Perguntas ki leitoris ta faze

Kel skritor di Provérbios 30:18, 19 fla ma kaminhu di un ómi ku un minina é un kuza ‘dimás pa el konsigi intende’. Kuzê ki el krê flaba?

Txeu algen ta pergunta kuzê ki kes versiklu li krê fla, ti kes algen ki konxe Bíblia dretu. Kel versiklu na Bíblia Traduson di Mundu Novu ta fla: ‘Ten três kuza ki é dimás pa N konsigi intende i kuatu ki N ka ta intende própi: kaminhu di ágia na séu, kaminhu di kóbra na un rótxa, kaminhu di barku na altu-mar, i kaminhu di un ómi ki sta djuntu ku un minina.’ — Pro. 30:18, 19.

Antis nu ta intendeba ma kel frazi ‘kaminhu di un ómi ki sta djuntu ku un minina’ staba ta pâpia di un kuza negativu. Pamodi? Kes otu versiklu di kel kapitlu ta pâpia di kuzas negativu ki nunka ka ta fika satisfetu i ki ka ta fla ‘dja sta bon.’ (Pro. 30:15, 16) I versiklu 20 ta pâpia di ‘un mudjer ki ta faze adultériu’ ki ta fla ma el ka faze nada di mariadu. Pur isu, nu ta pensaba ma sima un ágia na séu, un kóbra na un rótxa, i un barku antigu na altu-mar ta mexe sen dexa sinal, di mésmu manera un ómi pode faze algun kuza sen ningen diskubri. Pamodi kel-li, nu ta intendeba ma kel frazi ‘kaminhu di un ómi djuntu ku un minina’ staba ta pâpia di un kuza mariadu: di un jóven spértu ki seduzi un minina inosenti sen el da kónta di kal ki éra ses intenson.

Má, ten bons motivu pa nu intende ma kel versiklu li sta ta pâpia di kuzas puzitivu. Kel skritor staba ta pâpia di kuzas ki ta dexaba el dimiradu.

Kes versiklu li na ebraiku, tanbê ta mostra ma el sta ta pâpia di kuzas puzitivu. Di akordu ku un livru,a kel palavra na ebraiku ki traduzidu pa ‘é dimás pa N konsigi intende’ na Provérbios 30:18 ta pâpia “di kuzas ki un algen ta... atxa bunitu, ki algen ta fika dimiradu ku el, ô ki ta parse inposível.”

Profesor Crawford Toy di universidadi di Harvard, na Mérka, tanbê fla ma kel versiklu di Bíblia li ka sta ta pâpia di kuzas negativu. El fla: “Kel skritor sta ta tenta pâpia di kuzas ki ta dexa-l txeu dimiradu.”

Pur isu, ta faze sentidu fla ma kes palavra ki sta na Provérbios 30:18, 19 sta ta pâpia di kuzas ki ta dexa algen txeu dimiradu, ki é dimás pa nu konsigi intende. Sima kel skritor di Bíblia, nu ta fika dimiradu ku modi ki un ágia ta pode bua, un kóbra ta rasta na rótxa, un barku ta viaja na mar, i modi ki un rapás ku un minina pode paxona pa kunpanheru i es ta vive filís djuntu.