el sta ta lé, el sta ta imajina kel anju ta pega Ló ku se família na mô pa fuji di Sudoma. 2. Timenti el sta ta almusa na se trabadju, el sta kontinua ta pensa na kel ki el lé di palmanhan. 3. Di noti na kaza, timenti el sta ta dobra ropa el sta kontinua ta pensa na kuzê ki el lé di palmanhan. — Modi ki N pode mostra duránti dia ma N ta da valor pa Palavra di Deus?