VIVE SIMA UN KRISTON
Pripara gósi pa un imerjénsia di saúdi
Pamodi ki nu debe sta priparadu? Imerjénsia di saúdi pode kontise di un óra pa kel otu. Pur isu faze tudu kel ki bu pode pa sta priparadu, asi óras ki kontise un imerjénsia di saúdi, bu ta konsigi resebe kel midjór tratamentu. Si nu faze si, nu ta mostra ruspetu pa vida i pa lei di Jeová sobri sangi. — At 15:28, 29.
Kuzê ki nu pode faze pa nu sta priparadu?
Faze orason i prenxe ku kuidadu bu karton DPA.a Kes publikador batizadu pode pidi kel irmon ki ta kuida di publikasons un karton DPA pa es i un karton pa ses fidjus ki é menór, ki txoma Cartão de Identificação (ic).
Si bu sta grávida, pidi ansions pa da-u un kópia di Informason pa irmans ki sta grávida (S-401). Kel dukumentu li ta djuda-u toma bons disizon sobri alguns prubléma di saúdi ki pode kontise duránti gravidês ô na óra di ten fidju.
Si bu sta bai faze algun tratamentu ki ta nvolve sangi ô bu meste fika na ospital, dexa ansions di bu kongregason sabe algun ténpu antis. Tanbê dexa kes responsável di ospital sabe ma bu krê resebe vizitas di Tistimunhas di Jeová.
Modi ki ansions pode djuda? Es pode djuda-u prenxe bu karton DPA. Ansions ka ta fla-u ki disizons sobri asuntus di saúdi ki bu debe toma ô kuzê ki es ta fazeba. Kada algen debe toma se própi disizon. (Ro 14:12; Gál 6:5) Nton, óras ki bu pâpia ku ansions di bu kongregason ma bu sta ba faze un tratamentu di saúdi ki ta nvolve sangi, es ta bai pâpia faxi ku Kumison di ligason ku ospital (CLH) na bu nómi.
Modi ki CLH pode djuda? Irmons ki ta sirbi na CLH ta trenadu pa djuda kes médiku i kes algen ki ta trabadja na ária di saúdi ntende kal ki é nos puzison sobri sangi. Es pode pâpia ku bu dotor sobri alguns tratamentu ki bu pode faze pa ivita transfuzon di sangi. Tanbê si meste, es ta djuda-u atxa un dotor ki ta kolabora ku bu disizon di ka toma sangi.
ODJA VÍDIU MODI KI NU PODE TOMA DISIZONS SOBRI UZA SANGI NA TRATAMENTUS DI SAÚDI. DIPÔS RESPONDE KEL PERGUNTA LI:
Kuzê ki bu prende na kel vídiu li ki pode djuda-u sta priparadu pa un imerjénsia di saúdi ki ta nvolve sangi?
a Lison 39 di livru Vive filís pa tudu ténpu! pode djuda-u toma disizons sobri saúdi ki ta nvolve sangi.