Leti di mai

Un livru pa partera ta fla: “Kes leti pa mininu ki ta kunpradu nunka ka ta ser igual ku leti di mai”. Un di kes motivu ki ta poi leti di mai ta ser kel midjór pa mininu é ki korpu di mai ta muda-l, pa mininu pode ten kel ki el meste.

Pensa na kel-li: Kada bês ki mininu ta mama, leti di mai ta ba ta muda ti ki mininu tirmina di mama. Na komésu, kel leti ten proteína, vitamina, mineral i agu más txeu. Dipôs el ta kumesa ta ten gordura más txeu, pa dexa kel mininu fartu. Leti di mai ti ta muda di akordu ku idadi di mininu i ténpu di anu, sima ténpu friu i ténpu kalor.

Leti di mai tanbê ta muda konfórmi óra di dia. Di noti el ten alguns ormona más txeu, sima melatonina, ki ta djuda mininu durmi. I di dia el ten otus ormona más txeu, ki ta djuda mininu fika kordadu. Kes mudansa li ta djuda mininu kustuma ku durmi i korda na mésmu óra.

Na kes primeru dia dipôs di un mudjer ten fidju, se leti ta sta amarelu i el ta txomadu kolostrun. É fásil faze dijeston di kolostrun i el sta xeiu di kuzas ki é bon pa saúdi. Nton ti mésmu un bokadinhu di kolostrun na stômagu pikinoti di un mininu ta djuda txeu. Kolostrun ten txeu proteína inportanti ki ta proteje mininu, ki inda sta fraku, di panha infeson. Tanbê el ta poi mininu ta pupú, asi el ta djuda-l linpa intestinu.

Mai ka meste preokupa si el ten leti ki ta txiga, sikrê el ten jémiu, dja ki se leti ta bira más txeu konfórmi mininu meste.

Kuzê ki bu ta atxa? Leti di mai ku kes kuza ki el ten, ki ta dexa algen dimiradu, ben di ivoluson? ô tevi un algen ki faze-l?