Bu sabia?
Pamodi ki tinha alguns stranjeru ki éra trópa di rei Davidi?
NA IZÉRSITU di rei Davidi tinha alguns trópa ki éra stranjeru. Pur izénplu, Zeleke, ki éra amonita, Urias, ki éra itita i Itma ki éra moabita.a (1 Cró. 11:39, 41, 46) Entri kes trópa di Davidi tanbê tinha ‘kes keretita, kes peletita i kes jeteu’. (2 Sam. 15:18) Ta parse pa kes keretita i kes peletita éra família pértu di kes filisteu (Eze. 25:16) Kes jeteu ta moraba na un sidadi di filisteus ki txomaba Gati. — Jos. 13:2, 3; 1 Sam. 6:17, 18.
Pamodi ki Davidi skodje kes ómi li pa faze párti di se trópas? El tinha serteza ma es ta sérba lial pa el i más inportanti inda, ma es ta sérba lial pa Jeová. Un disionáriu di Bíblia ta fla kel-li sobri kes keretita i kes peletita: “Es kontinua lial pa Davidi na kes situason más difísil duránti kel ténpu ki el éra rei.” Modi ki es mostra ses lialdadi? Kantu ‘tudu kes ómi di Israel’ dexa rei Davidi i es ba sigi ‘un ómi konfuzéntu ki txomaba Seba,’ kes keretita i kes peletita kontinua lial pa Davidi i es djuda para kel rebelion ki Seba kumesa. (2 Sam. 20:1, 2, 7) Na un otu okazion, Adonias, ki éra fidju di rei Davidi, krê biraba rei na lugar di Salumon. Má, más un bês kes keretita i kes peletita kontinua lial pa Davidi i es djuda Salumon bira rei pamodi éra el ki Jeová skodjeba. — 1 Reis 1:24-27, 38, 39.
Un otu trópa ki éra stranjeru ki kontinua lial pa Davidi, éra Itai ki éra jeteu. Itai i se 600 trópa djuda rei Davidi kantu Absalon ki éra fidju di Davidi, rabela i poi kes ómi di Israel ta bira kóntra rei. Davidi fla Itai ma pamodi el éra stranjeru el ka meste lutaba pa el. Má Itai fla: ‘Sima é sértu ma Jeová sta bibu, i sima é sértu ma nha sinhor, rei, sta bibu, ka ta inporta undi ki nho sta, bu sérvu ta sta la, sikrê é pa móre ô pa vive!’ — 2 Sam. 15:6, 18-21.
Itai éra lial pa Davidi, ki éra kel rei ki Jeová skodjeba.
Sikrê kes keretita, kes peletita i kes jeteu éra stranjeru, es tinha txeu ruspetu pa Jeová, ki é kel Deus verdaderu i pa Davidi, ki éra kel ki Jeová skodjeba. Di serteza Davidi xinti txeu gratu pamodi el tinha ómis lial ki ta apoiaba el!
a Lei di Deus ki sta na Deuteronómio 23:3-6 ta flaba ma ninhun amonita ô moabita ka pode entraba na kongregason di Israel. Kel-li krê flaba ma es ka pode biraba un sidadon legal ku tudu kes direitu ki un israelita tinha. Má, es pode staba djuntu ku kes israelita i moraba na ses meiu si es setaba adorason verdaderu. Djobe livru Estudo Perspicaz das Escrituras, Volumi 1, na asuntu “Amonitas”, dipôs na subtéma “Casamentos Com Israelitas.”