8 Da izénplu

KUZÊ KI KEL-LI SIGINIFIKA

Pai ku mai ki ta da izénplu, ta vive sima kel ki es ta inxina ses fidjus. Pur izénplu, bu ka pode spéra ma bu fidju ka ta konta mintira si alvês el ta obi-u ta fla, “Fla-l ma N ka sta na kaza”, óras ki bu ka krê pâpia ku algen ki sta na pórta.

“Un kuza ki txeu algen ta fla é: ‘Faze kel ki N ta fla, envês di kel ki N ta faze’. Má kel-li ka ta funsiona ku mininus. Es é sima spónja ki ta txupa tudu kuza ki bu ta fla i faze. I es ta fla-nu óras ki nu ka ta aji di akordu ku kel ki nu ta inxina-s.” — David.

KONSEDJU DI BÍBLIA: ‘Abo, ki ta prega pa “ka furta”, bu ta furta?’ — Romanos 2:21.

PAMODI KI KEL-LI É INPORTANTI

Ningen, nen mésmu kolégas, ka ta influensia fidjus, pikinoti ô adulesenti, sima ses pai ku ses mai ta influensia-s. Kel-li krê fla ma bo é kel midjór algen ki ten pa inxina bus fidju anda na un bon kaminhu. Má é klaru ki bu meste aji sima kel ki bu ta fla.

“Nu pode fla kel mésmu kuza monti bês i nu ta fika ta pergunta si nos fidju sta ta obi ô nau. Má sin ki nu ka aji sima kel ki nu ta fla, nos fidju ta fla-nu lógu. Fidjus ta presta atenson na tudu kuza ki nu ta faze, mésmu óras ki nu ta pensa ma es ka sta presta atenson.” — Nicole.

KONSEDJU DI BÍBLIA: ‘Kel sabedoria ki ta ben di riba é ka finjidu.’ — Tiago 3:17.

KUZÊ KI BU PODE FAZE

Analiza bus prinsípiu. Ku kuzê ki bu ta divirti ku el? Modi ki bu ta trata bu maridu ô bu mudjer i bus fidju? Ki tipu di amigus bu ten? Bu ta preokupa ku otus? Pergunta bu kabésa: ‘Ami é kel tipu di algen ki N krê pa nha fidju ser?’

“Mi ku nha maridu, nu ka ta iziji pa nos fidjus vive di akordu ku sértus prinsípiu si nos nu ka sta dispostu na vive di akordu ku es.” — Christine.

Pidi diskulpa óras ki bu fadja. Bus fidju sabe ma bo é ka perfeitu. Si bu ta fla bu maridu ô bu mudjer i bus fidju, “Diskulpa-m” óras ki bu ta fadja, bu ta inxina bus fidju un kuza inportanti, ki é ser onéstu i umildi.

“Nos fidjus meste obi-nu ta rekonhese nos fadja i ta pidi diskulpa. Si es ka obi kel-li, es ta prende sukundi ses fadja.” — Robin.