Bu perde trabadju? — Odja alguns prinsípiu di Bíblia ki pode djuda-u si bu perde trabadju
Si bu perde trabadju, bu pode fika afetadu ka sô pamodi falta di dinheru má tanbê el pode afeta bu família i bu pode fika txeu fadigadu i preokupadu. Odja alguns prinsípiu di Bíblia ki pode djuda-u lida ku kel-li.
Fla otus algen modi ki bu sta xinti.
Kuzê ki Bíblia ta fla: ‘Un amigu di verdadi ta ama tudu óra’. — Provérbios 17:17.
Dipôs ki bu perde trabadju, bu pode xinti tristi, xatiadu, dizorientadu ô ti ma bu ka bale nada. Óras ki bu fla bu família i bus amigu modi ki bu sta xinti, es pode djuda-u xinti midjór. Tanbê es pode da-u alguns konsedju ki pode djuda-u atxa un novu trabadju.
Ivita fika preokupadu dimás.
Kuzê ki Bíblia ta fla: “Nunka ka nhos fika preokupadu dimás ku dia di manhan, pamodi dia di manhan ta ten ses própi preokupason. Kada dia ten ses prubléma.” — Mateus 6:34.
Bíblia ta insentiva-nu pa nu faze planu pa futuru. (Provérbios 21:5) Má tanbê el ta fla-nu pa nu ka fika preokupadu dimás ku futuru. Txeu bês nu ta fika preokupadu ku kuzas ki talvês nunka ka ta ben kontise. Pur isu, é midjór vive un dia di kada bês.
Bíblia ta da-nu bons konsedju ki ta djuda-nu odja modi ki nu pode lida ku fadiga. Pa bu sabe más lé artigu “Modi ki bu pode lida ku fadiga?”.
Muda manera ki bu ta gasta dinheru.
Kuzê ki Bíblia ta fla: ‘N prende. . . tene txeu i ka tene nada.’ — Filipensis 4:12.
Vive di akordu ku bu novu situason. Kel-li krê fla ma bu ten ki muda manera ki bu ta gasta dinheru, asi pa bu ka gasta más di ki kel ki bu ten. Toma kuidadu pa bu ka faze dívida sen nisisidadi. — Provérbios 22:7.
Pa bu sabe más sobri modi ki bu ta muda manera ki bu ta gasta dinheru, odja artigu “Modi ki nu pode vive ku ménus dinheru?”.
Uza bu ténpu ku sabedoria.
Kuzê ki Bíblia ta fla: ‘Nhos kontinua ta anda ku sabedoria, ta uza nhos ténpu di midjór manera posível.’ — Colossenses 4:5.
Enbóra gósi bu ka ten óra sértu di bai trabadju, bu pode sigi un prugrama pa uza bu ténpu dretu. Faze kel-li ta djuda-u ten un vida organizadu i bu ta xinti más midjór ku bu kabésa.
Sta dispostu na faze mudansas.
Kuzê ki Bíblia ta fla: ‘Ten vantaji na tudu tipu di trabadju duru’. — Provérbios 14:23.
Sta dispostu na faze un trabadju diferenti di kel ki bu tinha antis. Talvês bu ten ki seta un trabadju ki ta parse ma é ka inportanti ô ki bu ta resebe más poku di ki kel ki bu ta resebeba antis.
Ka bu dizisti.
Kuzê ki Bíblia ta fla: ‘Símia bu simenti di palmanhan i ka bu diskansa bu mô ti noti; pamodi bu ka sabe kal ki ta da bons rezultadu’. — Eclesiastes 11:6.
Kontinua ta buska trabadju. Fla otus algen ma bu sta ta djobe trabadju. Pâpia ku bus família, kes algen ki bu konxe, kes algen ki nhos ta trabadjaba djuntu i vizinhus. Djobe trabadju na kes lugar ki talvês pode meste algen pa trabadja. Djobe kes site ki ta faze avizu ma es sta meste di algen pa trabadja. Sta priparadu pa bu bai txeu entrivista di trabadju i pa bu intrega kuriklu un tras di kel otu ti ki bu konsigi trabadju.